ဆေးလိပ်ကင်းစင်ရေးဇုန်အဖြစ် ကြေညာထားသည့် ရန်ကုန်ကလေးဆေးရုံကြီးဝင်းအတွင်း တစ်နေရာကို တွေ့ရစဉ် (ဓာတ်ပုံ-အိသဉ္ဇာကျော်)
ကမ္ဘာ့ကျန်းမာရေးအဖွဲ့၊ FCTC အဖွဲ့ကြီးက FCTC 2030 စီမံချက်ဝင်နိုင်ငံများအဖြစ် နိုင်ငံပေါင်း ၁၅ နိုင်ငံကို ရွေးချယ်ရာတွင် မြန်မာနိုင်ငံပါဝင်ပြီး ယင်းနိုင်ငံများတွင် ဆေးလိပ်နှင့်ဆေးရွက်ကြီးထွက် ပစ္စည်းထိန်း ချုပ်ခြင်းဆိုင်ရာလုပ်ငန်းများတွင် အထူးပံ့ပိုးမှုများ လုပ်ဆောင်မည်ဖြစ်ကြောင်း ကျန်းမာရေးနှင့် အားကစားဝန်ကြီးဌာနမှ သိရသည်။
မေ ၈ ရက်က ပြည်သူ့ကျန်းမာရေးဦးစီးဌာန၊ မကူးစက်နိုင်သော ရောဂါများ ကာကွယ်နှိမ်နင်းရေးဌာနခွဲသည် ကမ္ဘာ့ကျန်းမာရေးအဖွဲ့၊ ဆေးလိပ်နှင့် ဆေးရွက်ကြီးထွက် ပစ္စည်းထိန်းချုပ်ခြင်းအပြည်ပြည်ဆိုင်ရာ ကွန်ဗင်းရှင်း (WHO,FCTC) ၊ ကုလသမဂ္ဂ ဖွံ့ဖြိုးမှုအစီအစဉ် (UNDP) အဖွဲ့တို့နှင့် ပူးပေါင်း၍ မြန်မာနိုင်ငံဆေးလိပ်နှင့် ဆေးရွက်ကြီးထွက်ပစ္စည်း သောက်သုံးမှုထိန်းချုပ်ရေး မဟာဗျူဟာမိတ်ဆက်ပွဲအခမ်းအနားကို နေပြည်တော်၌ ကျင်းပခဲ့ကြောင်းနှင့် မြန်မာနိုင်ငံသည် ကမ္ဘာ့ကျန်းမာရေးအဖွဲ့ FCTC အဖွဲ့ဝင်နိုင်ငံဖြစ်သည်နှင့်အညီ ဆေးလိပ်နှင့် ဆေးရွက်ကြီးသုံးစွဲမှု ထိန်းချုပ်ရေးလုပ်ငန်းများ ခိုင်မာစွာအကောင် အထည်ဖော်ဆောင်ရွက်နိုင်ရေးအတွက် ယခင်ကထက် ပိုမိုအားကောင်းစွာ ဆက်လက်ပူးပေါင်းဆောင်ရွက်မည်ဖြစ်ကြောင်း သိရသည်။
ကမ္ဘာ့ကျန်းမာရေးအဖွဲ့၏ FCTC သည် ဆေးရွက်ကြီးအသုံးပြုမှုလျှော့ချရေးအတွက် ကမ္ဘာ့နိုင်ငံများ စုပေါင်းအားထုတ်မှုပင်ဖြစ်ပြီး FCTC အရ အဖွဲ့ဝင်နိုင်ငံများသည် ဆေးရွက်ကြီးလျှော့ချမှုနှင့် ဆေးလိပ်ငွေ့ရှူရှိုက်မှုကို လျှော့ချနိုင်ရန် တိကျခိုင်မာသော သာဓကများရှိသည့် လုပ်နည်းလုပ်ဟန်များကို အကောင်အထည်ဖော်ဆောင်ရွက်ခြင်းဖြစ်ကြောင်းနှင့် FCTC ကို ၂၀၀၅ ခုနှစ်ဖေဖော်ဝါ ရီ ၂၇ ရက်က စတင်အကောင်အထည်ဖော်ဆောင်ရွက်ခဲ့ခြင်းဖြစ်ကြောင်း သိရသည်။
FCTC တွင် ပါဝင်သော အဓိကအချက်များမှာ ပြည်သူ့ကျန်းမာရေး ပေါ်လစီများကို ဆေးရွက်ကြီးကုမ္ပဏီများ၏ နှောင့်ယှက်ဟန့်တားမှုမှ အကာအကွယ်ပေးရန်အတွက် အဖွဲ့ဝင်နိုင်ငံများအား အကောင်အထည်ဖော် ဆောင်ရွက်ရမည့် Guidelines များ အကြံပြုတိုက်တွန်းထားကြောင်း၊ ဈေးနှုန်းနှင့် အခွန်အကောက်မြှင့်တင်ခြင်းသည် ဆေးရွက်ကြီးသုံးစွဲမှုကို လျော့နည်းစေသော (ထိရောက်ပြီး အရေးပါသည့်) နည်းလမ်းများဖြစ်သည့်အတွက် အမျိုးသားကျန်းမာရေး ရည်မှန်းချက်များအဖြစ် ဆေးလိပ်နှင့် ဆေးရွက်ကြီးထွက် ပစ္စည်းများအပေါ် အခွန်တိုးမြှင့်ကောက်ခံခြင်းနှင့် ဈေးနှုန်းမြှင့်တင်ခြင်း ပေါ်လစီကို ထည့်သွင်းဆောင်ရွက်ရန် တိုက်တွန်းထားကြောင်းနှင့် ထိရောက်သော အမျိုးသားအဆင့် ဆေးလိပ်ငွေ့ကင်းစင်ရေး နည်းဥပဒေကို ရေးဆွဲအကောင်အထည်ဖော်ရန် လိုအပ်ပြီး အလားအလာရှိသော တိုင်း၊ ပြည်နယ်များတွင် ဆေးလိပ်ငွေ့ကင်းစင်ရေးဥပဒေကို မိမိတို့ဒေသအလိုက်ပြုစု အကောင်အထည်ဖော်ရန် အားပေးရမည်ဖြစ်ကြောင်း ပါဝင်သည်။
