မူလဥပဒေကို အတည်ပြုပြဋ္ဌာန်း ထုတ်ပြန်ပြီးပါက နည်းဥပဒေကို အချိန်နှင့် တစ်ပြေးညီ ရေးဆွဲထုတ်ပြန် ကျင့်သုံးပေးရန် ပြည်ထောင်စုအဆင့်အဖွဲ့အစည်းများသို့ တိုက်တွန်းကြောင်းအဆိုကို ပြည်သူ့လွှတ်တော်သို့ တင်သွင်းခဲ့ကြောင်း သိရသည်။
နေပြည်တော်၌ မေ ၁၅ ရက်က ပြုလုပ်သည့် ပြည်သူ့လွှတ်တော် အဋ္ဌမပုံမှန်အစည်းအဝေး ဒုတိယနေ့တွင် ဝေါမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးတင်ထွေးက ပြည်ထောင်စုလွှတ်တော်မှ ပြဋ္ဌာန်းပြီး နိုင်ငံတော်သမ္မတက လက်မှတ်ရေးထိုး ထုတ်ပြန်ပြီးသည့် မူလဥပဒေများနှင့် ပတ်သက်ပြီး နိုင်ငံတော်နှင့် နိုင်ငံသားများ၏ အကျိုးအတွက် အကောင်အထည်ဖော် ကျင့်သုံးကြရမည့် ပြည်ထောင်စုအဆင့် အဖွဲ့အစည်းများမှ တစ်ဆင့်ခံ ဥပဒေဖြစ်သည့် နည်းဥပဒေကို အချိန်နှင့်တစ်ပြေးညီ ရေးဆွဲထုတ်ပြန် ကျင့်သုံးပေးပါရန် သက်ဆိုင်ရာ ပြည်ထောင်စုအဆင့် အဖွဲ့အစည်းများသို့ တိုက်တွန်းကြောင်း အဆိုကို တင်သွင်းခဲ့ခြင်း ဖြစ်သည်။
“ဥပဒေပြုလွှတ်တော်အနေနဲ့ မူရင်း ဥပဒေတစ်ရပ်ကို ရေးဆွဲပြဋ္ဌာန်းရာမှာ တိုင်းပြည်နဲ့ ပြည်သူလူထုအကျိုးကို ရှေးရူပြီး နိုင်ငံတော်မှ ကျင့်သုံးနေတဲ့ မူဝါဒကို အခြေပြု ရေးဆွဲခြင်း ဖြစ်ပါတယ်။ မူရင်းဥပဒေရည်ရွယ်ချက် အောင်မြင်ဖို့ဆိုတာ တစ်ဆင့်ခံ ဥပဒေဖြစ်တဲ့ နည်းဥပဒေတွေကို မလွဲမသွေ ရေးဆွဲကျင့်သုံးရမှာ ဖြစ်ပါတယ်။ ရေးဆွဲရာမှာလည်း မူရင်းဥပဒေကို ကျော်လွန်ခြင်း ဆန့်ကျင်ကွဲလွဲခြင်းတွေ မရှိအောင် မူရင်းဥပဒေရေးဆွဲ ပြဋ္ဌာန်းပြီးတာနဲ့ အချိန်နဲ့ တစ်ပြေးညီ အမြန်ဆုံး ရေးဆွဲပြဋ္ဌာန်း အကောင်အထည်ဖော်ဖို့ လိုပါတယ်။ ဒါမှသာ လက်တွေ့နယ်ပယ်မှာ ကျင့်သုံးတဲ့အခါ အချို့သော နည်းဥပဒေတွေဟာ မူရင်းဥပဒေထက်ပင် နိုင်ငံတော်နဲ့ နိုင်ငံသားတွေအပေါ် အကျိုးသက်ရောက်မှု ရှိတာကို တွေ့ရပါတယ်။ ဒါကြောင့် မူရင်းဥပဒေတွေ အာဏာတည်သက်ရောက်မှုရှိဖို့ နည်းဥပဒေတွေအပေါ်မှာ များစွာတည်မှီနေတာ ဖြစ်တဲ့အတွက် မူရင်းဥပဒေတစ်ရပ်ရဲ့ လိုအပ်တဲ့ တစ်ဆင့်ခံ နည်းဥပဒေတွေကို အချိန်နဲ့ တစ်ပြေးညီ ရေးဆွဲပြဋ္ဌာန်းဖို့ လိုပါတယ်” ဟု အဆိုရှင် ပြည်သူ့လွှတ်တော်ကိုယ်စားလှယ် ဦးတင်ထွေးက ပြောကြားသည်။
ထို့ပြင် တိုက်ရိုက်ဖြစ်သည့် မူရင်းဥပဒေတိုင်းအတွက် တစ်ဆင့်ခံ ဥပဒေဖြစ်သည့် နည်းဥပဒေကို ရေးဆွဲပြဋ္ဌာန်းရန် လိုအပ်မည် မဟုတ်ဘဲ တချို့သော မူရင်းဥပဒေများသည် စည်းမျဉ်း၊ စည်းကမ်း၊ အမိန့်ကြော်စာ၊ အမိန့်၊ ညွှန်ကြားချက်နှင့် လုပ်ထုံးလုပ်နည်းများ ထုတ်ပြန်ကျင့်သုံးရုံးဖြင့် မူရင်းဥပဒေအသက် ဝင်ပြီး လက်တွေ့နယ်ပယ်တွင် အကောင်းဆုံးအကောင်ထည်ဖော်နိုင်သည်ကို တွေ့ရကြောင်းနှင့် အချို့သော မူရင်းဥပဒေများသည် နည်းဥပဒေကို ရေးဆွဲပြဋ္ဌာန်းကျင့်သုံးမှသာလျှင် မူရင်းဥပဒေအသက်ဝင်ပြီး မူလရေးဆွဲ ပြဋ္ဌာန်းထားစဉ်က ရည်ရွယ်ချက်များအတိုင်း အောင်မြင်သည်ကို တွေ့ရကြောင်း ဦးတင်ထွေးက ပြောကြားသည်။
၂၀၀၈ ဖွဲ့စည်းပုံ အခြေခံဥပဒေအရ နိုင်ငံတော်၏ အချုပ်အခြာအာဏာ သုံးရပ်တွင် ဥပဒေပြုရေးအာဏာကို လွှတ်တော်များသို့ အပ်နှင်းထားသောကြောင့် လွှတ်တော်များက တိုက်ရိုက်ဥပဒေဖြစ်သည့် မူရင်းဥပဒေများကို ရေးဆွဲပြီး နိုင်ငံတော်သမ္မတမှ လက်မှတ်ရေးထိုး အတည်ပြုကာ သက်ဆိုင်ရာ ပြည်ထောင်စုအဆင့် အဖွဲ့အစည်းများက လက်တွေ့အကောင်အထည်ဖော် ကျင့်သုံးရခြင်း ဖြစ်သည်။ မူရင်းဥပဒေကို ကျင့်သုံးရာတွင် နိုင်ငံတော်နှင့် နိုင်ငံသားများအပေါ် ထိရောက်စွာ အကျိုးသက်ရောက်မှု ရှိစေရန်အတွက် လက်တွေ့ကျင့်သုံးရမည့် ဝန်ကြီးဌာနများ၊ ပြည်ထောင်စုအဆင့် အဖွဲ့အစည်းများအနေဖြင့် မည်သို့မည်ပုံ လိုက်နာကျင့်သုံးရမည်ကို တိကျရှင်းလင်းစွာ ရေးဆွဲထားသည့် တစ်ဆင့်ခံဥပဒေဖြစ်သည့် နည်းဥပဒေကို အချိန်နဲ့ တစ်ပြေးညီ ရေးဆွဲပြီး ပြည်ထောင် စုအစိုးရအဖွဲ့၏ အတည်ပြုချက်ဖြင့် မူလပြဋ္ဌာန်းဥပဒေများကို လက်တွေ့အကောင်အထည်ဖော်ကြရခြင်းဖြစ်ကြောင်း အဆိုရှင်က ပြောကြားသည်။
ဆက်လက်ပြီး မြန်မာနိုင်ငံတွင် ပထမအကြိမ် လွှတ်တော်သက်တမ်းမှ လက်ရှိဒုတိယအကြိမ် လွှတ်တော်သက်တမ်းအထိ မူရင်း ဥပဒေ ၅၉ ခုကို လက်တွေ့အကောင်အထည်ဖော် ကျင့်သုံးရမည့် တစ်ဆင့်ခံ ဥပဒေများဖြစ်သည့် နည်းဥပဒေအား ရေးဆွဲပြဋ္ဌာန်းထားခြင်း မရှိသေးကြောင်းနှင့် ဖွဲ့စည်းပုံအခြေခံ ဥပဒေအရတိုင်း၊ ပြည်နယ်နှင့် ကိုယ်ပိုင်အုပ်ချုပ်ခွင့်ရ ဒေသများကို မူရင်းဥပဒေများ ရေးဆွဲပြဋ္ဌာန်းခွင့် ပြုထားရာ မူရင်းဥပဒေ၏ တစ်ဆင့်ခံ နည်းဥပဒေအား သက်ဆိုင်ရာ အဖွဲ့အစည်းများက ရေးဆွဲပြဋ္ဌာန်းကျင့်သုံးမှုအား နည်းသည့်အတွက် မူလဥပဒေများ၏ ရည်ရွယ်ချက်များ သက်ဝင်မှုမရှိကြောင်း သိရှိရသည်ဟု ဝေါမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးတင်ထွေးက ပြောကြားသည်။
“တချို့နိုင်ငံတွေမှာ မူရင်းဥပဒေ ရေးဆွဲချိန်ကတည်းက နည်းဥပဒေတွေကို ရေးဆွဲပြီး မူရင်းဥပဒေ အတည်ပြုပြဋ္ဌာန်းချိန်မှာ တစ်ဆက်တည်းဆိုသလို ရှေ့ဆင့်နောက်ဆင့် နည်းဥပဒေတွေ ထွက်ပေါ်ကျင့်သုံးလာနိုင်တာကို တွေ့ရပါတယ်။ ဒါကြောင့်လည်း မူရင်းဥပဒေရဲ့ ပြဋ္ဌာန်းရခြင်း ရည်ရွယ်ချက်အတိုင်း နိုင်ငံတော်နဲ့ နိုင်ငံသားတို့က ဥပဒေရဲ့ ကောင်းကျိုးတရားကို ခံစားကြရတာ တွေ့ရပါတယ်။ ဒါကြောင့် ကျွန်တော်တို့ နိုင်ငံအနေနဲ့ ဥပဒေပြုလွှတ်တော်တွေက မူရင်းဥပဒေတွေကို ရေးဆွဲပြဋ္ဌာန်းကတည်းက ကျင့်သုံးကြရမယ့် ပြည်ထောင်စုအဆင့် အဖွဲ့အစည်းတွေအနေနဲ့ တစ်ဆင့်ခံဥပဒေတွေကို ရေးဆွဲဖို့ လိုအပ်နေပြီ” ဟု ၎င်းက ပြောကြားသည်။
အဆိုပါ မူလဥပဒေကို အတည်ပြု ပြဋ္ဌာန်းထုတ်ပြန်ပြီးပါက နည်းဥပဒေကို အချိန်နှင့် တစ်ပြေးညီ ရေးဆွဲထုတ်ပြန် ကျင့်သုံးပေးရန် ပြည်ထောင်စုအဆင့်အဖွဲ့အစည်းများသို့ တိုက်တွန်းကြောင်း အဆိုကို လက်ခံဆွေး နွေးရန်အတွက် ပြည်သူ့လွှတ်တော်၏ အဆုံးအဖြတ် ရယူရာတွင် လက်ခံဆွေးနွေးရန် သဘောတူညီခဲ့သည်။