<

ဟံသာဝတီ အပြည်ပြည်ဆိုင်ရာလေဆိပ် စီမံကိန်း အကောင်အထည်ဖော်ရန် မြေယာပြုပြင်ရှင်းလင်းရေး လုပ်ငန်းများ စတင်ဆောင်ရွက်နေပြီဖြစ်ကြောင်း ပဲခူးတိုင်းဒေသကြီး စီမံ/စီးပွားဝန်ကြီး ပြောကြား

Yongnam ၏ ဟံသာဝတီလေဆိပ် တည်ဆောက်မည့်ပုံစံကို တွေ့ရစဉ်

ဟံသာဝတီ အပြည်ပြည်ဆိုင်ရာလေဆိပ် စီမံကိန်း အကောင်အထည်ဖော်ရန်အတွက် မြေယာပြုပြင်ရှင်းလင်းရေး လုပ်ငန်းများ စတင်ဆောင်ရွက်နေပြီဖြစ်ကြောင်း ပဲခူးတိုင်းဒေသကြီး စီမံကိန်းနှင့် စီးပွားရေးဝန်ကြီးဌာန ၀န်ကြီး ဦးညွှန့်ရွှေက The Daily Eleven သတင်းစာသို့ ပြောကြားသည်။

“ဟံသာဝတီလေဆိပ်က ဆက်လုပ်ပါလိမ့်မယ်။ ပထမကုမ္ပဏီနှစ်ခုနဲ့ကတော့ ပျက်သွားတာပေါ့။ ပြည်ထောင်စုကနေ ဂျပန်ကုမ္ပဏီနဲ့ပြန်လုပ်မယ်လို့ ပြောပါတယ်။ အခုက ဟံသာဝတီလေဆိပ်က မြေရှင်းလင်းရေးတွေ လုပ်နေပြီ၊ မြေကွက်တွေရှင်းနေပြီ။ ဧက ၉၀၀၀ ကျော်ရှိတာကို ကျွန်တော်တို့အစိုးရအနေနဲ့ စလုပ်နေပါပြီ။ လေဆိပ်လုပ်ဖို့အတွက် မြေယာပြင်နေတာပေါ့” ဟု ပဲခူးတိုင်းဒေသကြီး စီမံကိန်းနှင့်စီးပွားရေးဝန်ကြီးဌာန ၀န်ကြီးဦးညွှန့်ရွှေက ပြောကြားသည်။

ဟံသာဝတီ အပြည်ပြည်ဆိုင်ရာလေဆိပ် စီမံကိန်းသည် အနာဂတ်လေကြောင်းကဏ္ဍ ဖွံ့ဖြိုးတိုးတက်ရေးအတွက် မဖြစ်မနေဆောင်ရွက်ရမည့် နိုင်ငံတော်စီမံကိန်းဖြစ်သဖြင့် ဆက်လက်အကောင်အထည်ဖော်ရန် ဂျပန်အစိုးရနှင့် ညှိနှိုင်းဆွေးနွေးနေကြောင်း လေကြောင်းပို့ဆောင်ရေး ညွှန်ကြားမှုဦးစီးဌာနက စီမံကိန်းနှင့်ပတ်သက်သည့် နောက်ဆုံးအခြေအနေကို ပြီးခဲ့သည့် မတ်လအတွင်းက သတင်းထုတ်ပြန်ထားသည်။

ဟံသာဝတီ အပြည်ပြည်ဆိုင်ရာလေဆိပ် စီမံကိန်းလုပ်ငန်း အကောင်အထည်ဖော်ရေး ကြီးကြပ်မှုကော်မတီက စိစစ်မှုများ ပြုလုပ်ခဲ့ပြီး ယင်းစီမံကိန်းအတွက် Yongnam-CAPE-JGC Consortium အား ရွေးချယ်ကြောင်း ၂၀၁၄ ခုနှစ် အောက်တိုဘာ ၃၀ ရက်၌ ထုတ်ပြန်ကြေညာခဲ့ခြင်းဖြစ်သည်။

ပို့ဆောင်ရေးဝန်ကြီးဌာနမှ ဖွဲ့စည်းပေးထားသော လုပ်ငန်းအကောင်အထည်ဖော် ဆောင်ရွက်ရေး ကြီးကြပ်မှုကော်မတီနှင့် JGC-Yongnam-CAI-Consortium (HIA Myanmar Company Limited-HIAMCL) တို့သည် Concession Agreement ချုပ်ဆိုနိုင်ရေးအတွက် ၂၀၁၅ ခုနှစ် ဇန်န၀ါရီ ၂၆ ရက်မှ ၂၀၁၅ ခုနှစ် ဒီဇင်ဘာ ၉ ရက်အထိ ဆွေးနွေးမှု ၁၁ ကြိမ်ပြုလုပ်ခဲ့ပြီး နှစ်နှစ်သက်တမ်းရှိ ကနဦးမူဘောင် သဘောတူညီချက် Framework Agreement ကို ၂၀၁၆ ခုနှစ် ဇန်န၀ါရီ ၃၀ ရက်တွင် လက်မှတ်ရေးထိုးခဲ့ကြောင်း သိရသည်။

ထို့နောက် ဒုတိယသမ္မတ (၂) ဦးဆောင်သည့် ဟံသာဝတီ အပြည်ပြည်ဆိုင်ရာလေဆိပ် တည်ဆောက်ရေးစီမံကိန်း ဦးဆောင်ကော်မတီ အစည်းအဝေးအား ၂၀၁၆ ခုနှစ် ဒီဇင်ဘာ ၂၁ ရက်တွင်ပြုလုပ်ခဲ့ရာ ဟံသာဝတီ အပြည်ပြည်ဆိုင်ရာလေဆိပ် စီမံကိန်းအား နိုင်ငံတော်စီမံကိန်းတစ်ရပ်အဖြစ် သတ်မှတ်ပြီး Concession Agreement ချုပ်ဆိုနိုင်ရေး ညှိနှိုင်းမှုကော်မတီမှ စာချုပ်ချုပ်ဆိုနိုင်ရေး ဆက်လက်ညှိနှိုင်းဆွေးနွေးရန် ဆုံးဖြတ်ချက်အရ HIAMCL အဖွဲ့နှင့် ညှိနှိုင်းမှုကော်မတီတို့ ၂၀၁၇ ခုနှစ် ဇန်န၀ါရီ ၁၁ ရက်တွင် စတင်ညှိနှိုင်းဆွေးခဲ့သည်။

အဆိုပါ Concession Agreement ချုပ်ဆိုနိုင်ရေးအတွက် ညှိနှိုင်းမှုကော်မတီနှင့် HIAMCL တို့အကြား ညှိနှိုင်းဆွေးနွေးပွဲငါးကြိမ်နှင့် Technical Working Group Meeting အစည်းအဝေးတစ်ကြိမ် ကျင်းပပြုလုပ်ခဲ့သည်။ ထိုသို့ဆွေးနွေးရာတွင် အဓိကကျသည့် အချက်များအပေါ် သဘောတူညီမှုမရနိုင်သေးမီ Framework Agreement စာချုပ်သက်တမ်းနှစ်နှစ်မှာ ၂၀၁၈ ခုနှစ် ဇန်န၀ါရီ ၃၁ ရက်တွင် ကုန်ဆုံးခဲ့ခြင်းဖြစ်ကြောင်း သိရသည်။

May 12, 2018














Copy Protected by Chetan's WP-Copyprotect.