စားသုံးသူဈေးနှုန်း လျော့ကျရန်၊ ယှဉ်ပြိုင်မှုမျှတရန်၊ ရွေးချယ်ခွင့်ပိုမိုရရှိရန် စသည်တို့ကို ရည်ရွယ်၍ နိုင်ငံခြားသားကုမ္ပဏီ၊ ပြည်တွင်းပြည်ပ ဖက်စပ်ကုမ္ပဏီများအား ပြည်တွင်းဈေးကွက်၌ လက်လီ၊ လက်ကား ရောင်းချခွင့်ပြုလိုက်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက အမိန့်ကြော်ငြာစာအမှတ် (၂၅/၂၀၁၈) ဖြင့် ထုတ်ပြန်ထားခြင်းဖြစ်ကြောင်း သိရသည်။
အဆိုပါအမိန့်ကြော်ငြာစာတွင် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနသည် လက်လီ၊ လက်ကားရောင်းချဖြန့်ဖြူးသူများအကြား မျှတသော ယှဉ်ပြိုင်မှုတိုးတက်စေခြင်းအားဖြင့် စားသုံးသူများအတွက် ဈေးနှုန်းလျော့ကျပြီး ရွေးချယ်ခွင့် ပိုမိုရရှိလာစေရန်လည်းကောင်း၊ ရောင်းချဖြန့်ဖြူးမှုလုပ်ငန်းများတွင် ကုန်ပစ္စည်းအရည်အသွေးနှင့် ဝန်ဆောင်မှုအရည်အသွေး၊ နည်းပညာများ တိုးတက်စေရန်လည်းကောင်း၊ ပြည်တွင်းထုတ်ကုန်များ ဈေးကွက်ပိုမိုရရှိ၍ အသေးစား၊ အလတ်စားစီးပွားရေးလုပ်ငန်းများ ပိုမိုဖွံ့ဖြိုးတိုးတက်စေရန်လည်းကောင်း ရည်ရွယ်၍ နိုင်ငံခြားသားကုမ္ပဏီ၊ မြန်မာနိုင်ငံသားနှင့် နိုင်ငံခြားသား ပေါင်းစည်းဆောင်ရွက်သည့် ကုမ္ပဏီများအား အမိန့်ကြော်ငြာစာ ထုတ်ပြန်သည့်နေ့မှစ၍ ပြည်တွင်းတွင် လက်လီ၊ လက်ကား ရောင်းချဖြန့်ဖြူးခွင့်ပြုလိုက်ခြင်းဖြစ်သည်။
အဆိုပါ လက်လီ၊ လက်ကားရောင်းချခြင်းလုပ်ငန်း ဆောင်ရွက်ရာတွင် မည်သည့် မြန်မာနိုင်ငံသား အပြည့်အ၀ ဆောင်ရွက်သည့်ကုမ္ပဏီ၊ နိုင်ငံခြားသား အပြည့်အဝဆောင်ရွက်သည့်ကုမ္ပဏီ၊ မြန်မာနိုင်ငံသားနှင့် နိုင်ငံခြားသား ပေါင်းစည်းဆောင်ရွက်သည့် ကုမ္ပဏီမဆို ချမှတ်ထားသည့် စည်းကမ်းချက်များနှင့်အညီ လိုက်နာဆောင်ရွက်သွားရန်ဖြစ်ကြောင်းနှင့် လက်လီ၊ လက်ကား ရောင်းချခွင့် စည်းကမ်းချက်များကို လိုအပ်သလို ပြင်ဆင်သတ်မှတ်ထုတ်ပြန်သွားမည်ဖြစ်ကြောင်း ကြေညာထားသည်။
သတ်မှတ်ချက်အနေဖြင့် လက်လီ၊ လက်ကား ရောင်းချဖြန့်ဖြူးခြင်းကို နိုင်ငံခြားသား အပြည့်အဝဆောင်ရွက်မည့် နိုင်ငံခြားကုမ္ပဏီသည် လက်ကားရောင်းချခြင်းဖြစ်ပါက ရောင်းချမည့် ကုန်ပစ္စည်းအပေါ် ကနဦးရင်းနှီးမြှုပ်နှံမှု ငွေပမာဏသည် မြေငှားရမ်းခမပါ ဒေါ်လာငါးသန်းအထက်ဖြစ်ရမည်။ လက်လီရောင်းချခြင်းဖြစ်ပါက ရောင်းချမည့် ကုန်ပစ္စည်းအပေါ် ကနဦး ရင်းနှီးမြှုပ်နှံမှုငွေပမာဏသည် မြေငှားရမ်းခမပါ ဒေါ်လာသုံးသန်းအထက် ရှိရမည်ဖြစ်သည်။
နိုင်ငံသားနှင့် နိုင်ငံခြားသား ပေါင်းစည်းဆောင်ရွက်သည့်စနစ်ဖြင့် လက်လီ၊ လက်ကား ရောင်းချခြင်းလုပ်ငန်းကို ဆောင်ရွက်သည့်ကုမ္ပဏီသည် မြန်မာနိုင်ငံသား၏ တိုက်ရိုက်အစုရှယ်ယာ ပါဝင်မှုအချိုး ရာခိုင်နှုန်း ၂၀ နှင့်အထက်ဖြင့် ပေါင်းစည်းဆောင်ရွက်သည့် ကုမ္ပဏီဖြစ်ပါက လက်ကားရောင်းချခြင်းဖြစ်လျှင် ရောင်းချမည့် ကုန်ပစ္စည်းအပေါ် ကနဦး ရင်းနှီးမြှုပ်နှံမှုငွေပမာဏသည် မြေငှားရမ်းခမပါ ဒေါ်လာနှစ်သန်းနှင့်အထက် ဖြစ်ရမည်ဖြစ်သည်။ လက်လီရောင်းချခြင်းဖြစ်ပါက ရောင်းချမည့် ကုန်ပစ္စည်းအပေါ် ကနဦး ရင်းနှီးမြှုပ်နှံငွေပမာဏသည် မြေငှားရမ်းခမပါ ဒေါ်လာခုနစ်သိန်းအထက် ဖြစ်ရမည်ဟု သတ်မှတ်ထားသည်။
