ဒဂုံဆိပ်ကမ်းမြို့နယ် ၆၇ ရပ်ကွက်မှ သန်းခေါင်စာရင်းရရှိရေးအတွက် ဆန္ဒထုတ်ဖော်ခဲ့သည့် ရပ်ကွက်နေပြည်သူများအား နိုင်ငံသားကတ် ဦးစားပေးလုပ်ပေးရန်အတွက် ဒဂုံဆိပ်ကမ်းမြို့နယ် ပြည်သူ့လွှတ်တော်ကိုယ်စားလှယ် ဦးမြစိန်က မေ ၁၄ရက်တွင် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီးထံ စာပေးပို့ထားကြောင်း သိရသည်။
ဒဂုံဆိပ်ကမ်းမြို့နယ် ၆၇ ရပ်ကွက်တွင် အိမ်ခြေလေးထောင်ကျော်ရှိသည့်အနက် ၃၂ ဦးသာ သန်းခေါင်စာရင်းရရှိထားသည့်အတွက် မေ ၇ ရက်တွင် ရပ်ကွက်နေပြည်သူများက ဆန္ဒထုတ်ဖော်ခဲ့သည်။
ပြည်သူ့လွှတ်တော်ကိုယ်စားလှယ်က ပြည်ထောင်စုဝန်ကြီးထံ ပေးပို့ထားသည့်စာတွင် ၆၇ ရပ်ကွက်နေပြည်သူများသည် ကျူးကျော်ဖြစ်သော်လည်း နိုင်ငံသားဖြစ်သည့်အတွက် နိုင်ငံသားများ၏ မူလအခွင့်အရေးက ရှိပြီးသားဖြစ်ပြီး ၎င်းတို့ မူလနေထိုင်ခဲ့သည့် နေရာတွင် ပုံစံ ၆၆/၆ ရှိပြီးဖြစ်ကြောင်း၊ ပြောင်းရွှေ့နေထိုင်နေသည့် ၆၇ ရပ်ကွက်တွင် ပိုင်ဆိုင်မှုမပြနိုင်သဖြင့် သန်းခေါင်စာရင်းမရရှိကြောင်း၊ သို့သော် ၆၆/ ၆ သည် ပိုင်ဆိုင်မှုကို အထောက်အထားပြုခြင်းမဟုတ်ဘဲ၊ မိသားစုစာရင်းသာဖြစ်သည့်အတွက် တက္ကသိုလ်ဝင်တန်းဖြေထားသည့် ကျောင်းသားများအပါအဝင် ရပ်ကွက်နေပြည်သူများအား နိုင်ငံသားကတ် ဦးစားပေးလုပ်ပေးရန်စသည့် အချက်များပါဝင်ကြောင်း သိရသည်။
ဒဂုံဆိပ်ကမ်းမြို့နယ် ပြည်သူ့လွှတ်တော်ကိုယ်စားလှယ် ဦးမြစိန်က “ဝန်ကြီးကို စာရေးလိုက်တယ် ဒီနေ့ပဲ။ အဲဒီဆန္ဒပြရတဲ့ အကြောင်းတွေကို အခြေခံတယ်။ ဆိုလိုတာက အဓိကကတော့ ကျူးတွေက နိုင်ငံသား၊ မူလအခွင့်အရေးက ရှိပြီးသား။ သူတို့မှာ ဟိုဘက်ကလာတဲ့ ၆၆/ ၆ ရှိနေတယ်။ ဒီမှာက ပိုင်ဆိုင်မှု မပြနိုင်လို့၊ မပေးတာလို့ ပြောတယ်။ ဒါပေမဲ့ ၆၆/ ၆ သည်လည်း ပိုင်ဆိုင်မှုကို အထောက်အထားပြုတာ မဟုတ်ဘူး။ တကယ်က မိသားစုစာရင်းသာ ဖြစ်တယ်။ အဲဒါကြောင့် သူတို့နဲ့ နောက်ကလေးတွေ၊ ၁၀ တန်းဖြေတဲ့ ကလေးတွေ၊ ဟိုတစ်ခါ မတ်လကလည်း တင်ထားတယ်။ ၁၀ တန်းဖြေတဲ့ကလေးတွေကို မှတ်ပုံတင်တွေ ဦးစားပေးလုပ်ပေးဖို့၊ ပြောထားတယ်။ အဲဒါ မကျသေးဘူး၊ တိုင်းကိုတင်ထားတယ်လို့ ပြောတယ်။ ဝန်ကြီးဌာနကို ထပ်ရေးထားတယ်” ဟု ဆိုသည်။
မေ ၇ ရက် ဆန္ဒထုတ်ဖော်မှုတွင် ရပ်ကွက်နေပြည်သူ ၂၀၀ ကျော်က သန်းခေါင်စာရင်း ရရှိရေးအပါအဝင် အချက်ငါးချက်ဖြင့် လမ်းလျှောက်ဆန္ဒထုတ်ဖော်ခဲ့ခြင်းဖြစ်ကြောင်း သိရသည်။
