၂၀၁၃ ခုနှစ်မှ ၂၀၁၆ ခုနှစ်အတွင်း ထုတ်ပြန်ခဲ့မှုများအရ ပုဂ္ဂလိကဘဏ်များ၏ အပ်ငွေများ၊ချေးငွေနှင့် ကြိုတင်ချေးငွေများ၏ နှစ်စဉ်ဖွံ့ဖြိုးတိုးတက်မှုနှုန်းသည် ၃၈ ရာခိုင်နှုန်းနှင့် ၄၄ ရာခိုင်နှုန်းသာ ရှိနေသော်လည်း ယင်းနှစ်များအတွင်း ဧရာဝတီဘဏ်၏ ဖွံ့ဖြိုးတိုးတက်မှုနှုန်းသည် အပ်နှံငွေတွင် ၈၉ ရာခိုင်နှုန်းနှင့် ချေးငွေနှင့် ကြိုတင်ချေးငွေနှစ်မျိုးစလုံး၏ ဖွံ့ဖြိုးတိုးတက်မှုနှုန်းသည် ၈၄ ရာခိုင်နှုန်းအထိ ရှိခဲ့ကြောင်း ဧရာဝတီဘဏ်မှ သိရသည်။
ထို့ပြင် ၂၀၁၄ ခုနှစ်မှ ၂၀၁၇ ခုနှစ်တွင် အပ်နှံငွေများသည်လည်းကောင်း၊ ချေးငွေ နှင့် ကြိုတင်ချေးငွေနှစ်မျိုးလုံး၏ ဖွံ့ဖြိုးတိုးတက်နှုန်းသည် ၈၄ ရာခိုင်နှုန်း ရှိခဲ့ကြောင်း နှင့် ၂၀၁၆-၂၀၁၇ ဘဏ္ဍာနှစ်တွင် ဧရာဝတီ ဘဏ်သည် အတိုးတက်ဆုံးဘဏ်ဖြစ်ပြီး အပ်ငွေများ၏ ဖွံ့ဖြိုးတိုးတက်နှုန်း ၄၄ ရာခိုင်နှုန်း နှင့် ချေးငွေနှင့်ကြိုတင်ချေးငွေများ ဖွံ့ဖြိုးတိုးတက်မှုနှုန်းသည် ၃၉ ရာခိုင်နှုန်း အသီးသီး ရှိနေကြောင်း သိရသည်။
၂၀၁၀ ပြည့်နှစ်မှ စတင်ဖွင့်လှစ်ခဲ့သော ဧရာဝတီဘဏ်သည် ပြည်တွင်းရှိ သက်တမ်းရင့်ဘဏ်များစွာကို ဖြတ်ကျော်ပြီး လက်ရှိအချိန်တွင် မြန်မာနိုင်ငံ၏ ဒုတိယအကြီးဆုံးဘဏ်အဖြစ် ရပ်တည်နေကာ ဘဏ်ခွဲပေါင်း ၂၂၅ ဘဏ် ရှိပြီးဖြစ်သည်။ အဆိုပါဘဏ်ခွဲများအနက် ရန်ကုန်တိုင်းဒေသကြီးအတွင်း၌ပင် ဘဏ်ခွဲပေါင်း ၁၀၄ ဘဏ်ရှိနေပြီး ၂၀၁၄ ခုနှစ် မတ်လမှ ၂၀၁၇ ခုနှစ် ဇူလိုင်လကုန်အတွင်း သုံးစွဲသူဦးရေ ၃၀၀၀၀၀ ခန့်မှ ၁ ဒသမ ၂ သန်းကျော်သို့ တိုးပွားလာကြောင်း သိရသည်။
GIZ ၏ ၂၀၁၆ ခုနှစ်အတွင်း ထုတ်ပြန်ခဲ့သည့် စစ်တမ်းအရ ပြည်တွင်းဘဏ်များတွင် ကမ္ဘောဇဘဏ်သည် Total Assets ၌ ကျပ် ၈၆၉၃ ဘီလျံဖြင့် အကြီးဆုံးဖြစ်နေပြီး ဧရာဝတီဘဏ်သည် ကျပ် ၂၉၁၃ ဘီလျံနှင့် ဒုတိယအကြီးဆုံး ဖြစ်နေကြောင်း ဖော်ပြထားသည်။
ဧရာဝတီဘဏ်သည် ပွင့်လင်းမြင်သာမှုရှိခြင်း၊ စီမံအုပ်ချုပ်ခန့်ခွဲမှု ကောင်းမွန်ခြင်း စသည့် အခြေအနေများကြောင့် ၂၀၁၄-၂၀၁၅ ဘဏ္ဍာနှစ်မှ စတင်၍ IFRS အပြည်ပြည်ဆိုင်ရာ ဘဏ္ဍာရေး စာရင်းအစီရင်ခံစာ တင်ပြမှု စံချိန်စံနှုန်းနှင့်ကိုက်ညီစွာ ဘဏ္ဍာရေး အစီရင်ခံစာကို တင်ပြနိုင်ခဲ့သည့်အပြင် ISA အပြည်ပြည်ဆိုင်ရာ စာရင်းစစ်ခြင်း စံချိန် စံနှုန်းနှင့်အညီ စာရင်းစစ်ခြင်းဆောင်ရွက်ခဲ့ကာ ၂၀၁၄-၂၀၁၅၊ ၂၀၁၅-၂၀၁၆၊ ၂၀၁၆-၂၀၁၇ ဘဏ္ဍာနှစ် သုံးနှစ်ဆက်တိုက် IFRS စံချိန်စံနှုန်းနှင့် ကိုက်ညီစွာ အစီရင်ခံစာ တင်ပြနိုင်သည့် မြန်မာနိုင်ငံအတွင်းရှိ တစ်ခုတည်းသောဘဏ် ဖြစ်သည်။
