ထွန်တုံးတိုက်ပွဲပြုလုပ်မှုကြောင့် အလုပ်နှင့်ထောင်ဒဏ် ၁၆ လ ချမှတ်ခံထားရသည့် နောင်ချိုမြို့နယ် ဒေသခံတောင်သူ ၁၀ ဦး လွတ်မြောက်လာပြီး သိမ်းဆည်းယာမြေများ ပြန်လည်ရရှိရေး ဆက်လက်လုပ်ဆောင်မည်ဟုဆို

ထွန်တုံးတိုက်ပွဲပြုလုပ်မှုကြောင့် အလုပ်နှင့်ထောင်ဒဏ် ၁၆ လ ချမှတ်ခံထားရသည့် နောင်ချိုမြို့နယ် ဒေသခံတောင်သူ ၁၀ ဦး လွတ်မြောက်လာပြီး သိမ်းဆည်းယာမြေများ ပြန်လည်ရရှိရေး ဆက်လက်လုပ်ဆောင်မည်ဟုဆို
Published 18 May 2018

၂၀၁၇ ခုနှစ် ဧပြီလအတွင်းက ထောင်ဒဏ်ချမှတ်ခံခဲ့ရသည့် ဒေသခံတောင်သူများအား တွေ့ရစဉ်

ရှမ်းပြည်နယ်မြောက်ပိုင်း နောင်ချိုမြို့နယ်တွင် ကော်ဖီစီမံကိန်းအတွက် သိမ်းဆည်းထားသည့် ယာမြေများအတွင်း ဝင်ရောက်ထွန်ယက်ခဲ့မှုကြောင့် အလုပ်နှင့် ထောင်ဒဏ် ၁၆ လ ချမှတ်ခံထားရသည့် ဒေသခံတောင်သူ ၁၀ ဦး ပြန်လည်လွတ်မြောက်ခဲ့ပြီး သိမ်းဆည်းခံယာမြေများ ပြန်လည်ရရှိရေးအတွက် ဆက်လက်လုပ်ဆောင်သွားမည်ဖြစ်ကြောင်း တောင်သူများက ပြောကြားသည်။

ကော်ဖီစီမံကိန်းအတွက် သိမ်းဆည်းထားသည့် ယာမြေများအနက် စီမံကိန်းအတွက် အသုံးမပြုဘဲ လစ်လပ်လျက်ရှိသည့် ယာမြေများပေါ်တွင် ဒေသခံများက ထွန်ယက်စိုက်ပျိုးခြင်းများ ပြုလုပ်ထားပြီး သိမ်းဆည်းယာမြေများ ပြန်လည်ရရှိရေးအတွက် သက်ဆိုင်ရာ မြေယာစိစစ်ရေးကော်မတီများထံသို့ စာတင်ပြမှုများ ဆက်လက်လုပ်ဆောင်သွားမည်ဖြစ်ကြောင်း ဒေသခံတောင်သူများက ပြောကြားသည်။

“ကျွန်တော်တို့ တောင်သူတွေကတော့ လက်ရှိမှာ လစ်လပ်နေတဲ့နေရာတွေမှာ ကြံတို့၊ ပြောင်းတို့ စိုက်ထားပါတယ်။ သိမ်းဆည်းယာမြေတွေ တရားဝင်ပြန်ရချင်တယ်။ လယ်ယာမြေ လုပ်ပိုင်ခွင့်ရဖို့အတွက် မြေယာစိစစ်ရေးကော်မတီတွေကို စာတင်ပြသွားဖို့ရှိတယ်။ ကော်ဖီစီမံကိန်းဆိုပေမယ့် တကယ် စိုက်ပျိုးထားတာ မရှိသလောက်ပါပဲ။ စီမံကိန်းမလုပ်ဘဲ လစ်လပ်ပိုလျှံနေတဲ့ မြေယာတွေအများကြီးပါ။ ဒီယာမြေတွေဆိုတာက ကျွန်တော်တို့တောင်သူတွေ ဘိုးဘွားအစဉ်အဆက် လုပ်ကိုင်လာခဲ့ကြတဲ့ ယာမြေတွေပါ။ ဒါကို ကျူးကျော်ထွန်ယက်တယ်ဆိုပြီး ကျွန်တော်တို့ တောင်သူတွေကို တရားစွဲတယ်။ ထောင်ဒဏ်ချမှတ်ခံရတယ်။ တရားမျှတမှုကတော့ လုံးဝမရှိဘူး။ ထောင်ထဲမှာ တစ်နှစ်နီးပါးနေခဲ့ရတယ်။ သိမ်းဆည်းယာမြေတွေ ပြန်ရဖို့အတွက် ဆက်ပြီးတော့ လုပ်ဆောင်သွားမှာပါ” ဟု ထောင်ဒဏ်ချမှတ်ခံရပြီး ပြန်လည်လွတ်မြောက်လာသည့် တောင်သူ ဦးဖိုးယုံက ပြောကြားသည်။

ဖြစ်စဉ်မှာ နောင်ချိုမြို့နယ် နမ့်လင်းခန်းကျေးရွာမှ ဒေသခံတောင်သူများ၏ ယာမြေဧက ၃၆၀ ကျော်အား ၂၀၀၃ ခုနှစ်က လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနက ကော်ဖီစီမံကိန်းအတွက် သိမ်းဆည်းခဲ့ကြောင်း၊ ယင်းသို့ သိမ်းဆည်းသွားခဲ့သော်လည်း စီမံကိန်းအတွက် အမှန်တကယ် အကောင်ထည်ဖော် လုပ်ဆောင်မှုမှာ ဧကအနည်းငယ်သာ ဖော်ဆောင်ခဲ့ပြီး ကျန်ယာမြေများမှာ ပလပ်မြေအဖြစ် ကျန်ရှိခဲ့ကြောင်း၊ ယင်းသို့ လစ်လပ်လျက်ရှိသည့် ယာမြေများအား ဒေသခံတောင်သူများက ၂၀၁၄ ခုနှစ် နိုဝင်ဘာက ဝင်ရောက်၍ သိမ်းဆည်းယာမြေများ ပြန်လည်ရရှိရေးအတွက် ထွန်တုံးတိုက်ပွဲပြုလုပ်ကာ ထွန်ယက်စိုက်ပျိုးခဲ့ကြကြောင်း မြေယာအခင်းဖြစ်စဉ် မှတ်တမ်းများအရ သိရသည်။ ထို့ပြင် ဒေသခံတောင်သူများ၏ ယာမြေများအား စတင်သိမ်းဆည်းသွားစဉ် အချိန်က မြေယာလျော်ကြေး၊ သီးနှံလျော်ကြေး တစ်စုံတစ်ရာပေးလျော်ခဲ့ခြင်း မရှိခဲ့ကြောင်း ဒေသခံတောင်သူများက ဆိုသည်။

ထိုသို့ ကော်ဖီစီမံကိန်းအတွင်း ဝင်ရောက်ထွန်ယက်ခဲ့မှုနှင့် ပတ်သက်၍ နမ့်လင်းခန်း ကျေးရွာအုပ်ချုပ်ရေးမှူး အပါအဝင် ဒေသခံတောင်သူ ၁၀ ဦးအား ကော်ဖီစီမံကိန်းအတွင်း ဝင်ရောက်၍ ထွန်တုံးတိုက်ပွဲ ပြုလုပ်ခဲ့သည်ဟုဆိုကာ ပြစ်မှုဆိုင်ရာ ဥပဒေပုဒ်မ ၄၄၇၊ ၄၂၇၊ ၂၉၄၊ ၅၀၆ တို့ဖြင့် စီမံကိန်းတာဝန်ခံ ဦးစိုးသိန်းက အဆိုပါ ၂၀၁၄ ခုနှစ် ဒီဇင်ဘာ၌ တရားလိုပြုလုပ်ကာ အသီးသီးအမှုဖွင့်ခဲ့ကြောင်း၊ ထိုသို့အမှုဖွင့်ခံရပြီး တစ်နှစ်ကျော် အချိန်ကာလအတွင်း ဒေသခံတောင်သူများမှာ ရုံးချိန်းအကြိမ်ရေ ၅၀ ကျော်ဖြင့် အမှုရင်ဆိုင်ခဲ့ရပြီးနောက် ၂၀၁၇ ခုနှစ် ဧပြီ ၂၄ ရက်တွင် နောင်ချိုမြို့နယ် တရားရုံးက ဒေသခံတောင်သူ ၁၀ ဦးအား အလုပ်နှင့်ထောင်ဒဏ် ၁၆ လ ကျခံစေရန် အမိန့်ချမှတ်ခဲ့ကြောင်း သိရသည်။

Most Read

Most Recent