အနည်းဆုံးအခကြေးငွေ ကျပ် ၄၈၀၀ ရရှိပြီးနောက် အလုပ်သမားများ၏ အခြားခံစားခွင့်များကို အလုပ်ရှင်များက ဖြတ်တောက်ခြင်းများရှိပါက အလုပ်သမားအဖွဲ့အစည်းများက ကူညီဆောင်ရွက်ပေးမည် ဖြစ်ကြောင်း သိရသည်။
အနည်းဆုံးအခကြေးငွေ သတ်မှတ်ရေးဆိုင်ရာ အမျိုးသားကော်မတီသည် ၂၀၁၈ ခုနှစ် မေ ၁၄ ရက်တွင် မြန်မာနိုင်ငံရှိ အလုပ်သမားများအတွက် နေရာဒေသနှင့် လုပ်ငန်းအမျိုးအစားမခွဲခြားဘဲ တစ်နိုင်ငံလုံး တစ်ပြေးညီ တစ်နာရီလျှင် ကျပ် ၆၀၀ နှုန်းဖြင့် အလုပ်ချိန်ရှစ်နာရီ (တစ်ရက်) ကျပ် ၄၈၀၀ ကို ပြည်ထောင်စုအစိုးရအဖွဲ့၏ အတည်ပြုချက်ဖြင့် အမိန့်ကြေညာချက် ထုတ်ပြန်ခဲ့သည်။ ယင်းကြေငြာချက်အရ စက်ရုံ၊ အလုပ်ရုံများရှိ အလုပ်သမားများ မေ ၁၄ ရက်မှစတင်ကာ အနည်းဆုံးအခကြေးငွေ ကျပ် ၄၈၀၀ ကို ရရှိမည် ဖြစ်သည်။
၂၀၁၅ ခုနှစ်တွင် အနည်းဆုံးအခကြေးငွေ ကျပ် ၃၆၀၀ သတ်မှတ်ပြီးနောက် အချို့သောစက်ရုံ၊ အလုပ်ရုံများသည် အနည်းဆုံး အခကြေးငွေနှုန်း ပေးချေသော်လည်း အလုပ်သမားများ၏ အခြားသောခံစားခွင့်များကို ဖြတ်တောက်ခြင်းများကြောင့် အလုပ်သမား ဆန္ဒပြပွဲများ ဖြစ်ပွားခဲ့သည်။ လက်ရှိအနည်း ဆုံးအခကြေးငွေ ကျပ် ၄၈၀၀ သတ်မှတ်ပြီး နောက်ယင်းကဲ့သို့ အလုပ်သမားများ၏ အခြားခံစားခွင့်များ ဖြတ်တောက်မှုများရှိလာပါက အလုပ်သမားအဖွဲ့အစည်းများက ကူညီဆောင်ရွက်ပေးမည်ဖြစ်ကြောင်း သိရသည်။
“ပထမအချက်က ၄၈၀၀ ရဖို့ လုပ်ရမယ်။ နောက်တစ်ချက်က ၄၈၀၀ ရပြီး အခြား ခံစားခွင့်တွေမဖြုတ်ဖို့က ကျွန်မတို့က အလုပ်သမားတွေကို ပညာပေးတွေလုပ်ဖို့ လိုတယ်။ သူတို့လည်း နားလည်ဖို့လိုတယ်။ အနည်းဆုံး အခကြေးငွေဥပဒေမှာက အလုပ်သမားတွေရဲ့ အခွင့်အရေးမှာ အလုပ်သမားသည် အနည်းဆုံး အခကြေးငွေကိုသော်လည်းကောင်း၊ အလုပ်ရှင်က ပို၍ပေးသော အခြားသော ခံစားခွင့်များကိုသော်လည်းကောင်း ရခွင့်ရှိတယ်လို့ ပုဒ်မ ၁၄(က)မှာ အတိအကျပါတယ်။ အခုဖြစ်နေတာက အကုန်လုံးပေါင်းပေးလိုက်မယ်။ ကျန်တာမပေးတော့ဘူးဆိုတာမျိုးတွေက လုံးဝမှားနေတယ်” ဟု မြန်မာနိုင်ငံလုံးဆိုင်ရာ အလုပ်သမားသမဂ္ဂများအဖွဲ့ချုပ် (CTUM) ၏ ဗဟိုအလုပ်မှုဆောင်အဖွဲ့ဝင် မခိုင်ဇာအောင်က ပြောကြားသည်။
