ပြည်တွင်း၌ ပုဂ္ဂလိကဆေးရုံဆိုင်ရာများ ရင်းနှီးမြှုပ်နှံမှု ဆောင်ရွက်မည်ဆိုပါက (MIC) ၏ သတ်မှတ်ထားသည့် စည်းကမ်းချက် ခုနစ်ချက်နှင့်အညီ ပြည့်စုံအောင် ဆောင်ရွက်ရမည် ဖြစ်ကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) မှ သိရသည်။

မြန်မာနိုင်ငံ ရင်းနှီးမြှုပ်နှံမှုကော်မရှင်၏ အမိန့်ကြော်ငြာစာအမှတ် (၁၅/၂၀၁၇) အပိုဒ် (ဃ) အပိုဒ်ခွဲ (၉) ပါ ကျန်းမာရေးနှင့် အားကစားဝန်ကြီးဌာန၏ အတည်ပြုချက် ရယူဆောင်ရွက်ရမည့် လုပ်ငန်းများအတွက် လုပ်အပ်သည့် စံသတ်မှတ်ချက်များတွင် ဖော်ပြထားသည်။

အဆိုပါ အမိန့်ကြော်ငြာစာအရ ပြည်တွင်း၌ ပုဂ္ဂလိကဆေးရုံ လုပ်ငန်းဆိုင်ရာ ရင်းနှီးမြှုပ်နှံမည့်သူများအတွက် သတ်မှတ်ချက်များသည် ပတ်ဝန်းကျင်ကို ထိခိုက်မှု မရှိစေရေး၊ ကူးစက်ရောဂါ မပြန့်ပွားစေရေးနှင့် စွန့်ပစ်ပစ္စည်းများကို သတ်မှတ်ထားသော စံနှင့်အညီ စနစ်တကျ စွန့်ပစ်ရေးတို့အတွက် ဆောင်ရွက်ထားရမည် ဖြစ်သည်။

သန့်ရှင်းသော သောက်ရေ၊ သုံးရေ လုံလောက်စွာ ရရှိစေရေးအတွက် စီစဉ်ဆောင်ရွက်ခြင်း၊ ရေနှင့် မိလ္လာစနစ်ကို စနစ်တကျ စီစဉ်ဆောင်ရွက်ခြင်း၊ ဘေးအန္တရာယ် ကြိုတင်ကာကွယ်မှုနှင့် အရေးပေါ် ကယ်ဆယ်ရေးအတွက် စနစ်တကျ စီစဉ်ဆောင်ရွက် ထားရမည်ဖြစ်ကြောင်း ဖော်ပြထားသည်။

ထို့ပြင် ကောင်းမွန်သော ဆက်သွယ်ရေးစနစ်ရှိခြင်း၊ လျှပ်စစ်မီး (၂၄) နာရီပတ်လုံး ရရှိရေးအတွက် စီစဉ်ဆောင်ရွက်ထားခြင်းနှင့် သေဆုံးသူ လူနာများအတွက် သတ်မှတ်ထားသည့် အစီအစဉ်များ စသည့် စံသတ်မှတ်ချက် (၇) ခုကို ပြည့်စုံအောင် ဆောင်ရွက်ထားရမည် ဖြစ်ကြောင်း ရင်းနှီးမြှုပ်နှံမှုကော်မရှင်မှ သိရသည်။

မြန်မာနိုင်ငံ ရင်းနှီးမြှုပ်နှံမှုကော်မရှင်အနေဖြင့် ရင်းနှီးမြှုပ်နှံမှုလုပ်ငန်းများကို ခွင့်ပြုပေးရာတွင် လုပ်ငန်း၏ စီးပွားရေးတွက် ခြေကိုက်မှု၊ အလုပ်အကိုင်သစ်များ ဖန်တီးပေးနိုင်မှု၊ အမျိုးသားဝင်ငွေနှင့် အခွန်တိုးတက် ရရှိနိုင်မှု၊ ပြည်တွင်းပြည်ပ ဈေးကွက် အခြေအနေ၊ ပြည်တွင်း စားသုံးရန် လိုအပ်ချက်၊ နည်းပညာ ဆီလျော်မှု၊ တီထွင်ဆန်းသစ်မှု၊ နည်းပညာ လွှဲပြောင်းရရှိမှု၊ ပတ်ဝန်းကျင် ထိခိုက်မှုနှင့် လူမှုရေးထိခိုက်မှု ထိန်းသိမ်းကာကွယ်ရေး ဆောင်ရွက်မှုအစီအမံများ၊ တာဝန်ယူမှုရှိသော ရင်းနှီးမြှုပ်နှံမှုဖြစ်ခြင်းနှင့် တည်ဆဲ ဥပဒေများကို လိုက်နာခြင်း စသည့် အချက်များကို အခြေခံ၍ စိစစ်ခြင်းဖြစ်ကြောင်း သိရသည်။

ပြည်နယ်နှင့် တိုင်းဒေသကြီးများရှိ ရင်းနှီးမြှုပ်နှံမှုကော်မတီများက ရင်းနှီးမြှုပ်နှံမှု ပမာဏ ဒေါ်လာ ငါးသန်း သို့မဟုတ် ကျပ်သန်း ၆၀၀၀ အထိရှိသည့် ရင်းနှီးမြှုပ်နှံမှု လုပ်ငန်းများကို ခွင့်ပြုပေးလျက် ရှိကြောင်း၊ လက်ရှိအချိန်၌ ပြည်နယ်နှင့် တိုင်းဒေသကြီးများတွင်လည်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန (DICA) တစ်နည်းအားဖြင့် မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) ရုံးများကို ဖွင့်လှစ်ထားပြီ ဖြစ်သည်။

၂၀၃၀ ပြည့်နှစ်အထိ မြန်မာနိုင်ငံတွင်းသို့ နိုင်ငံခြား တိုက်ရိုက် ရင်းနှီးမြှုပ်နှံမှုတန်ဖိုး ဒေါ်လာ သန်းထောင်ပေါင်း ၁၄၀ အထိ ရရှိရန် ရည်မှန်းထားကြောင်း စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပြောကြားသည်။

လက်ရှိအချိန်တွင်မူ ကာလရှည်နိုင်ငံခြား တိုက်ရိုက် ရင်းနှီးမြှုပ်နှံမှုတိုးမြှင့်ရေးဆိုင်ရာ စီမံကိန်းကို ပြင်ဆင်ပြီး ပြန်လည် သုံးသပ်လျက်ရှိကြောင်း ဝန်ကြီးဦးကျော်ဝင်းက ဆက်လက်ပြောကြားသည်။