ရန်ကုန်တိုင်းဒေသကြီး မြို့ပြဖွံ့ဖြိုးမှု မဟာဗျူဟာရေးဆွဲခြင်း စီမံကိန်း အနှစ်ချုပ်အစီရင်ခံစာနှင့် ဘက်စုံဖွံ့ဖြိုးမှု အခြေခံ အချက်အလက်များ အဆိုပြုချက်တို့ကို လွှတ်တော်၌ ဆွေးနွေးနိုင်ရန် တိုင်းအစိုးရက ရှင်းလင်းတင်ပြ

ရန်ကုန်တိုင်းဒေသကြီး မြို့ပြဖွံ့ဖြိုးမှု မဟာဗျူဟာရေးဆွဲခြင်း စီမံကိန်း အနှစ်ချုပ်အစီရင်ခံစာနှင့် ဘက်စုံဖွံ့ဖြိုးမှု အခြေခံ အချက်အလက်များ အဆိုပြုချက်တို့ကို လွှတ်တော်၌ ဆွေးနွေးနိုင်ရန် တိုင်းအစိုးရက ရှင်းလင်းတင်ပြ
Published 8 May 2018

မေ ၇ ရက်က ပြုလုပ်သည့် ဒုတိယအကြိမ် ရန်ကုန်တိုင်းဒေသကြီးလွှတ်တော် ဆဋ္ဌမပုံမှန် အစည်းအဝေးကို မစတင်မီ တွေ့ရစဉ်

ရန်ကုန်တိုင်းဒေသကြီး မြို့ပြဖွံ့ဖြိုးမှု မဟာဗျူဟာရေးဆွဲခြင်း စီမံကိန်း အနှစ်ချုပ် အစီရင်ခံစာနှင့် ဘက်စုံဖွံ့ဖြိုးမှု အခြေခံအချက်အလက်များ အဆိုပြုချက်တု့ိကို ရန်ကုန်တိုင်းဒေသကြီး အစိုးရက လွှတ်တော်၌ ဆွေးနွေးနိုင်ရန် ရှင်းလင်းတင်ပြခဲ့သည်။

အဆိုပါ အစီရင်ခံစာနှင့် အဆိုပြုချက် ကို မေ ၇ ရက်က ပြုလုပ်သည့် ဒုတိယအကြိမ် ရန်ကုန်တိုင်းဒေသကြီး လွှတ်တော် ဆဋ္ဌမပုံမှန် အစည်းအဝေး (၂၄ ရက်မြောက်နေ့) တွင် ရန်ကုန်တိုင်းဒေသကြီး အစိုးရအဖွဲ့ စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းက လွှတ်တော်၌ ရှင်းတင်းတင်ပြခဲ့သည်။

ရန်ကုန်တိုင်းဒေသကြီး မြို့ပြဖွံ့ဖြိုးမှု မဟာဗျူဟာရေးဆွဲခြင်း စီမံကိန်း အနှစ်ချုပ် အစီရင်ခံစာတွင် အပိုင်းငါးပိုင်း ပါဝင်ပြီး အပိုင်း (၁) တွင် နောက်ခံအကြောင်းအရာများ၊ စီမံကိန်းရေးဆွဲရသည့် ရည်ရွယ်ချက်များ၊ လေ့လာမည့် စီမံကိန်းဧရိယာများ၊ စီမံကိန်း အကောင်အထည်ဖော်မည့် အဖွဲ့အစည်းများ၊ စီမံကိန်းမူဘောင်၊ ရန်ကုန်မြို့၏ ခြုံငုံသုံးသပ်ချက်များ ဖော်ပြထားကြောင်း သိရသည်။

အပိုင်း (၂) တွင် ရန်ကုန်မြို့၏ အနာဂတ်မျှော်မှန်းချက်ကို ဖော်ပြထားကြောင်း၊ အပိုင်း (၃) မြို့ပြတည်ဆောက်မှု ပုံစံနှင့် ဖွဲ့စည်းမှုပုံစံတို့ကို ဖော်ပြထားကြောင်း၊ အပိုင်း (၄) တွင်  ဖွံ့ဖြိုးမှုနေရာများနှင့် လုပ်ဆောင်ချက်များကို ဖော်ပြထားပြီး ကုန်သွယ်ရေးနှင့် စီးပွားရေး တိုးတက်အောင် မည်သို့လုပ်ဆောင်ချက်များ၊ စက်မှုလက်မှု လုပ်ငန်းများ လုပ်ဆောင်ချက်များ၊ အိမ်ယာလုပ်ငန်း တိုးခဲျ့လုပ်ဆောင်ချက်များ၊ သဘာဝပတ်ဝန်းကျင်နှင့် ပတ်သက်သည့် မြို့ပြရှုခင်းများ၊ သမိုင်းအမွေအနှစ်များ ထိန်းသိမ်းမှု၊ ရန်ကုန်မြို့တွင် ကာဗွန်ထွက်ရှိမှုနည်းအောင် ပြုလုပ်မည့် အစီအမံများ၊ အခြေခံအဆောက်အဦးကဏ္ဍ တိုးတက်ရန် ရေပေးမှုစနစ်၊ မိလ္လာနှင့် ရေဆိုးစွန့်ပစ်မှုစနစ်၊ ရေမြောင်းများ ရေစီးရေလာ ကောင်းစေရန်စနစ်၊ ဆက်သွယ်ရေး၊ သဘာ၀ ဘေးအန္တရာယ်ခန့်ခွဲမှု စသည်တို့ ပါဝင်ကြောင်း သိရသည်။

ထို့ပြင် အပိုင်း (၅) တွင် မြို့ပြဖွံ့ဖြိုး တိုးတက်မှုအတွက် စီမံခန့်ခွဲမှုအစီအစဉ်များကို ရေးဆွဲထားကြောင်း ဝန်ကြီးဦးမြင့်သောင်းက ရှင်းလင်းတင်ပြခဲ့သည်။

ရန်ကုန်တိုင်းဒေသကြီး မြို့ပြဖွံ့ဖြိုးမှု မဟာဗျူဟာရေးဆွဲခြင်း စီမံကိန်းသည် ရန်ကုန်တိုင်းဒေသကြီး အစိုးရနှင့် စည်ပင်သာယာကော်မတီမှ ကြီးကြပ်ပြီး ဂျပန်အပြည်ပြည်ဆိုင်ရာ ပူးပေါင်းရေးအေဂျင်စီ (JICA) တို့မှ ရေးဆွဲထားသည့် စီမံကိန်းတစ်ရပ်ဖြစ်ကြောင်း သိရသည်။

အဆိုပါစီမံကိန်း အစီရင်ခံစာကို ၂၀၁၈ ခုနှစ် မေ ၃ ရက်တွင် ကျင်းပသည့် ရန်ကုန်တိုင်းဒေသကြီး အစိုးရအဖွဲ့ အစည်းအဝေး (၁၈/၂၀၁၈) တွင် ဆွေးနွေးအတည်ပြုခဲ့ကြောင်း သိရသည်။

အလားတူ ရန်ကုန်မြို့ ဘက်စုံဖွံ့ဖြိုးမှု အခြေခံအချက်အလက်များ အဆိုပြုချက်ကို လွှတ်တော်၌ ဆွေးနွေးနိုင်ရန် စီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းက ရှင်းလင်းတင်ပြခဲ့သည်။

အဆိုပြုချက်တွင် ရန်ကုန်မြို့ ဘက်စုံဖွံ့ဖြိုးတိုးတက်ရန် အခြေခံအားဖြင့် ဆောင်ရွက်ရမည့် အချက်အလက်များကို အပိုင်း (၂၁) ပိုင်းဖြင့် ဖော်ပြထားပြီး ရန်ကုန်တိုင်း ဒေသကြီးအတွင်း လူဦးရေပျံ့နှံမှုများ၊ မြေအသုံးချမှုများ၊ အိမ်ရာနှင့် မြေယာကဏ္ဍ၊ အခြေခံ အဆောက်အအုံများကဏ္ဍ၊ လူထုအခြေခံ အဆောက်အအုံများ၊ လမ်းပန်းဆက်သွယ်ရေးနှင့် ဆောက်လုပ်ရေးကဏ္ဍ၊ ဈေးတည်နေရာများ၊ ပြည်သူလူထုအတွက် အလုပ်အကိုင်နှင့် စက်မှုလက်မှုကဏ္ဍ၊ ပန်းခြံနှင့် စိမ်းလန်းဧရိယာများ၊ သမိုင်းအမွေအနှစ် ထိန်းသိမ်းရေးကဏ္ဍ၊ ရန်ကုန်မြို့၏ မြို့သစ်များ တိုးချဲ့ရေးကဏ္ဍ၊ အခြားတိုင်း/ပြည်နယ်များနှင့် စီးပွားရေး တိုးတက်ဖွံ့ဖြိုးမှု ကွာဟမှုများ၊ ရန်ကုန်မြို့ ဖွံ့ဖြိုးမှုနှင့် နိုင်ငံခြား အကူအညီ ရရှိမှုအခြေအနေ စသည်တို့ကို ဖော်ပြထားကြောင်း ဝန်ကြီးဦးမြင့်သောင်းက ရှင်းလင်းတင်ပြခဲ့သည်။

အဆိုပါ ရန်ကုန်မြို့ ဘက်စုံဖွံ့ဖြိုးမှု အခြေခံ အချက်အလက်များ အဆိုပြုချက်ကို စည်ပင်သာယာရေး ကော်မတီ၊ မြို့ပြစီမံကိန်းဌာနမှ ရေးဆွဲထားခြင်း ဖြစ်ကြောင်း သိရသည်။

Most Read

Most Recent