၂၀၁၈ ခုနှစ်ကြားဖြတ်ရွေးကောက်ပွဲအတွက် မဲစာရင်းပြုစုရာ၌ လစ်လပ်မဲဆန္ဒနယ် ၁၂ နေရာတွင် သတ်မှတ်ချိန်ငါးပတ်အတွင်း ပြီးစီးနိုင်သော်လည်း မဲဆန္ဒရှင် နှစ်သိန်းကျော်ရှိသည့် မြင်းခြံမဲဆန္ဒနယ်၌ အနည်းငယ်နောက်ကျနိုင်

၂၀၁၈ ခုနှစ်ကြားဖြတ်ရွေးကောက်ပွဲအတွက် မဲစာရင်းပြုစုရာ၌ လစ်လပ်မဲဆန္ဒနယ် ၁၂ နေရာတွင် သတ်မှတ်ချိန်ငါးပတ်အတွင်း ပြီးစီးနိုင်သော်လည်း မဲဆန္ဒရှင် နှစ်သိန်းကျော်ရှိသည့် မြင်းခြံမဲဆန္ဒနယ်၌ အနည်းငယ်နောက်ကျနိုင်
Published 14 May 2018

၂၀၁၈ ခုနှစ် ကြားဖြတ်ရွေးကောက်ပွဲအတွက် မဲစာရင်းပြုစုရာ၌ လစ်လပ်မဲဆန္ဒနယ် ၁၂ နေရာတွင် သတ်မှတ်ချိန်ငါးပတ်အတွင်း ပြီးစီးနိုင်သော်လည်း မဲဆန္ဒရှင် နှစ်သိန်းကျော်ရှိသည့် မြင်းခြံမဲဆန္ဒနယ်၌ အနည်းငယ် နောက်ကျနိုင်ကြောင်း ပြည်ထောင်စုရွေးကောက်ပွဲ ကော်မရှင်အဖွဲ့ဝင်၊ ပြောရေးဆိုခွင့်ရှိသူ ဦးမြင့်နိုင်က The Daily Eleven သတင်းစာကို ပြောကြားသည်။

လက်ရှိတွင် ပြည်ထောင်စုရွေးကောက်ပွဲကော်မရှင်က လွှတ်တော်ကိုယ်စားလှယ် လစ်လပ်နေသည့် မဲဆန္ဒနယ် ၁၃ နေရာ၌ ၂၀၁၈ ခုနှစ် နိုဝင်ဘာ ၃ ရက်တွင် ကြားဖြတ်ရွေးကောက်ပွဲတစ်ရပ် ကျင်းပမည်ဖြစ်ကြောင်း ကြေညာထားသည်။
ကြားဖြတ်ရွေးကောက်ပွဲ ကျင်းပမည့် သက်ဆိုင်ရာ မဲဆန္ဒနယ်မြေများရှိ ရွေးကောက်ပွဲကော်မရှင်အဖွဲ့ခွဲများအား ဧပြီ ၁၉ ရက်မှစတင်ကာ သတ်မှတ်လျာထားချိန် ငါးပတ်အထိ မဲဆန္ဒရှင်စာရင်းပြုစုရန် ညွှန်ကြားထားကြောင်း ဦးမြင့်နိုင်က ဆိုသည်။

“အခု ကျွန်တော်တို့ ဧပြီ ၁၉ ရက်က စပြီးလုပ်နေတယ်။ ငါးပတ်အတွက်ဆိုတော့ ငါးပတ်အတွင်း တော်တော်များများတော့ ပြီးနိုင်မှာပေါ့နော်။ မြင်းခြံကတော့ မဲဆန္ဒရှင် နှစ်သိန်းလောက်ကျော်တယ်။ နောက်မှလည်း လစ်လပ်သွားတော့ သူကတော့ နည်းနည်းတော့ နောက်ကျမှာပေါ့။ အဲဒီအခြေအနေတွေကို ကြည့်ပြီးတော့ အချိန်မီပေါ့။ လုပ်သွားမှာပဲ။ အဲဒီ ငါးပတ်ပြည့်တဲ့အခါကျမှ ပြုစုပြီးတဲ့အချိန်အခါမှ မဲစာရင်းကပ်မယ့်ရက်ကို လျာထားပြီးတော့ ဆောင်ရွက်သွားမှာပါ” ဟု ပြည်ထောင်စုရွေးကောက်ပွဲကော်မရှင်အဖွဲ့ဝင် ပြောရေးဆိုခွင့်ရှိသူ ဦးမြင့်နိုင်က ဆိုသည်။

၂၀၁၈ ခုနှစ် ကြားဖြတ်ရွေးကောက်ပွဲတွင် မဲဆန္ဒရှင်စာရင်းကြေညာရာတွင် အိမ်ထောင်စုအလိုက် ထုတ်ပြန်ကြေညာပေးမည်ဖြစ်ကြောင်း ပြည်ထောင်စုရွေးကောက်ပွဲကော်မရှင်က ဆိုထားသည်။

“မဲစာရင်းပြုရာမှာ အခုလောလောဆယ်တော့ အခက်အခဲမရှိပါဘူး။ တော်တော်များများတော့ မှန်းထားတဲ့ ငါးပတ်အတွင်းကိုပြီးမှာပါ။ မြင်းခြံတစ်ခုသာ မဲဆန္ဒရှင် နှစ်သိန်းကျော်တဲ့အခါကျတော့ သူကတော့ နည်းနည်းလေးတော့ နောက်ကျမယ်” ဟု ရွေးကောက်ပွဲကော်မရှင်အဖွဲ့ဝင် ဦးမြင့်နိုင်က ဆက်လက်ပြောကြားသည်။

ပြီးခဲ့သည့် ၂၀၁၅ ခုနှစ် အထွေထွေရွေးကောက်ပွဲတွင် မြင်းခြံမဲဆန္ဒနယ်၌ မဲဆန္ဒရှင် ၂၁၁၀၄၃ ဦးရှိကြောင်း သိရသည်။

တစ်နိုင်လုံးတွင် ကြားဖြတ်ရွေးကောက်ပွဲအတွက် လစ်လပ်မဲဆန္ဒနယ်မှာ ပြည်သူ့လွှတ်တော်တွင် လေးနေရာ၊ အမျိုးသားလွှတ်တော်တွင် တစ်နေရာနှင့် တိုင်းဒေသကြီးနှင့် ပြည်နယ်လွှတ်တော်များတွင် ရှစ်နေရာဖြစ်သည်။ ပြည်သူ့လွှတ်တော်တွင် လစ်လပ်မဲဆန္ဒနယ်များမှာ ကန်ပက်လက်မဲဆန္ဒနယ်၊ လဲချားမဲဆန္ဒနယ်၊ တာမွေမဲဆန္ဒနယ်၊ မြင်းခြံမဲဆန္ဒနယ် တို့ဖြစ်သည်။

ထို့အတူ အမျိုးသားလွှတ်တော် လစ်လပ်မဲဆန္ဒနယ်မှာ ကချင်ပြည်နယ်၊ အမျိုးသားလွှတ်တော် မဲဆန္ဒနယ်အမှတ် (၂) ဖြစ်ပြီး အဆိုပါမဲဆန္ဒနယ်၏ အကျုံးဝင်မြို့နယ်မှာ မြစ်ကြီးနားမြို့နယ်ဖြစ်သည်။

ထို့ပြင် တိုင်းဒေသကြီး လစ်လပ်မဲဆန္ဒနယ်များမှာ စစ်ကိုင်းတိုင်းဒေသကြီး လွှတ်တော် တမူးမဲဆန္ဒနယ်အမှတ် (၂)၊ ပဲခူးတိုင်းဒေသကြီး လွှတ်တော် အုတ်တွင်းမဲဆန္ဒယ် အမှတ် (၁)၊ မန္တလေးတိုင်းဒေသကြီး လွှတ်တော် သပိတ်ကျင်းမဲဆန္ဒနယ် အမှတ် (၁) နှင့် ရှမ်းတိုင်းရင်းသားလူမျိုးမဲဆန္ဒနယ်၊ မကွေးတိုင်းဒေသကြီးလွှတ်တော် မင်းဘူးမဲဆန္ဒနယ် အမှတ် (၂) နှင့် ရန်ကုန်တိုင်းဒေသကြီး လွှတ်တော် ဆိပ်ကမ်းမဲဆန္ဒနယ် အမှတ် (၂) တို့ဖြစ်သည်။

ပြည်နယ်လွှတ်တော် လစ်လပ်မဲဆန္ဒနယ်များမှာ ချင်းပြည်နယ်လွှတ်တော် မတူပီမဲဆန္ဒနယ် အမှတ် (၁) နှင့် ရခိုင်ပြည်နယ်လွှတ်တော် ရသေ့တောင်မဲဆန္ဒနယ်အမှတ် (၂) တို့ဖြစ်သည်။

Most Recent