မေ ၂၂ ရက်က ပြုလုပ်သည့် လွှတ်တော်အစည်းအဝေးတွင် ကိုယ်စားလှယ်အချို့နှင့် စကားပြောနေသည့် ဝန်ကြီးဒေါ်နီလာကျော်ကို တွေ့ရစဉ်
မြို့ပြနှင့် အိုးအိမ်ဖွံ့ဖြိုးရေး ဦးစီးဌာနမှ စီမံဆောင်ရွက်နေသည့် မြေနှင့်အိမ်ရာများအား ယခုနှစ် ဒီဇင်ဘာလ နောက်ဆုံးထားပြီး တိုင်းဒေသကြီး အစိုးအဖွဲ့သို့ လွှဲပြောင်းပေးရန် စီစဉ်ဆောင်ရွက်နေကြောင်း ရန်ကုန်တိုင်းဒေသကြီး အစိုးရအဖွဲ့ လျှပ်စစ်နှင့် စက်မှုလက်မှုဝန်ကြီး ဒေါ်နီလာကျော်က မေ ၂၂ ရက်တွင် ပြုလုပ်သည့် ဒုတိယအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန် အစည်းအဝေး ၃၀ ရက် မြောက်တွင် ပြောကြားသည်။
အဆိုပါကိစ္စအား မင်္ဂလာတောင်ညွန့်မြို့နယ် မဲဆန္ဒနယ်အမှတ်(၁)မှ တိုင်းဒေသကြီး လွှတ်တော်ကိုယ်စားလှယ် ဦးလှဌေးက ရန်ကုန်တိုင်းဒေသကြီး အတွင်းရှိ အိုး/အိမ် ဦးစီးဌာနမှ ဆောင်ရွက်နေသော ဈေးများ၊ အိမ်ရာများနှင့် ဧရိယာများအား ရန်ကုန်တိုင်းဒေသကြီးအစိုးရ လက်အောက်သို့ ရောက်ရှိ ဆောင်ရွက်ခွင့် ရစေရန်အတွက် စီမံဆောင်ရွက်သွားရန် အစီအစဉ်ရှိမရှိ သိရှိလိုကြောင်း မေးခွန်းနှင့် ပတ်သက်ပြီး ပြန်လည်ဖြေကြားရာတွင် ထည့်သွင်းပြောကြား ခဲ့ခြင်းဖြစ်သည်။
“လုံးခြင်းအိမ်ရာများနှင့် တိုက်ခန်းတွဲ အိမ်ရာများ၊ မြေများနဲ့တကွ ဈေးများအားလုံးကို မြို့ပြနှင့် အိမ်ရာဖွံ့ဖြိုးရေး ဦးစီးဌာနမှ ယခုအထိ စီမံခန့်ခွဲနေတဲ့ ကိစ္စရပ်များ အားလုံးကို ထိရောက်စွာ စနစ်တကျ ဆောင်ရွက်နိုင်ရန်နဲ့ ပြင်ဆင်ထိန်းသိမ်းနိုင်ရန် ဆောက်လုပ်ရေး ဝန်ကြီးဌာနက တိုင်းဒေသကြီး အစိုးရအဖွဲ့သို့ လွှဲပြောင်းပေးရန် စီမံပြီးဖြစ်ပါတယ်။ ၂၀၁၇ မတ် ၂၈ ရက်မှာ ပြည်ထောင်စုဝန်ကြီးမှ ရန်ကုန်တိုင်းဒေသကြီး ဝန်ကြီးချုပ်ထံသို့ ၁၉၈၈ နောက်ပိုင်းမှာ တည်ဆောက်ခဲ့တဲ့ လုံးခြင်းအိမ်ရာ အချို့နှင့် အိမ်ရာအချို့ကို လာရောက် လွှဲပြောင်းပေးပြီး ဖြစ်ပါတယ်။ လွှဲပြောင်းရန် ကျန်ရှိသည့် မြို့ပြမြေအချို့နဲ့ လုံးခြင်းအိမ်ရာများ တိုက်ခန်းတွဲအိမ်ရာများ၊ တိုက်ခန်းတွဲအိမ်ရာ တည်ရှိရာ အစိုးရမြေများကို ရန်ကုန်တိုင်းဒေသကြီး အစိုးရအဖွဲ့ထံသို့ ၂၀၁၈ ခုနှစ် ဒီဇင်ဘာ နောက်ဆုံးထား၍ လွှဲပြောင်းလက်ခံနိုင်ရေး စီစဉ်ဆောက်ရွက်နိုင်ရေး ဆောင်ရွက်လျက် ရှိပါတယ်” ဟု ဝန်ကြီးဒေါ်နီလာကျော်က ပြောကြားသည်။
အိမ်ရာစီမံခန့်ခွဲခြင်းနှင့် ပြင်ဆင်ထိန်းသိမ်းရေး ကိစ္စရပ်များနှင့် ပတ်သက်ပြီး စုပေါင်းပိုင် အဆောက်အအုံများ စီမံခန့်ခွဲရေး ညွှန်ကြားချက်တွင် ဆန္ဒအလျောက် ပူးပေါင်းဆောင်ရွက်သည့် စနစ်ဖြစ်ခြင်း၊ စည်းမျဉ်းစည်းကမ်းနှင့် လုပ်ထုံးလုပ်နည်း အသေးစိတ် မပါရှိခြင်း၊ စည်းကမ်း ဖောက်ဖျက်မှုအပေါ် စုပေး၊ ဒဏ်ပေးမပါရှိခြင်း၊ အငြင်းပွားမှု ဖြေရှင်းသည့် လုပ်ငန်းစဉ်များ မပါရှိခြင်းတို့အပြင် တရားဥပဒေ စိုးမိုးရေးနှင့် ပြည်သူလူထု၏ စည်းကမ်းလိုက်နာမှု အားနည်းခြင်း၊ ဥပဒေအရ အရေးယူဆောင်ရွက်နိုင်မှု အားနည်းခြင်းတို့အပြင် အိမ်ရာအရောင်းနဲ့ အငှားတွင် စီမံခန့်ခွဲမှု အားနည်းချက်များ၊ အခြေခံ အဆောက်အအုံ လျော့နည်းပြတ်လပ်မှုများ၊ မြို့ပြဥပဓိကျဆင်းမှုများ ပေါ်ပေါက်လျက်ရှိကြောင်း ဝန်ကြီးဒေါ်နီလာကျော်က ပြောကြားသည်။
“ကျွန်မတို့ ရန်ကုန်မြို့တော်မှာ ပြည်တော်သာအိမ်ရာ စီမံကိန်းဆိုပြီး အငှားအိမ်ရာများစတင်ပြီး ဖော်ဆောင် ဆောက်လုပ်ခဲ့ရာမှာ ဖဆဖလအိမ်ရာလို့ခေါ်တဲ့ မင်္ဂလာတောင်ညွန့် အိမ်ရာနဲ့တကွ လမ်းသစ်ရိပ်သာ၊ ဦးဝိစာရအိမ်ရာ အစရှိတဲ့ အိမ်ရာစီမံကိန်းများနဲ့တကွ တပ်မတော်အစိုးရ လက်ထက်မှာ ရန်ကုန်မြို့ ချဲ့ထွင်ခြင်းလုပ်ငန်းဖြစ်တဲ့ မြို့သစ်ခြောက်မြို့နယ်၊ လှိုင်သာယာ၊ ရွှေပြည်သာ၊ ဒဂုံမြို့သစ် လေးမြို့နယ်တို့ကို တည်ဆောက်ခဲ့ပါတယ်။ ထိုသို့ တည်ဆောက်ပြီးတဲ့ အချိန်မှာ အိမ်ရာဖွံ့ဖြိုးရေး သာမက ရုပ်ပိုင်းဆိုင်ရာ အခြေခံအဆောက်အအုံ၊ စီးပွားရေးဆိုင်ရာ အခြေခံ အဆောက်အအုံ၊ လူမှုရေးဆိုင်ရာ အခြေခံ အဆောက်အအုံများကိုပါ အကောင်အထည်ဖော် တည်ဆောက်ပေးခဲ့ပါတယ်” ဟု ဝန်ကြီးဒေါ်နီလာကျော်က ပြောကြားသည်။
ထို့ပြင် တည်ဆောက်ရေးကာလ နောက်ပိုင်းတွင် စီမံခန့်ခွဲခြင်းနှင့် ပြင်ဆင်ထိန်းသိမ်းခြင်း၊ ဆက်လက် ဆောင်ရွက်ရန်အတွက် ရုပ်ပိုင်းဆိုင်ရာ အခြေခံ အဆောက်အအုံဖြစ်သည့် လျှပ်စစ်၊ ရေ၊ ယာဉ်လမ်း အစရှိသည် တို့ကို ပြည်သူ့ဝန်ဆောင်မှုပေးသည့် ရန်ကုန်မြို့တော် လျှပ်စစ်ဓာတ်အားပေးရေး ကော်ပရေးရှင်း၊ ရန်ကုန်မြို့တော် စည်ပင်သာယာရေး ကော်မတီထံသို့ လွှဲပြောင်းပေးခြင်းများ ရှိခဲ့ကြောင်း၊ အိမ်ရာစီမံခန့်ခွဲမှုနှင့် ပြင်ဆင်ထိန်းသိမ်းမှုသည် မြို့ပြနှင့်အိမ်ရာ ဦးစီးဌာန၏ ရည်မှန်းချက် တာဝန်တစ်ခု ဖြစ်သည်နှင့်အညီ အိမ်ရာစီမံခန့်ခွဲရေး ကော်မတီနှင့် အိမ်ရာသာယာရေး ကော်မတီများ ဖွဲ့စည်းပြီး ဆောင်ရွက်ခဲ့ကြောင်း ၎င်းကဆက်လက် ပြောကြားသည်။
