၂၀၁၇-၂၀၁၈ ဘဏ္ဍာနှစ်တွင် ရန်ကုန်တိုင်းဒေသကြီးတွင် ပြည်ပရင်းနှီးမြှုပ်နှံမှု ဒေါ်လာ ၃၂၂၁ သန်းနှင့် ပြည်တွင်းရင်းနှီးမြှုပ်နှံမှု ကျပ် ၈၅၁ ဘီလျံရှိကြောင်း စီမံကိန်းနှင့် ဘဏ္ဍာရေးဝန်ကြီး ပြောကြား

၂၀၁၇-၂၀၁၈ ဘဏ္ဍာနှစ်တွင် ရန်ကုန်တိုင်းဒေသကြီးတွင် ပြည်ပရင်းနှီးမြှုပ်နှံမှု ဒေါ်လာ ၃၂၂၁ သန်းနှင့် ပြည်တွင်းရင်းနှီးမြှုပ်နှံမှု ကျပ် ၈၅၁ ဘီလျံရှိကြောင်း စီမံကိန်းနှင့် ဘဏ္ဍာရေးဝန်ကြီး ပြောကြား
Published 10 May 2018

စီးပွားရေးမြို့တော်ဟု သတ်မှတ်ထားသည့် ရန်ကုန်မြို့တစ်နေရာအား တွေ့ရစဉ် (ဓာတ်ပုံ- ဆန်းထူးအောင်)

ရန်ကုန်တိုင်းဒေသကြီးအတွင်း ၂၀၁၇-၂၀၁၈ ဘဏ္ဍာနှစ် မတ်လအထိ နိုင်ငံခြား ရင်းနှီးမြှုပ်နှံမှု ဒေါ်လာ ၃၂၂၁ သန်းနှင့် မြန်မာနိုင်ငံသားရင်းနှီးမြှုပ်နှံမှု ကျပ် ၈၅၁ ဘီလျံရှိကြောင်း ရန်ကုန်တိုင်းဒေသကြီးအစိုးရအဖွဲ့ စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းက မေ ၈ ရက်တွင် ပြုလုပ်သည့် ရန်ကုန်တိုင်းဒေသကြီးလွှတ်တော် ဒုတိယအကြိမ် ဆဋ္ဌမပုံမှန်အစည်းအဝေး (၂၅ရက်မြောက်နေ့) တွင် ပြောကြားသည်။

မင်္ဂလာတောင်ညွန့်မြို့နယ် မဲဆန္ဒနယ် အမှတ် (၁) လွှတ်တော်ကိုယ်စားလှယ် ဦးလှဌေး၏ “ရန်ကုန်တိုင်းဒေသကြီးအတွင်း စီးပွားရေး ပိုမိုဖွံ့ဖြိုးတိုးတက်စေရေးနှင့် ကုန်ဈေးနှုန်း ကျဆင်းစေရေးတို့အတွက် တိုင်းဒေသကြီးနှင့်ဆိုင်သော စီမံချက်၊ စီမံကိန်းများချမှတ် အကောင်အထည်ဖော်ဆောင်ရွက်ရန် အစီအစဉ်ရှိ/ မရှိ” မေးခွန်းအား ပြန်လည်ဖြေကြားရာတွင် စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းက ထည့်သွင်းပြောကြားခဲ့ခြင်း ဖြစ်သည်။

“ရန်ကုန်တိုင်းဒေသကြီး၏ ၂၀၁၇-၂၁၀၈ ဘဏ္ဍာနှစ် မတ်လအထိ နိုင်ငံခြားရင်းနှီးမြှုပ်နှံမှုဥပဒေအရ လုပ်ငန်းအရေအတွက်မှာ ၁၄၃ ခုနှင့် ရင်းနှီးမြှုပ်နှံမှုပမာဏက ဒေါ်လာ ၃၂၂၁ သန်း၊ မြန်မာနိုင်ငံသား ရင်းနှီးမြှုပ်နှံမှုအရ ခွင့်ပြုထားတာတော့ လုပ်ငန်းအရေအတွက်မှာ ၄၅ ခုနှင့် ရင်းနှီးမြှုပ်နှံမှုပမာဏ ကျပ်ဘီလျံ ၈၅၁ ရှိပါတယ်။ အလုပ်အကိုင် အခွင့်အလမ်းများကတော့ ၈၀၃၄ ဦးခန့် အလုပ်အကိုင်ရရှိလာမယ်လို့ ခန့်မှန်းထားပါတယ်” ဟု ဝန်ကြီး ဦးမြင့်သောင်းက ပြောကြားသည်။

ထို့ပြင် နိုင်ငံခြားရင်းနှီးမြှုပ်နှံမှု (FDI) အနေဖြင့်အထည်ချုပ်လုပ်ငန်းများ တိုးတက်များပြားပြီး အလုပ်အကိုင်အခွင့်အလမ်းများလည်း ပိုမိုရရှိလာနိုင်မည်ဖြစ်ကြောင်း၊ စီးပွားရေး ပိုမိုဖွံ့ဖြိုးတိုးတက်စေရေးနှင့် ကုန်ဈေးနှုန်း ကျဆင်းစေရေးကို အထောက်အကူပြုနိုင်မည်ဖြစ်ကြောင်း ဝန်ကြီးဦးမြင့်သောင်းက ပြန်လည်ဖြေကြားခဲ့သည်။

၂၀၁၇-၂၀၁၈ ဘဏ္ဍာနှစ်အတွင်း ပုံမှန်ဈေးနှုန်းအရ ရန်ကုန်တိုင်းဒေသကြီး၏ GDP တိုးတက်မှုနှုန်းများမှာ မူလလျာထားချက်အရ ၈ ဒသမ ၅ ရာခိုင်နှုန်းဖြစ်ပြီး နှစ်ကုန်ခန့်မှန်းခြေ (ယာယီ) စာရင်းအရ ၈ ဒသမ ၆ ရာခိုင်နှုန်းဖြစ်၍ တိုင်းဒေသကြီး / ပြည်နယ်များနှင့် နှိုင်းယှဉ်ပါက တိုးတက်မှုနှုန်းအများဆုံးဖြစ်သည်ကို တွေ့ရှိရပါကြောင်း၊ တိုင်းဒေသကြီး အစိုးရအဖွဲ့အနေဖြင့် မြို့သစ်စီမံကိန်းများ၊ နိုင်ငံ့ဝန်ထမ်း အငှားအိမ်ရာ၊ အရောင်းအိမ်ရာများ၊ စိုက်ပျိုးရေး၊ မွေးမြူရေးအဆင့်မြှင့်တင်ရန်အတွက် သင်တန်းကျောင်းများ၊ လယ်ယာစီးပွားရေးဝန်ဆောင်မှုစင်တာ စီမံကိန်းများ၊ ငါးလုပ်ငန်းဖွံ့ဖြိုးရန် ငါးကန်၊ ပုစွန်ကန် ဖွံ့ဖြိုးရေးကို မြန်မာနိုင်ငံငါးလုပ်ငန်းအဖွဲ့ချုပ်မှ ဦးဆောင်၍ ဆောင်ရွက်သွားမည်ဖြစ်ကြောင်း၊ Vocational Training သင်တန်းကျောင်းများ၊ စက်မှုဇုန်စီမံကိန်းများ၊ ရန်ကုန်အထူးစီးပွားရေးဇုန် (Yangon Special Economic Zone) များကိုလည်း ဆောင်ရွက်မည်ဖြစ်ကြောင်း ဝန်ကြီးမြင့်သောင်းက ပြောကြားသည်။

Most Read

Most Recent