<

လာမည့်သုံးနှစ်အတွင်း လျှပ်စစ်ဓာတ်အား မဂ္ဂါဝပ် ၃၀၀၀ ထပ်မံတိုးမြှင့်ထုတ်လုပ်မည်

ရန်ကုန်မြို့ မြို့နယ်တစ်ခုတွင် လျှပ်စစ်ဓာတ်အားလိုင်း ပြင်ဆင်ဆောင်ရွက်နေစဉ် (ဓာတ်ပုံ-အောင်မျိုးသန့်)

လာမည့် သုံးနှစ်အတွင်း လျှပ်စစ်ဓာတ်အား မဂ္ဂါဝပ် ၃၀၀၀ ထပ်မံတိုးမြှင့်ထုတ်လုပ်မည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာန အမြဲတမ်းအတွင်းဝန် ဦးတင်မောင်ဦးက ပြောကြားသည်။

မေ ၁၅ ရက်က ပြန်ကြားရေးဝန်ကြီးဌာနတွင် ပြုလုပ်သည့် ၀န်ကြီးဌာန၏ ဒုတိယတစ်နှစ်တာကာလအတွင်း ဆောင်ရွက်နေမှုများနှင့်ပတ်သက်ပြီး ရှင်းလင်းစဉ် ပြောကြားခဲ့ခြင်း ဖြစ်သည်။

၂၀၁၅-၂၀၁၆ ခုနှစ်တွင် စက်ရုံအရေအတွက် ၄၆ ရုံ (တပ်ဆင်အင်အား ၄၉၅၄ မဂ္ဂါဝပ်)၊ ၂၀၁၇-၂၀၁၈ ဘဏ္ဍာနှစ်တွင် ဓာတ်အားပေးစက်ရုံ ၅၂ ရုံ တိုးတက်လာပြီး စက်တပ်ဆင် အင်အား ၅၇၀၄ မဂ္ဂါဝပ်အထိ တပ်ဆင်နိုင်ခဲ့ကြောင်း၊ သဘာဝဓာတ်ငွေ့စက်ရုံ ငါးရုံ၊ ရေအားလျှပ်စစ်စက်ရုံတစ်ရုံ စုစုပေါင်း ခြောက်ရုံမှ မဂ္ဂါဝပ် ၇၅၀ ခန့် ထုတ်လုပ်နိုင်ခဲ့ကြောင်း သိရသည်။

ယင်းသို့ထုတ်လုပ်ရန်အတွက် တနင်္သာရီတိုင်းဒေသကြီးတွင် ပြင်သစ်နိုင်ငံ တိုတယ်ကုမ္ပဏီနှင့် ဂျာမနီနိုင်ငံ SIEMENSA .G ကုမ္ပဏီတို့၏ ရင်းနှီးမြှုပ်နှံမှုဖြင့် မဂ္ဂါဝပ် ၁၂၃၀  ထုတ်လုပ်မည့် LNG to Power စီမံကိန်း၊ တရုတ်ပြည်သူ့သမ္မတနိုင်ငံ Zhefu Holding Group Co.,Ltd နှင့်မြန်မာနိုင်ငံ Supreme Trading Co,Ltd တို့၏ ရင်းနှီးမြှုပ်နှံမှုဖြင့် ဧရာဝတီတိုင်းဒေသကြီး မီးလောင်ဂျိုင်ဒေသတွင် မဂ္ဂါဝပ် ၁၃၉၀ LNG to Power စီမံကိန်း၊ ထိုင်းနိုင်ငံ TTC L Public Company Limited ကုမ္ပဏီ၏ ရင်းနှီးမြှုပ်နှံမှုဖြင့် ဆောင်ရွက်မည့် ရန်ကုန်တိုင်းဒေသကြီး အလုံတွင် ၃၅၆ မဂ္ဂါဝပ် LNG to Power စီမံကိန်း၊ ရခိုင်ပြည်နယ် ကျောက်ဖြူတွင် တရုတ်ပြည်သူ့သမ္မတနိုင်ငံ Sinohydro Corporation Limited နှင့် မြန်မာနိုင်ငံ Supreme Trading Co.Ltd တို့၏ ရင်းနှီးမြှုပ်နှံမှုဖြင့် ဆောင်ရွက်မည့် ၁၃၅ မဂ္ဂါဝပ် CCGT စီမံကိန်းများဖြစ်ကြောင်း  အမြဲတမ်းအတွင်းဝန်က ပြောကြားသည်။

နိုင်ငံ၏ လူမှုစီးပွားရေးနှင့် စက်မှုလုပ်ငန်း ဖွံ့ဖြိုးတိုးတက်ရန်အတွက် ကာလလတ်တစ်ခုအတွင်း LNG အား နိုင်ငံခြားမှတင်သွင်း၍ လျှပ်စစ်ဓာတ်အားထုတ်လုပ်နိုင်ရေး စီမံကိန်း စတင်အကောင်အထည်ဖော် ဆောင်ရွက်နိုင်ရန် ပဏာမလုပ်ငန်းများဖြစ်သည့် လုပ်ငန်းစီမံချက်များ၊ ကြိုတင်လေ့လာမှုများ၊ ဒီဇိုင်းထုတ်လုပ်ခြင်းများနှင့် အကြိုအင်ဂျင်နီယာ လုပ်ငန်းများကို စတင်ဆောင်ရွက်နိုင်ရန် ပြည်ထောင်စုအစိုးရအဖွဲ့၏ ခွင့်ပြုချက်ဖြင့် ကုမ္ပဏီများသို့ လက်မှတ်ရေးထိုးပေးအပ်ခဲ့ကြောင်း၊ ဓာတ်အားဝယ်ယူရေးသဘောတူ စာချုပ်ထုတ်ပေးထားသည့် ကုမ္ပဏီများသို့ Power Purchase Agreement မူကြမ်းများ ပေးပို့ထားကြောင်း ဦးတင်မောင်ဦးက ဆိုသည်။

ယခင်က လျှပ်စစ်ထုတ်လုပ်မှုနှင့်သုံးစွဲမှုသည် မမျှကြောင်း၊ ယခုတင်ပြချက်အတိုင်း ထုတ်လုပ်နိုင်မည်ဆိုပါက ၂၀၂၂ ခုနှစ်တွင် မဂ္ဂါဝပ် ၁၉၀၀ ခန့်အား Result အနေဖြင့် ရရှိမည်ဖြစ်ကြောင်း၊ လာမည့်သုံးနှစ်အတွင်း မဂ္ဂါဝပ် ၃၀၀၀ တိုးတက်ထုတ်လုပ်မည်ဆိုသည်ကို နိုင်ငံတော်သမ္မတကြီးကလည်း ပြောကြားခဲ့ကြောင်း၊ ထိုအတွက် ကန်ပေါက်တွင် LNG မှ လျှပ်စစ်ထုတ်လုပ်မည့် စီမံကိန်းအပြင် အခြားစီမံကိန်းများရှိကြောင်း အမြဲတမ်းအတွင်းဝန်က ပြောကြားသည်။

ထို့ပြင် လက်ရှိသုံးစွဲနေသည့် ၂၃၀ ကေဗွီလိုင်းများအပြင် ၅၀၀ ကေဗွီလိုင်းများအား သုံးနှစ်အတွင်း တိုးချဲ့တည်ဆောက်၍ လျှပ်စစ်ဓာတ်အားဖြန့်ဖြူးပေးရန် တည်ဆောက်လျက်ရှိကြောင်း၊ ၅၀၀ ကေဗွီ ကံကောင်း (မိတ္ထီလာ)-စပါး ကြွယ် (တောင်ငူ) ဓာတ်အား လိုင်း ၁၄၆ မိုင်တည်ဆောက်ခြင်း စီမံကိန်းနှင့် ဓာတ်အားခွဲရုံ တည်ဆောက်ခြင်းစီမံကိန်း၊ ၅၀၀ ကေဗွီ စပါးကြွယ်(တောင်ငူ)-ဘုရားကြီး ဓာတ်အားလိုင်း ၁၁၇ မိုင် တည်ဆောက်ခြင်း စီမံကိန်း၊ ၅၀၀ ကေဗွီ ဘုရားကြီး-လှိုင်သာယာ ဓာတ်အားလိုင်း မိုင် ၆၀ နှင့် ဘုရားကြီး-လှိုင်သာယာ ဓာတ်အားခွဲရုံ စီမံကိန်းများ အကောင်အထည်ဖော်တည်ဆောက်မည်ဖြစ်ကြောင်း လျှပ်စစ်နှင့်စွမ်းအင်ဝန်ကြီးဌာန အမြဲတမ်း အတွင်းဝန်က ပြောကြားသည်။

May 15, 2018














Copy Protected by Chetan's WP-Copyprotect.