မူဆယ်မြို့အား TNLA က ဝင်ရောက်တိုက်ခိုက်မှုဖြစ်စဉ်နှင့် ပတ်သက်၍ ကြေညာချက်တစ်စောင်ကို မြန်မာနိုင်ငံဆိုင်ရာ အမေရိကန်သံရုံးက မေ ၁၄ ရက်တွင် ထုတ်ပြန်ခဲ့ပြီး အဆိုပါထုတ်ပြန်ချက်၌ လုံခြုံရေးအခြေအနေနှင့် ပတ်သက်၍ အရပ်သားများကို အကာအကွယ်ပေးရာတွင် နောက်ထပ်သေကျေဒဏ်ရာရမှုများ မဖြစ်ပေါ်စေရေး ထိန်းထိန်းသိမ်းသိမ်း ဆောင်ရွက်ကြရန် သက်ဆိုင်ရာ အဖွဲ့အစည်းများအားလုံးကို တိုက်တွန်းကြောင်းထည့်သွင်းဖော်ပြထားသည်။
ရှမ်းပြည်နယ်မြောက်ပိုင်း မူဆယ်မြို့နယ်အတွင်း TNLA တပ်၊ အစိုးရလုံခြုံရေး တပ်ဖွဲ့နှင့် ပြည်သူ့စစ်တို့အကြား မကြာသေးမီက ဖြစ်ပွားခဲ့သော တိုက်ပွဲများကြောင့် သေကျေဒဏ်ရာရမှုများ ရှိခဲ့သည့်အတွက် မိမိတို့အနေဖြင့် စိုးရိမ်ပူပန်မိကြောင်း၊ အရပ်သားများကို အကာအကွယ်ပေးရာတွင် နောက်ထပ်သေကျေဒဏ်ရာရမှုများ မဖြစ်ပေါ်စေရေးအတွက် ထိန်းထိန်းသိမ်းသိမ်း ဆောင်ရွက်ကြစေလိုကြောင်း၊ ယင်းပဋိပက္ခအတွင်း အသက်ဆုံးရှုံးခဲ့ရသူများနှင့် ဒဏ်ရာရရှိခဲ့သူများ၏ မိသားစုများနှင့်အတူ ထပ်တူဝမ်းနည်းကြေကွဲမိကြောင်း၊ ပဋိပက္ခကြောင့် ဒုက္ခရောက်သူအားလုံးထံသို့ လူသားချင်း စာနာမှုအကူအညီများ ရောက်ရှိနိုင်ရေးအတွက် ခွင့်ပြုပေးရန်နှင့် နိုင်ငံတွင်း ဆယ်စုနှစ်များစွာ ဒုက္ခပေးခဲ့သော ပြဿနာကို ငြိမ်းချမ်းစွာ ဖြေရှင်းပေးရေးအတွက် ညှိနှိုင်းဆောင်ရွက်ကြပါရန် သက်ဆိုင်ရာအဖွဲ့အစည်းအားလုံးကို တိုက်တွန်းကြောင်းနှင့် ဤသို့သော ကြိုးပမ်းဆောင်ရွက်မှုများအတွက် အားပေးကူညီရန် မိမိတို့အနေဖြင့် အဆင်သင့်ရှိနေကြောင်း ကြေညာချက်တွင် ဖော်ပြထားသည်။
အမှန်တကယ်၌ TNLA အဖွဲ့က မူဆယ်မြို့အား ဝင်ရောက်တိုက်ခိုက်ခဲ့သည်ဟု ဖော်ပြရမည့်အစား အရပ်သားများ သေကျေဒဏ်ရာရရှိခဲ့ခြင်းမှာ မူဆယ်မြို့၌ တိုက်ပွဲများ ဖြစ်ပွားခဲ့ခြင်းကြောင့်ဟု အမေရိကန်သံရုံးက ဖော်ပြခဲ့မှုအား ဝေဖန်မှုများ ထွက်ပေါ်နေကြောင်းလည်း သိရသည်။
ယင်းဖြစ်စဉ်နှင့်ပတ်သက်၍ တပ်မတော်ကာကွယ်ရေးဦးစီးချုပ်ရုံးက မေ ၁၂ ရက်တွင် သတင်းထုတ်ပြန်ခဲ့ရာ၌ TNLA အဖွဲ့သာမက ကချင်လက်နက်ကိုင်အဖွဲ့ (KIA) လည်း ပစ်ခတ်တိုက်ခိုက်မှုတွင်ပါဝင်ကြောင်း ဖော်ပြထားသည်။
