ဦးကိုကိုကြီးအပါအဝင် နိုင်ငံရေးမျိုးဆက်များပါဝင်မည့် ရှစ်လေးလုံးပြည်သူ့ပါတီမှ အသုံးပြုသွားမည့် ပါတီအမည်၊ အလံနှင့် တံဆိပ်တို့ကို ကန့်ကွက်လိုပါက ခုနစ်ရက်အတွင်း ကန့်ကွက်နိုင်ကြောင်း ပြည်ထောင်စု ရွေးကောက်ပွဲကော်မရှင်က မေ ၅ ရက်တွင် သတင်းထုတ်ပြန်ခဲ့သည်။
ရှစ်လေးလုံးပြည်သူ့ပါတီသည် ဧပြီ ၆ ရက်က ပြည်ထောင်စု ရွေးကောက်ပွဲကော်မရှင်ထံသို့ ပါတီတည်ထောင်ခွင့် လျှောက်ထားခဲ့ပြီး ဧပြီ ၂၆ ရက်တွင် ကော်မရှင်ထံမှ ပါတီတည်ထောင်ခွင့်ပြုကြောင်း အကြောင်းကြားစာ ရရှိပြီးနောက် နိုင်ငံရေးပါတီအဖြစ် မှတ်ပုံတင်ခွင့်ပြုရန် မေ ၂ ရက်တွင် ကော်မရှင်ထံသို့ ဆက်လက်လျှောက်ထားခဲ့ခြင်းဖြစ်သည်။
ထိုသို့ လျှောက်ထားပြီးနောက် သုံးရက်အကြာ မေ ၅ ရက်တွင် ပြည်ထောင်စု ရွေးကောက်ပွဲကော်မရှင်က “ရန်ကုန်တိုင်းဒေသကြီး၊ တောင်ဥက္ကလာပမြို့နယ် (၉) ရပ်ကွက်၊ သုမင်္ဂလာလမ်း၊ ပထမထပ်(ခ)၊ အမှတ် (၂၇၉) တွင် ပါတီရုံးချုပ်တည်ရှိသော ရှစ်လေးလုံးပြည်သူ့ပါတီ (The Four Eight People's Party) က နိုင်ငံရေးပါတီများ မှတ်ပုံတင်ခြင်း ဥပဒေပုဒ်မ ၅ အရ နိုင်ငံရေးပါတီအဖြစ် မှတ်ပုံတင်ခွင့်ပြုရန် မေ ၂ ရက်တွင် လျှောက်ထားလာကြောင်းနှင့် ယင်းအဖွဲ့အစည်းက အသုံးပြုမည့် ပါတီအမည်၊ အလံနှင့် တံဆိပ်တို့ကို ကန့်ကွက်လိုက ကြေညာသည့်နေ့မှစ၍ ခုနစ်ရက်အတွင်း ခိုင်လုံသော အထောက်အထားများဖြင့် ပြည်ထောင်စု ရွေးကောက်ပွဲကော်မရှင်သို့ ကန့်ကွက်နိုင်ကြောင်း နိုင်ငံရေးပါတီများ မှတ်ပုံတင်ခြင်း နည်းဥပဒေ ၁၄ (ဃ) အရ အများသိစေရန် ကြေညာအပ်သည်” ဟု သတင်းထုတ်ပြန်ခဲ့ခြင်းဖြစ်သည်။
ကန့်ကွက်လိုသူများရှိပါက မည်သူမဆို ကန့်ကွက်နိုင်ပြီး ရှစ်လေးလုံးပြည်သူ့ပါတီက အသုံးပြုမည့် ပါတီအမည်၊ အလံ၊ တံဆိပ်တို့နှင့် ပတ်သက်၍လည်း ပြည်ထဲရေးဝန်ကြီးဌာနကို သဘောထားမှတ်ချက် တောင်းခံထားကြောင်း၊ ကန့်ကွက်မှု တစ်စုံတစ်ရာမရှိပါက ရှစ်လေးလုံးပြည်သူ့ပါတီအား နိုင်ငံရေးပါတီအဖြစ် မှတ်ပုံတင်ခွင့်ပြု၊ မပြုကို ပြည်ထောင်စု ရွေးကောက်ပွဲကော်မရှင်က ဆုံးဖြတ်အတည်ပြုရမည်ဖြစ်ကြောင်း ကော်မရှင်၏ ပြောရေးဆိုခွင့်ရှိသူ ဦးမြင့်နိုင်က ပြောကြားသည်။
ရှစ်လေးလုံးပြည်သူ့ပါတီအနေဖြင့် နိုင်ငံရေးပါတီအဖြစ် မှတ်ပုံတင်ခွင့်ရရှိပါကလည်း မှတ်ပုံတင်ခွင့်ရရှိသည့်နေ့မှ စတင်ကာ ရက်ပေါင်း ၉၀ အတွင်း ပြည်ထောင်စုတစ်ဝန်းလုံးရှိ စည်းရုံးမည့်ပါတီဖြစ်ပါက ပါတီဝင်ဦးရေ အနည်းဆုံး ၁၀၀၀ ကိုလည်းကောင်း၊ တိုင်းဒေသကြီး (သို့မဟုတ်) ပြည်နယ်တစ်ခုအတွင်းသာ စည်းရုံးမည့်ပါတီဖြစ်ပါက ပါတီဝင်ဦးရေ အနည်းဆုံး ၅၀၀ ကိုလည်းကောင်း ပြည့်မီရန် စည်းရုံးရမည်ဖြစ်သည်။
နိုင်ငံရေးပါတီများ မှတ်ပုံတင်ခြင်းနည်းဥပဒေတွင် ‘နိုင်ငံရေးပါတီအဖြစ် မှတ်ပုံတင်ခွင့်ရရှိသောပါတီသည် မှတ်ပုံတင်ခွင့်ရရှိသည့် နေ့ရက်မှစ၍ ရက်ပေါင်း ၉၀ အတွင်း ဥပဒေပုဒ်မ ၅ (စ) ပါအတိုင်း ပြည်ထောင်စုတစ်ဝန်းလုံးတွင် စည်းရုံးမည့်ပါတီဖြစ်ပါက ပါတီဝင်ဦးရေ အနည်းဆုံး ၁၀၀၀ ကိုလည်းကောင်း၊ တိုင်းဒေသကြီး သို့မဟုတ် ပြည်နယ်တစ်ခုအတွင်း၌သာ စည်းရုံးမည့်ပါတီဖြစ်ပါက ပါတီဝင်ဦးရေ အနည်းဆုံး ၅၀၀ ကိုလည်းကောင်း ပြည့်မီအောင် စည်းရုံးရမည်ဖြစ်ပြီး မိမိတို့စည်းရုံးရရှိထားသည့် ပါတီဝင် အင်အားစာရင်းကို မြို့နယ်အလိုက် စုစည်း၍ ပုံစံ (ဇ) နှစ်စုံပြုစုပြီး ကော်မရှင်သို့ တင်ပြရမည်’ ဟုဖော်ပြထားသည်။
ထိုကဲ့သို့ အချက်အလက်များပြည့်စုံ၍ နိုင်ငံရေးပါတီအဖြစ် ရပ်တည်ခွင့်ရှိလာပါကလည်း လက်ရှိတည်ဆဲဥပဒေ၊ နည်းဥပဒေများအရ အနီးကပ်ဆုံးဖြစ်သည့် ရွေးကောက်ပွဲတစ်ခုခုတွင် အနည်းဆုံး မဲဆန္ဒနယ် ၃ နေရာအတွက် မဖြစ်မနေ ဝင်ရောက်ယှဉ်ပြိုင်သွားရမည်ဖြစ်သည်။
“ကျွန်တော်တို့ပါတီကတော့ တစ်နိုင်ငံလုံးအတိုင်းအတာဖြင့် ထူထောင်ဖို့ ဆုံးဖြတ်ချက်ချထားတယ်။ ကြားဖြတ်ရွေးကောက်ပွဲနဲ့ ပတ်သက်ရင်တော့ ဥပဒေရဲ့လိုအပ်ချက်အရ အနိမ့်ဆုံးသုံးဦး ဝင်ရောက်ယှဉ်ပြိုင်ရမယ်။ ဒါကတော့ မဝင်မနေရဖြစ်တဲ့အတွက် ဒါကိုတော့ ဝင်ရမယ့်ဆိုတဲ့ အခြေအနေကတော့ ရှိပြီးသား။ သို့သော် ကြားဖြတ်ရွေးကောက်ပွဲမှာ ကျွန်တော်တို့ပါတီအနေနဲ့ နေရာဘယ်လောက်မှာ ဝင်ပြိုင်မယ်ဆိုတာတော့ မဆုံးဖြတ်ရသေးဘူး။ လောလောဆယ်ပြောနိုင်တာတော့ ကြားဖြတ်ရွေးကောက်ပွဲ ကျင်းပတဲ့အချိန် ကျွန်တော်တို့ပါတီအနေနဲ့ တရားဝင်နိုင်ငံရေးပါတီအဖြစ် အသိအမှတ်ပြုပြီးသွားရင်တော့ သုံးနေရာဝင်ပြိုင်ရမယ်။ ပြိုင်ဖို့လည်း ဆုံးဖြတ်ထားတယ်” ဟု ရှစ်လေးလုံးပြည်သူ့ပါတီမှ ဦးရဲနိုင်အောင်က ပြောကြားထားသည်။
