အာဆီယံနိုင်ငံများအနက် မြန်မာနိုင်ငံသားများ၏ ရွှေ့ပြောင်းအလုပ်လုပ်ကိုင်မှုနှုန်းထား မြင့်တက်လာကြောင်း စစ်တမ်းတစ်ရပ်ထုတ်ပြန်

အာဆီယံနိုင်ငံများအနက် မြန်မာနိုင်ငံသားများ၏ ရွှေ့ပြောင်းအလုပ်လုပ်ကိုင်မှုနှုန်းထား မြင့်တက်လာကြောင်း စစ်တမ်းတစ်ရပ်ထုတ်ပြန်
Published 19 May 2018

အာဆီယံနိုင်ငံများအနက် မြန်မာနိုင်ငံသားများ၏ ရွှေ့ပြောင်း အလုပ်လုပ်ကိုင်မှု နှုန်းထားမှာ မြင့်တက်လာကြောင်း Myanmar Center for Economic and Social Development အဖွဲ့၏ လေ့လာချက် စစ်တမ်းတွင် ဖော်ပြထားချက်အရ သိရသည်။

အာဆီယံနိုင်ငံများအနက် ရွှေ့ပြောင်းသွားလာမှုမှာ မြန်မာနိုင်ငံက ၃၃ ရာခိုင်နှုန်းဖြင့် အမြင့်ဆုံးဖြစ်နေပြီး ပြည်တွင်း၌ ကျွမ်းကျင်လုပ်သား ရှားပါးမှုက အဓိက ပြဿနာ ဖြစ်နေကြောင်း အလုပ်သမားရေးဆိုင်ရာ ကျွမ်းကျင်သူများက ပြောဆိုသည်။

လုပ်ခလစာ သက်သာသော မြန်မာနိုင်ငံသားများအစား ဈေးနှုန်းကြီးမြင့်သော အိမ်နီးချင်းနိုင်ငံက ကျွမ်းကျင်လုပ်သားများက နေရာယူထားကြကြောင်း Myanmar Center for Economic and Social Development အဖွဲ့၏ လေ့လာချက်များအရ သိရသည်။

မြန်မာနိုင်ငံမှ အခြားတစ်နိုင်ငံသို့ ရွှေ့ပြောင်းလုပ်ကိုင်ကြခြင်းအပြင် ပြည်တွင်း၌လည်း နယ်ဒေသများမှ မြို့ကြီးများသို့ ရွှေ့ပြောင်းလုပ်ကိုင်ကြသော နှုန်းထားများလည်း မြင့်တက်လာကြောင်း သိရသည်။ အများစုသည် ကျေးလက်ဒေသများတွင် ရာသီအလိုက် လုပ်ကိုင်ရမည့် စိုက်ပျိုးရေး လုပ်ငန်းများအစား မြို့ကြီးများရှိ အထည်ချုပ်စက်ရုံများတွင် လစဉ်ပုံမှန်ဝင်ငွေရသော လစဉ်ပုံမှန်ဝင်ငွေရတဲ့ လုပ်သားများအဖြစ် ကူးပြောင်းလာကြကြောင်း သိရသည်။

“အဓိကကတော့ ပြည်တွင်းမှာ တကယ်ကျွမ်းကျင်တဲ့ လုပ်သားတွေ ရှိလာမယ်ဆိုရင် ရွှေ့ပြောင်းမှုတွေ လျော့ကျသွားမှာ။ ကျွန်တော်တို့ JobNet အနေနဲ့လည်း ပြည်ပရောက်နေတဲ့ တကယ့်ကျွမ်းကျင်သူတွေကို ပြန်ပြီးဖိတ်ခေါ်နေပါတယ်။ JobNet & Website မှာဆိုလည်း ပြည်ပရောက်နေတဲ့ မြန်မာတွေအတွက် ပြည်တွင်းမှာ ပြန်လုပ်နိုင်မယ့် အလုပ်တွေကို တွေ့ရမှာပါ။ ကျွမ်းကျင်လုပ်သားတွေ ရှိလာဖို့ကတော့ ရေတိုရေရှည် စီမံကိန်းတွေချပြီး ဆောင်ရွက်ရမယ့် အခြေအနေ ရှိပါတယ်” ဟု JobNet.com.mm  ၏ မန်နေဂျင်း ဒါရိုက်တာ Matt De Luca က သုံးသပ်ပြောကြားသည်။

ရန်ကုန်တိုင်းဒေသကြီးတွင် နေထိုင်လျက်ရှိသော လူဦးရေ၏ ၄၂ ဒသမ ၃ ရာခိုင် နှုန်းသည် အခြားတိုင်းဒေသကြီး၊ ပြည်နယ်များမှ ပြောင်းရွှေ့လာကြသူများ ဖြစ်ကြပြီး ၂၆ ရာခိုင်နှုန်းသည် အလုပ်အကိုင်ကြောင့် ရွှေ့ပြောင်းသွားလာခြင်း ဖြစ်ကြောင်း အပြည်ပြည်ဆိုင်ရာ အလုပ်သမားအဖွဲ့၏ စစ်တမ်းက ဖော်ပြခဲ့သည်။ ကျွမ်းကျင်လုပ်သား ရှားပါးမှု ပြဿနာကို ဖြေရှင်းပေးနိုင်မှု မရှိမချင်း ရွှေ့ပြောင်းလုပ်သား ပြဿနာမှာ ပိုမိုကြီးမားလာဖွယ် ရှိနေကြောင်း သိရသည်။

ပြည်တွင်း၌ မြန်မာနိုင်ငံလုပ်သား အင်အားကို ကောင်းစွာအသုံးချပြီး ပို့ကုန်ဦးစားပေး ထုတ်လုပ်ရေး လုပ်ငန်းများနှင့် လုပ်အားအခြေခံ ကုန်ထုတ်လုပ်မှုများတွင် နိုင်ငံခြား ရင်းနှီးမြှုပ်နှံမှုများ ဝင်ရောက်လာပါက မြန်မာ့စီးပွားရေးအတွက် အလားအလာကောင်းများ ရှိနေကြောင်း Asian Development Outlook 2018 တွင် ဖော်ပြထားသည်။

 

Most Read

Most Recent