ရန်ကုန်မြို့ မင်္ဂလာဒုံမြို့နယ်ရှိ စက်မှုဇုန်တစ်ခုကို တွေ့ရစဉ် (ဓာတ်ပုံ-စည်သူအောင်)

၂၀၁၈ ခုနှစ် ဧပြီလ အာဆီယံနိုင်ငံများ ထုတ်လုပ်မှု PMI (Manufacturing Purchasing Manager’s Index- ဝယ်ယူရေးမန် နေဂျာများ၏ အညွှန်းကိန်း) ညွှန်းကိန်းတွင် ထုတ်လုပ်ရေးကဏ္ဍတွင် သိသာစွာအရှိန်ရလာသည့် မြန်မာနိုင်ငံက နှစ်လဆက်တိုက် ထိပ်ဆုံးတွင်ရပ်တည်နိုင်ခဲ့ကြောင်း Nikkei ၏ပံ့ပိုးမှုဖြင့်ပြုလုပ်သော IHS Markit ၏ စစ်တမ်းတွင် ဖော်ပြချက်အရ သိရသည်။

၂၀၁၈ ခုနှစ် ဧပြီလ အာဆီယံထုတ်လုပ်မှု PMI ညွှန်းကိန်းတွင် မြန်မာနိုင်ငံက ၅၅ ဒသမ ၅၊ ဗီယက်နမ်နိုင်ငံက ၅၂ ဒသမ ၇၊ ဖိလစ်ပိုင်နိုင်ငံက ၅၂ ဒသမ ၇၊ အင်ဒိုနီးရှားနိုင်ငံက ၅၁ ဒသမ ၆၊ စင်ကာပူနိုင်ငံက ၅၁ ဒသမ ၁၊ ထိုင်းနိုင်ငံက ၄၉ ဒသမ ၅၊ မလေးရှားနိုင်ငံက ၄၈ ဒသမ ၆ ရရှိခဲ့ပြီး စစ်တမ်းကောက်ယူသည့် အာဆီယံနိုင်ငံ ခုနစ်နိုင်ငံတွင် မြန်မာနိုင်ငံက ထိပ်ဆုံး၌ ရပ်တည်နိုင်ခဲ့ခြင်း ဖြစ်သည်။

မြန်မာနိုင်ငံတွင် ၎င်း၏ ထုတ်လုပ်ရေးကဏ္ဍ အခိုင်အမာအရှိန်ရလာခဲ့၍ ထုတ်လုပ်မှုအဆင့်အရ ဗီယက်နမ်ကို ပြီးခဲ့သည့် မတ်မှစ၍ ဖယ်ရှားလျက် အာဆီယံထိပ်ဆုံး နိုင်ငံဖြစ်လာခဲ့ကြောင်း IHS Markit က သုံးသပ်ထားသည်။ ဧပြီလ စစ်တမ်းဒေတာတွင် မြန်မာနိုင်ငံ၏ ထုတ်လုပ်ရေးကဏ္ဍတစ်ဝန်းရှိ အခြေအနေ အခိုင်အမာတိုးတက်လာခြင်းကို အချက်ပြနေပြီး ထုတ်လုပ်မှုနှင့် အော်ဒါသစ်များ တစ်ဟုန်ထိုးတိုးလာလျက် တိုးတက်မှုနှုန်း နှစ်ရပ်စလုံး၏စစ်တမ်းများ ထိပ်ဆုံးသို့ တက်လှမ်းနိုင်ခဲ့မှုက ဦးမော့နိုင်မှုတစ်ရပ်လုံးကို ပံ့ပိုးပေးခဲ့သည်။

မြန်မာနိုင်ငံဆိုင်ရာ ဝယ်ယူရေးမန်နေဂျာများ၏ အညွှန်းကိန်းသည် ၂၀၁၇ ခုနှစ် မတ်တွင် ၅၃ ဒသမ ၁ အထိရှိခဲ့ရာမှ ဧပြီတွင် ၅၂ ဒသမ ၉၊ မေတွင် ၅၂ ဒသမ ၀ ရှိခဲ့ကာ ဇွန်တွင် ၄၉ ဒသမ ၄၊ ဇူလိုင်တွင် ၄၉ ဒသမ ၁ အထိ ဆက်တိုက်ပြန်လည်ကျဆင်းခဲ့သည်။ ထို့နောက် သြဂုတ်တွင် ၄၉ ဒသမ ၃၊ စက်တင်ဘာတွင် ၄၉ ဒသမ ၄၊ အောက်တိုဘာတွင် ၅၁ ဒသ မ ၁ အထိ၊ နိုဝင်ဘာတွင် ၅၁ ဒသမ ၆ အထိ ပြန်လည်မြင့်တက်ခဲ့သော်လည်း ဒီဇင်ဘာတွင် ၅၁ ဒသမ ၁ အထိကျဆင်းခဲ့ကာ ၂၀၁၈ ခုနှစ် ဇန်နဝါရီတွင် ၅၁ ဒသမ ၇၊ ဖေဖော်ဝါရီတွင် ၅၂ ဒသမ ၆ အထိ၊ မတ်တွင် ၅၃ ဒသမ ၇၊ ဧပြီတွင် ၅ ဒသမ ၅ (၂၀၁၅ ခုနှစ် ဒီဇင်ဘာတွင်စတင်ခဲ့သည့် စစ်တမ်းကာလအတွင်း အမြင့်ဆုံး) အထိပြန်တက်ခဲ့ခြင်း ဖြစ်သည်။

Nikkei ၏ ပံ့ပိုးမှုဖြင့်ပြုလုပ်သော IHS Markit က မြန်မာနိုင်ငံ၏ ၂၀၁၈ ခုနှစ်အတွင်း ဂျီဒီပီတိုးတက်မှုနှုန်းကို ၇ ဒသမ ၆ ရာခိုင်နှုန်းရှိမည်ဟု မျှော်မှန်းထားသည်။

ဧပြီတွင် ၅၅ ဒသမ ၅ ရှိလာသည့် Nikkei မြန်မာနိုင်ငံစက်မှုကုန်ထုတ်လုပ်မှု ဝယ်ယူရေး မန်နေဂျာအညွှန်းကိန်းသည် မတ်လ၏ ၅၃ ဒသမ ၇ ထက်မြင့်လာခဲ့ပြီး စစ်တမ်း စတင်ခဲ့သည့် ၂၀၁၅ ခုနှစ် ဒီဇင်ဘာနောက်ပိုင်း အမြန်ဆုံးတိုးတက်မှုကို ပြသနိုင်ခဲ့ကာ ၂၀၁၈ ခုနှစ် ဒုတိယသုံးလပတ်ကို ခိုင်မာစွာ စတင်လိုက်ကြောင်း အချက်ပြနိုင်ခဲ့သည်။ ဆန့်ကျင်ဘက်အနေဖြင့် အလုပ်ခန့်အပ်နိုင်မှုများ တိုးတက်မှုမှာ သုံးလအတွင်းအနိမ့်ဆုံးသို့ အားပျော့သွားခဲ့ကြောင်း သိရသည်။