ကုလသမဂ္ဂလုံခြုံရေးကောင်စီအဖွဲ့ဝင်များသည် ဧပြီ ၂၈ ရက်မှ မေ ၁ ရက်အထိ မြန်မာနှင့် ဘင်္ဂလားဒေ့ရှ်နိုင်ငံများသို့ အချက်အလက် ရှာဖွေရေးခရီးစဉ်တစ်ရပ် သွားရောက်ခဲ့ပြီးနောက် မေ ၁၀ ရက်တွင် ကြေညာချက်တစ်စောင် ထုတ်ပြန်ခဲ့သည်။
ယင်းတွင် လုံခြုံရေးကောင်စီက ဘင်္ဂါလီ မွတ်စလင်ဒုက္ခသည်များ နေရပ်သို့ ဘေးကင်းလုံခြုံစွာ ပြန်နိုင်ရေးအတွက် အားထုတ်မှုများကို အရှိန်မြှင့်ရန် မြန်မာနိုင်ငံအား တောင်းဆိုခဲ့သည်။ သို့သော် လူ့အခွင့်အရေး ချိုးဖောက်မှုများဟု ရည်ညွှန်းသည့် အစောပိုင်းမူကြမ်းမှ စာသားများကို ဖြုတ်ထားပစ်ခဲ့သည်။
ဘင်္ဂါလီမွတ်စလင်ဒုက္ခသည်များနှင့် ရခိုင်ပြည်နယ်အတွင်း၌ ပြည်တွင်း၌ပင် နေရာရွှေ့ပြောင်းခံရသည့် လူများအား ဘေးကင်းလုံခြုံစွာ၊ မိမိတို့၏ သဘောဆန္ဒအလျောက် သိက္ခာရှိစွာ ပြန်လာနိုင်ရေးအတွက် အထောက်အကူဖြစ်စေသည့် အခြေအနေရပ်များ ဖန်တီးရေးအတွက် အားထုတ်မှုများကို အရှိန်မြှင့်ရန်နှင့် ပဋိပက္ခဖြစ်ပွားရခြင်း၏ ဇာစ်မြစ်အကြောင်းရင်းများကို ဖြေရှင်းရန် ကုလသမဂ္ဂလုံခြုံရေးကောင်စီက မြန်မာနိုင်ငံအား တောင်းဆိုခဲ့သည်။
ပြင်သစ်နှင့် အမေရိကန်ပြည်ထောင်စုတို့က ကျောထောက်နောက်ခံပြုပေးလျက် ဗြိတိန်နိုင်ငံက ရေးသားသည့် ယခင်မူကြမ်းတစ်ရပ်တွင် လူ့အခွင့်အရေးချိုးဖောက်မှုများ နှင့် ပတ်သက်သော စွပ်စွဲချက်များကို ပွင့်လင်း မြင်သာမှုရှိသည့် စုံစမ်းစစ်ဆေးမှုများပြုလုပ်ရန် စာသားများကို ထည့်သွင်းထားခဲ့သော်လည်း ယင်းတို့အား တရုတ်နိုင်ငံက ပယ်ချခဲ့သည်။
မေ ၈ ရက်က လူ့အခွင့်အရေးဆိုင်ရာ စောင့်ကြည့်ရေးအဖွဲ့ (HRW) ၊ အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့ (AI) ၊ အခွင့်အရေးများ ခုခံကာကွယ်ရေးအဖွဲ့ (Fortify Rights) နှင့် R2P ဆိုင်ရာ ကမ္ဘာ့စင်တာတို့ ပါဝင်သော NGO အဖွဲ့ လေးဖွဲ့က မြန်မာနိုင်ငံတွင် ကျူးလွန်ခဲ့သည်ဟုဆိုသော လူသားဆန်မှုကို ချိုးဖောက်သည့် ရာဇဝတ်မှုများအတွက် အပြည်ပြည်ဆိုင်ရာ ရာဇဝတ်ခုံရုံး (ICC) သို့ လွှဲပြောင်းပေးရန် ကုလသမဂ္ဂအား တောင်းဆိုခဲ့သည်။
ရခိုင်ပြည်နယ်မြောက်ပိုင်းတွင် ၂၀၁၇ ခုနှစ် သြဂုတ်လအတွင်းက ပြုလုပ်ခဲ့သော တပ်မတော်စစ်ဆင်ရေးတစ်ရပ်ကြောင့် ဘင်္ဂါလီ မွတ်စလင် ၇၀၀,၀၀၀ ကျော် ထွက်ပြေးသွားခဲ့ပြီးနောက် မြန်မာနိုင်ငံသည် နိုင်ငံတကာ အသိုင်းအဝိုင်း၏ စောင့်ကြည့်မှုကို ခံနေရသည်။
မြန်မာနိုင်ငံက တပ်မတော်စစ်ဆင်ရေးသည် အကြမ်းဖက်သမားများကို ချေမှုန်းရန် ရည်ရွယ်ခြင်းဖြစ်ကြောင်း ပြောကြားခဲ့ပြီး ကုလသမဂ္ဂ၊ ဗြိတိန်၊ ပြင်သစ်နှင့် အမေရိကန်တို့က စွပ်စွဲသည့် လူမျိုးစုလိုက် သုတ်သင်မှု ဟူသည်ကို ပယ်ချခဲ့သည်။
