မွန်လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲသို့ လာရောက်လေ့လာသည့် ကယားပြည်နယ်မှ ကိုယ်စားလှယ်များအား တွေ့ရစဉ်
မွန်ပြည်နယ် ရေးမြို့တွင် မေ ၅ ရက်မှ စတင်ပြုလုပ်ခဲ့သည့် မွန်လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲသို့ ကရင်နီ အမျိုးသားတိုးတက်ရေးပါတီ (KNPP) အပါအဝင် ကယားပြည်နယ်အတွင်းရှိ တိုင်းရင်းသားလက်နက်ကိုင်အဖွဲ့အစည်းများ၊ နိုင်ငံရေးပါတီများနှင့် အရပ်ဘက်လူမှုအဖွဲ့အစည်းများ မေ ၇ ရက် (နောက်ဆုံးနေ့) တွင် ဆွေးနွေးပွဲ ပြုလုပ်ရာနေရာများသို့လာရောက်လေ့လာခဲ့သည်။
ယခုလေ့လာမှုခရီးစဉ်တွင် ကယားပြည်နယ်အတွင်းရှိ တိုင်းရင်းသားလက်နက်ကိုင် အစုအဖွဲ့၊ ကယားပြည်နယ်အခြေစိုက် နိုင်ငံရေးပါတီ အစုအဖွဲ့နှင့် ကယားပြည်နယ်အခြေစိုက် အရပ်ဘက်လူမှုအဖွဲ့အစည်း အစုအဖွဲ့တို့မှ စုစုပေါင်း ကိုယ်စားလှယ် ၃၀ ခန့်ပါဝင်လာကြောင်း သိရသည်။
မိမိတို့အနေဖြင့် NCA စာချုပ်တွင် လက်မှတ်ထိုးခြင်း မထိုးခြင်းသည် တစ်ပိုင်း ဖြစ်ကြောင်း၊ သို့သော် တိုင်းပြည်တွင်သွားနေသည့် နိုင်ငံရေးဖြစ်စဉ်တွင် မိမိတို့လည်း သိသင့်သိထိုက်၊ ပြင်ဆင်သင့် ပြင်ဆင်ထိုက်သည်များကို ပြင်ဆင်ရမည်ဟု ခံယူထားသည့်အတွက် မိမိတို့ပြည်နယ်တွင်လည်း တတ်နိုင်သမျှ စုဖွဲ့လုပ်ဆောင်နေခြင်းများလည်းရှိကြောင်း၊ တိုင်းရင်းသားများအနေဖြင့် နိုင်ငံရေးရည်မှန်းချက်ကို ပြောရမည်ဆိုပါက ဖက်ဒရယ်စနစ်ကို အခြေခံခြင်းသည် အားလုံးတူညီကြောင်း၊ ထို့ပြင် အမျိုးသားအဆင့် နိုင်ငံရေးဆွေးနွေးပွဲများ ကျင်းပပြီးမှ ပြည်ထောင်စု အဆင့်ဆွေးနွေးသည့်အခါတွင် မိမိတို့တိုင်းရင်းသားများကြား၌ အခြေခံမူများကွဲလွဲနေ၍ မရကြောင်း၊ သို့ဖြစ်၍ ကြိုတင်ပြင်ဆင်နေသည့် နည်းတူ ယခု မွန်ပြည်နယ်တွင်ပြုလုပ်နေသည့် အမျိုးသားအဆင့် နိုင်ငံရေးဆွေးနွေးပွဲ၌ ပြင်ဆင်နေသော ကဏ္ဍငါးရပ်၏ အခြေခံအပိုင်းများကို မည်သို့ စဉ်းစားနေကြသည်ကို မိမိတို့လာရောက်လေ့လာခြင်းဖြစ်ကြောင်း KNPP အထွေထွေအတွင်းရေးမှူး ဦးရွှေမျိုးသန့်က ပြောကြားသည်။
“ကျွန်တော်တို့ တိုင်းရင်းသားတွေအနေနဲ့ဖက်ဒရယ်ပြည်ထောင်စုတစ်ခု တည်ဆောက်မယ်ဆိုတဲ့ ခံယူချက်အပေါ်မှာ အစောပိုင်းကတည်းက ကျွန်တော်တို့ကြားထဲမှာ လက်တွေ့ကျတဲ့ ပူးပေါင်းဆောင်ရွက်မှုတွေ လုပ်ဆောင်ပြီးသွားပြီ။ ဖက်ဒရယ်နိုင်ငံရေး စနစ်တွေ၊ ပြည်နယ် ဖွဲ့စည်းပုံအခြေခံဥပဒေတွေ ကျွန်တော်တို့ကြားမှာ အစောကြီးကတည်းက လက်တွေ့ကျကျလေ့လာတာ၊ ဆည်းပူးတာ၊ အတူတကွပူးပေါင်းဆောင်ရွက်တာတွေက ရှိပြီးသားပါ။ ဒီတော့အခု အမျိုးသားအဆင့် နိုင်ငံရေးဆွေးနွေးပွဲကို ကြည့်လိုက်ရင် ကြီးကြီးမားမားကွဲလွဲတာ ဘာမှမရှိဘူး။ မတွေ့ရဘူး။ အခြေခံကြောရိုးတွေက ကျွန်တော်တို့ ကြားထဲမှာ အတူတူပဲ ဖြစ်ပါတယ်။ ဒီမှာဆွေးနွေးတာ အားရစရာကောင်းသလို လက်တွေ့လည်းဆန်ပါတယ်။ ဖက်ဒရယ်စနစ်အခြေခံ တည်ဆောက်မယ့် အဓိကကြောရိုးတွေဖြစ်တဲ့ အချုပ်အခြာအာဏာတွေ၊ နိုင်ငံတော်တည်ဆောက်ရေးစနစ်တွေ ပြည်နယ်အခြေ ခံအယူအဆတွေ၊ အခွင့်အရေးဆိုင်ရာကိစ္စရပ်တွေ ဒါတွေ ကျွန်တော်တို့ကြားထဲမှာ ကြီးမားတဲ့ ကွဲပြားခြားနားမှုမရှိဘူး။ အားလုံးက အတူတူပါပဲ” ဟု KNPP အထွေထွေအတွင်းရေးမှူး ဦးရွှေမျိုးသန့်က ပြောကြားသည်။
လက်ရှိတွင် KNPP သည် NCA မရေးထိုးနိုင်သေးသည့် ကာလဖြစ်သောကြောင့် မိမိတို့ပြည်နယ်တွင် တရားဝင်နိုင်ငံရေး ဆွေးနွေးပွဲများ ကျင်းပခွင့်မရှိသေးဘဲ အကယ်၍ လက်မှတ်ရေးထိုးခဲ့ပါက လက်ရှိငြိမ်းချမ်းရေး ဖြစ်စဉ်၏ အနေအထားအရ အခြားသောပြည်နယ်များမှ တိုင်းရင်းသားညီအစ်ကိုများက မည်သို့သဘောထားအနေအထားရှိသည်ကို မိမိတို့လေ့လာသုံးရန် စီစဉ်၍လာခြင်းဖြစ်ကြောင်း ကယန်းအရပ်ဘက်အဖွဲ့အစည်းမှ ကိုယ်စားလှယ် ဦးကျော်ထင်အောင်က ပြောကြားသည်။
“ကျွန်တော်တို့ကတော့ ဒါသည် လေ့လာသင့်တယ်။ ဘာကြောင့်လဲဆိုတော့ မွန်လူမျိုးတွေကလည်း လက်မှတ်သာထိုးသွားတယ်။ အောက်ခြေအဆင့်မှာ လူ ၃၀ ထက် မပိုရဆိုတဲ့ အမိန့်ပေးခြင်းတွေခံရတယ်။ တကယ်တမ်း လွတ်လွတ်လပ်လပ် လုပ်ကိုင်ခွင့်မရဘူး။ အခုလိုမျိုး ရေးမြို့မှာဆိုရင်လည်း တော်တော်လေးကို အခက်အခဲကြားထဲကနေ အချိန်အတိုင်းအတာကနေ နောက်ဆုတ်နောက် ဆုတ်လာရတယ်ဆိုတော့ ဒီလိုမျိုး အနေအထားတွေကိုလည်း ကျွန်တော်တို့က လေ့လာဖို့လိုအပ်တယ်။ ဒါပေမဲ့ ဒီလေ့လာမှုခရီးစဉ်သည် ကျွန်တော်တို့ပြည်နယ်မှာရှိနေတဲ့ အစုအဖွဲ့သုံးစုရဲ့ လေ့လာမှုခရီးစဉ်ပဲဖြစ်ပြီးတော့ KNPP တစ်ဖွဲ့တည်းရဲ့ သဘောထားတော့ မဟုတ်ပါဘူး” ဟု ဦးကျော်ထင်အောင်က ပြောကြားသည်။
ထို့ပြင် KNPP ပါဝင်သည့် လေ့လာရေးအဖွဲ့နှင့် မွန်လူမျိုးအလိုက်အမျိုးသားအဆင့် နိုင်ငံရေးဆွေးနွေးပွဲ ကျင်းပရေးကော်မတီတို့သည် ယနေ့ (မေ ၈ ရက်) တွင် တွေ့ဆုံဆွေးနွေးမည်ဖြစ်ကြောင်း သိရသည်။
