<

ကုမ္ပဏီများ သို့မဟုတ် ၀န်ထမ်းများ၏ ကိုယ်ကျိုးရှာမှုကြောင့် သတ်မှတ်ကာလအတွင်း လမ်းပိုင်း ပျက်စီးမှုရှိပါက Black List စာရင်းသွင်း အရေးယူမည်ဟု ဒုတိယ၀န်ကြီး ပြောကြား

ကုမ္ပဏီများ သို့မဟုတ် ၀န်ထမ်းများ၏ ကိုယ်ကျိုးရှာမှုကြောင့် သတ်မှတ်ကာလအတွင်း လမ်းပိုင်းပျက်စီးမှုရှိပါက Black List စာရင်းသွင်း အရေးယူမည်ဖြစ်ကြောင်း ဆောက်လုပ်ရေးဝန်ကြီးဌာန ဒုတိယ၀န်ကြီး ဦးကျော်လင်းက ပြောကြားသည်။

မေ ၁၇ ရက်က ပြုလုပ်သည့် အမျိုးသား လွှတ်တော်အစည်းအဝေးတွင် စစ်ကိုင်းတိုင်း ဒေသကြီး မဲဆန္ဒနယ်အမှတ် (၄) မှ ဦးလှဦးက မြန်မာတစ်နိုင်ငံလုံးရှိ အများပြည်သူ အသုံးပြုမြဲဖြစ်သော လမ်းဌာန၊ စည်ပင်သာယာဌာန၊ ဆောက်လုပ်ရေးဌာနတို့နှင့် လွှဲအပ်သော တင်ဒါရ ကုမ္ပဏီ အသီးသီးတို့ တာဝန်ယူပြုလုပ်ကြသော ကတ္တရာခင်းလမ်းအသီးသီးတို့သည် အသုံးပြုကာလ မကြာမီမှာပင် လမ်းနှုတ်ခမ်းသားများ ပဲ့ခြင်း၊ လမ်းမျက်နှာပြင်ပေါက်ခြင်းစသည့် ပျက်စီးခြင်းမျိုး မဖြစ်စေရန်အတွက် နိုင်ငံတကာ လမ်းခင်းသော နည်းပညာများဖြင့် အသုံးပြုဆောင်ရွက်ကြရန်နှင့် အရည်အသွေး ပြည့်မီစွာ လုပ်ဆောင်ကြရန် ပြည်ထောင်စုအဆင့်မှ ညွှန်ကြားထားခြင်း ရှိ မရှိ သိရှိလိုကြောင်း မေးမြန်းခဲ့သည်။

ဒုတိယ၀န်ကြီး ဦးကျော်လင်းက “ဆောက်လုပ်ရေးဝန်ကြီးဌာန လမ်းဦးစီးဌာနရဲ့ ညွှန်ကြားချက်အတိုင်း တည်ဆောက်ခြင်း၊ ထိန်းသိမ်းခြင်းတွေ ဆောင်ရွက်မည်ဆိုပါက သတ်မှတ်ကာလအတွင်း လမ်းပျက်စီးမှုနည်းပါးမှာဖြစ်ပါတယ်။ ကုမ္ပဏီတွေ သို့မဟုတ် ၀န် ထမ်းတွေရဲ့ ကိုယ်ကျိုးရှာမှုတွေကြောင့် အရည်အသွေးပြည့်မီစွာ ဆောင်ရွက်နိုင်ခြင်း မရှိဘဲ စာချုပ်ပါစည်းကမ်းချက်တွေကို ချိုးဖောက်ပြီး သတ်မှတ်ကာလအတွင်း ပျက်စီးခဲ့မယ်ဆိုပါက တည်ဆဲဥပဒေတွေနဲ့အညီ စိစစ် အရေးယူ ဆောင်ရွက်သွားမယ့်အပြင် တာဝန်ပျက်ကွက်တဲ့ ကုမ္ပဏီကို အမည်ပျက်စာရင်း  Black List တင်သွင်းတဲ့ အရေးယူမှုတွေကို လုပ်ထုံးလုပ်နည်းနဲ့အညီ ဆက်လက်ဆောင်ရွက်သွားမှာဖြစ်ပါတယ်” ဟု ပြောကြားသည်။

မြန်မာတစ်နိုင်ငံလုံးတွင်ရှိသည့် လမ်းများနှင့် ပတ်သက်ပြီး အဆင့်မြှင့်တင်ဆောင်ရွက်နိုင်ရန် စီမံချက်များချမှတ်ပြီး ဆောင်ရွက်လျက်ရှိကြောင်း၊ နည်းပညာအသစ်များကိုလည်း မြန်မာနိုင်ငံ၏ ရာသီဥတုနှင့်ကိုက်ညီမှု ရှိ မရှိ စိစစ် လေ့လာ ဆောင်ရွက်လျက်ရှိကြောင်း၊  အောက်ခံမြေလွှာအင်အား ညံ့သော နေရာများတွင် ဒေသထွက် လမ်းခင်းပစ္စည်းများကို အသုံးပြုရမည်ဆိုပါက သတ်မှတ်လမ်းလွှာ၏ အင်အားရရှိစေရန်အတွက် ဘိလပ်မြေ သို့မဟုတ် ထုံးဖြင့် အင်အားဖြည့်ပြီး လိုအပ် အင်အား ရရှိရန်အတွက် ဆောင်ရွက် ခြင်းများကို စမ်းသပ်လျက်ရှိကြောင်း၊ သံမဏိထုတ်သည့်နေရာမှထွက်သည့် By Product  ဖြစ်သည့် (Steel Slag) များဖြင့် လမ်းခင်းသည့်စနစ် နိုင်ငံအချို့တွင် အသုံးပြုနေသည့်အတွက် မြန်မာနိုင်ငံ အခြေအနေနှင့် ကိုက်ညီမှု ရှိ မရှိကို ကြိမ်ပင်ဆည်-ဇလွန်လမ်းပိုင်း တွင် စမ်းသပ်ဆောင်ရွက်ခဲ့ကြောင်း၊ ဖွံ့ဖြိုးဆဲနိုင်ငံများတွင် အသုံးပြုသည့် Con Aid ဓာတ်ဆေးရည်ဖျန်းပြီး လမ်းခင်းသည့်စနစ်အား စမ်းသပ်ခဲ့ပြီးဖြစ်ကြောင်း၊ ယင်းသို့ စမ်းသပ်ရာတွင် ကိုက်ညီမှုမရှိသည်ကို တွေ့ရသည့်အတွက် ထုတ်ပြန်ကြေညာခဲ့ကြောင်း၊ ဆောက်လုပ်ရေးဝန်ကြီးဌာနအပြင် ရန်ကုန်မြို့တော် စည်ပင်သာယာရေးကော်မတီမှလည်း စမ်းသပ်ခဲ့ပြီး ယင်းနည်းပညာဖြင့် စမ်းသပ်ထားမှုသည် မြန်မာနိုင်ငံနှင့် ကိုက်ညီမှု မရှိသည်ကို ထုတ်ပြန်ကြေညာခဲ့ကြောင်း ဒုတိယ၀န်ကြီးက ဆိုသည်။

May 17, 2018














Copy Protected by Chetan's WP-Copyprotect.