မေ ၁၄ ရက်က ပြုလုပ်သည့် ရန်ကုန်တိုင်းဒေသကြီး လွှတ်တော်အစည်းအဝေး မစတင်မီ တွေ့ရစဉ် (ဓာတ်ပုံ-ပြည့်ဖြိုးအောင်)
ပြည်သူရွေးချယ်ထားသည့် အစိုးရခေတ်တွင် စနစ်မကျ၊ မအောင်မြင်သော စီမံကိန်း များကို စိတ်လော၍ အကောင်အထည် မဖော်လိုစေချင်ကြောင်း ကျောက်တံတားမြို့နယ်၊ မဲဆန္ဒနယ်အမှတ်(၁)၊ တိုင်းဒေသကြီး လွှတ်တော်ကိုယ်စားလှယ် ဒေါ်ကြည်ပြာက ပြောကြားသည်။
မေ ၁၄ ရက်က ပြုလုပ်သည့် ဒုတိယအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန် အစည်းအဝေး (၂၆ ရက်မြောက်နေ့) တွင် ရန်ကုန်တိုင်းဒေသကြီးအတွင်း ပြည်တွင်း/ပြည်ပ ရင်းနှီးမြှုပ်နံှမှုဖြင့် မြို့ပြဖွံ့ဖြိုးရေးဆိုင်ရာ လုပ်ငန်းစီမံကိန်း အစီရင်ခံစာ (၂၀၁၈-၂၀၂၁) နှင့်ပတ်သက်၍ ဆွေးနွေးရာတွင် လွှတ်တော်ကိုယ်စားလှယ် ဒေါ်ကြည်ပြာက ယင်းကဲ့သို့ ထည့်သွင်းပြောကြား ခဲ့ခြင်းဖြစ်သည်။
“ယခင့်ယခင် အစိုးရတွေ လက်ထက်တွေမှာလည်း မအောင်မြင်တဲ့ စီမံကိန်းတွေ၊ Infrastructure မပြည့်စုံတဲ့ မြို့သစ်တွေကို ထင်သလို လုပ်ခဲ့ဖူးတဲ့ သာဓကတွေ ရှိပါတယ်။ ဒါကြောင့် ပြည်သူရွေးချယ်ထားတဲ့ အစိုးရ ခေတ်မှာတော့ စနစ်မကျတဲ့၊ မအောင်မြင်တဲ့ စီမံကိန်းတွေကို စိတ်လောပြီး အကောင်အထည် ဖော်တာမျိုး မဖြစ်စေချင်လို့ ဆွေးနွေးတာ ဖြစ်ပါတယ်” ဟု တိုင်းဒေသကြီးလွှတ်တော် ကိုယ်စားလှယ် ဒေါ်ကြည်ပြာက ပြောကြားသည်။
ထို့ပြင် ယခုတင်ပြထားသည့် အစီရင်ခံစာပါ စီမံကိန်းများတွင် Physical Study Result၊ Business Model၊ Operation Model မပါဝင်သေးသဖြင့် စီမံကိန်းများမှ ပြည်သူများနှင့် နိုင်ငံတော်အတွက် အကျိုးရှိမရှိ လွှတ်တော်အနေဖြင့် စဉ်းစားသုံးသပ်ပြီး အတည်ပြုပေးရန် အခက်အခဲရှိကြောင်း ၎င်းကဆက်လက် ပြောကြားသည်။
“စီမံကိန်းတစ်ခု အကောင်အထည်ဖော်ပြီ ဆိုတာနဲ့ တာဝန်ရှိသူတွေရဲ့ လုပ်အားတွေ၊ အချိန်တွေ အများကြီး ရင်းနှီးလိုက်ရပါတယ်။ အရေးကြီးဆုံးကတော့ အစိုးရအဖွဲ့ရဲ့ ဂုဏ်သိက္ခာ ရင်းနှီးရပါတယ်။ ဆိုလိုတာက စီမံကိန်းတစ်ခု မအောင်မြင်ဘူး။ စီမံခန့်ခွဲမှု လွဲသွားမယ် ဆိုရင်တော့ ပြည်သူက တာဝန်ရှိသူ အစိုးရကိုပဲ ပြစ်တင်ဝေဖန်မှာပါ။ အဲဒီမှာ အတည်ပြုပေးခဲ့တဲ့ လွှတ်တော်လည်း ပါမှာပါ။ စီမံခန့်ခွဲမှု လွဲသွားရင် ပြည်သူတွေအတွက် နစ်နာသလို အစိုးရအပေါ်ကိုလည်း အယုံအကြည် မဲ့သွားနိုင်ပါတယ်။ ဒါကိုတော့ အလေးအနက် စဉ်းစားပေးလိုပါတယ်” ဟု ဒေါ်ကြည်ပြာက ပြောကြားသည်။
အစီရင်ခံစာပါ စီမံကိန်းများနှင့် ပတ်သက်၍ ဆွေးနွေးရာတွင် စီမံကိန်း အဆိုပြုပုံ ကိစ္စများတွင် စီမံကိန်းတစ်ခုချင်း၏ နောက်ခံအကြောင်းရင်း၊ စီမံကိန်းဆိုင်ရာ အချက်အလက်၊ ဖွံ့ဖြိုးမှု ရည်မှန်းချက်နှင့် စီမံကိန်းအကြို ဆောင်ရွက်မှု အခြေအနေဆိုပြီး တင်ပြထားသော်လည်း စီမံကိန်းဆိုင်ရာ အချက်အလက်များတွင် စီမံကိန်းဆိုင်ရာ အဆိုပြုပုံစံများ မပါဝင်ကြောင်း၊ စီမံကိန်းအကြို ဆောင်ရွက်ခြင်းတွင် အိတ်ဖွင့်တင်ဒါ ခေါ်ယူ၍ တည်ဆောက်ခြင်း ပါဝင်သည့်အတွက် တင်ဒါခေါ်၍ တည်ဆောက်ထားပြီးသလား ဆိုသည်ကို မရှင်းလင်းကြောင်း စသည်တို့ကို ဒေါ်ကြည်ပြာက ဆွေးနွေးခဲ့သည်။
ထို့ပြင် ပြည်သူဘဝမြှင့်တင်ရေး မြို့သစ်စီမံကိန်း (Proect X) ဧက၂၄၀၀ရှိသည့် စီမံကိန်းကို လွှတ်တော်တွင် မဆွေးနွေးခင် အချိန်ကတည်းက မလေးရှားကုမ္ပဏီ တစ်ခုနှင့် MoU ထိုးပြီးသား ဖြစ်သည့်အတွက် ပွင့်လင်းမြင်သာစွာဖြင့် ရင်းနှီးမြုပ်နှံမှုများ ဖိတ်ခေါ်မှုပုံစံမျိုးများ မရှိသလိုဖြစ်ကြောင်း၊ လွှတ်တော်၏ သဘောတူညီချက် မရရှိဘဲ MoU ထိုးသည့်ကိစ္စမှာ အခြေခံဥပဒေပုဒ်မ ၂၅၁ နဲ့ လွဲချော်နေသလား ပြန်လည် စိစစ်လိုကြောင်း ဒေါ်ကြည်ပြာက ပြောကြားခဲ့သည်။
အလားတူ ရန်ကုန်တိုင်းဒေသကြီးအတွင်း ပြည်တွင်း/ပြည်ပ ရင်းနှီးမြှုပ်နံှမှုဖြင့် မြို့ပြဖွံဖြိုးရေးဆိုင်ရာ လုပ်ငန်းစီမံကိန်း အစီရင်ခံစာ (၂၀၁၈-၂၀၂၁) နှင့်ပတ်သက်၍ မရမ်းကုန်းမြို့နယ်၊ မဲဆန္ဒနယ် အမှတ် (၁)၊ တိုင်းဒေသကြီး လွှတ်တော်ကိုယ်စားလှယ် ဒေါ်မိုးမိုးစုကြည်က ဆွေးနွေးရာတွင် မရမ်းကုန်း ဗီလာစီးပွားရေးနှင့် ဘက်စုံဖွံ့ဖြိုးရေး စီမံကိန်း (၈) ဧကတွင် ရေစုကန်သုံးကန် ပါဝင်နေသဖြင့် စီမံကိန်းကို ကန့်ကွက်ကြောင်းနှင့် ပါရမီ အဆင့်မြင့်စီးပွားရေးနှင့် ဘက်စုံဖွံ့ဖြိုးရေးစီမံကိန်း နှစ်ဧကသည် ပါရမီအားကစားကွင်းဖြစ်၍ မဲဆန္ဒရှင်များက အားကစားကွင်း အဖြစ်သာ ရှိစေချင်သည့်အတွက် စီမံကိန်းအား ကန့်ကွက်ကြောင်း ဆွေးနွေးခဲ့သည်။
ထို့နောက် သင်္ဃန်းကျွန်းမြို့နယ်၊ မဲဆန္ဒနယ် အမှတ် (၁) ဦးနေမျိုးကျော် (ခ) ဦးနေဘုန်းလတ်က လွှတ်တော်၏ အခန်းကဏ္ဍတွင် စီမံကိန်းများနှင့် ပတ်သက်ပြီး ဖြစ်သင့် မဖြစ်သင့်၊ လုပ်သင့် မလုပ်သင့် လွှတ်တော်ကိုယ်စားလှယ်များက ပြည်သူ့အသံကို ဝိုင်းဝန်းဆွေးနွေးခြင်း ဖြစ်ကြောင်းနှင့် နောက်နောင်စီမံကိန်းများတွင် ပြည်သူများ၏ဆန္ဒ၊ လွှတ်တော်ကိုယ်စားလှယ်များ၏ ပြောကြားချက်၊ မေးခွန်းများ၊ ကန့်ကွက်မှုများကို အလေးအနက်ထား ဆောင်ရွက်စေချင်ကြောင်း တိုက်တွန်းဆွေးနွေးခဲ့သည်။
ရန်ကုန်တိုင်းဒေသကြီးအတွင်း ပြည်တွင်း/ပြည်ပ ရင်းနှီးမြှုပ်နံှမှုဖြင့် မြို့ပြဖွံ့ဖြိုးရေးဆိုင်ရာလုပ်ငန်း စီမံကိန်း အစီရင်ခံစာ (၂၀၁၈-၂၀၂၁) ကို ဒုတိယအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန် အစည်းအဝေး (၂၂ ရက်မြောက်နေ့တွင်) ရန်ကုန်တိုင်းဒေသကြီး အစိုးရအဖွဲ့မှ လွှတ်တော်သို့ တင်ပြခဲ့ပြီး လွှတ်တော်ကိုယ်စားလှယ် ၁၄ ဦးက ဆွေးနွေးခဲ့ကြောင်း သိရသည်။
