မေ ၃ ရက်က ပြုလုပ်သည့် ရန်ကုန်တိုင်းဒေသကြီး လွှတ်တော်သို့ တက်ရောက်လာသည့် တိုင်းဒေသကြီး အစိုးရအဖွဲ့ကို တွေ့ရစဉ်
မရမ်းကုန်းမြို့နယ်အတွင်း ကျပ် ၃၁ ဘီလျံကျော် အသုံးပြုပြီး ရှစ်လေးလုံး အထိမ်းအမှတ်ပြတိုက် ပါဝင်မည့် ပါရမီအဆင့်မြင့် စီးပွားရေးနှင့် ဘက်စုံဖွံ့ဖြိုးရေး စီမံကိန်းအား အကောင်အထည်ဖော် ဆောင်ရွက်မည် ဖြစ်ကြောင်း ရန်ကုန်တိုင်းဒေသကြီး မြို့ပြဖွံ့ဖြိုးရေးဆိုင်ရာ လုပ်ငန်းစီမံကိန်း အစီရင်ခံစာ (၂၀၁၈-၂၀၂၁) အရ သိရသည်။
အဆိုပါ အစီရင်ခံစာတွင် ရန်ကုန်မြို့တော် စည်ပင်သာယာရေး ကော်မတီမှ မရမ်းကုန်းမြို့နယ်ရှိ အရန်မြေအား ထိရောက်သော မြို့မြေအသုံးချမှု ဖြစ်ပေါ်စေရန် ရန်ကုန်တိုင်းဒေသကြီး အစိုးရအဖွဲ့မှ လွှဲပြောင်းရယူခဲ့ကြောင်း၊ အဆိုပါနေရာသည် စီးပွားရေးအရ အချက်အချာကျသော ပါရမီလမ်းပေါ်တွင် တည်ရှိသောကြောင့် တိုင်းဒေသကြီးအတွက် အကျိုးဖြစ်ထွန်းနိုင်သော မြို့မြေအသုံးချမှု ဖြစ်ပေါ်စေရန်၊ မြို့မြေအသုံးချမှု ပေါ်ထွက်လာသည့် စီးပွားရေး အကျိုးအမြတ်များကို လူမှုရေးအရ အကျိုးဖြစ်ထွန်းစေမည့် ပြည်သူလူထု နေရေးအဆင့်မြှင့်တင်ပေးမည့် ပြည်သူ့အရောင်းအိမ်ရာ စီမံကိန်းများတွင် Subsidy ဖြင့် ရင်းနှီးစိုက်ထုတ် ဖော်ဆောင်ပေးနိုင်ရန်၊ ရှစ်လေးလုံး အထိမ်းအမှတ် ပြတိုက်အား အဆင့်အတန်းမြင့်မြင့် ဖော်ဆောင်နိုင်ရန်နှင့် အခြားမြို့ပြ ဖွံ့ဖြိုးရေးအတွက် ပါရမီအဆင့်မြင့် စီးပွားရေးနှင့် ဘက်စုံဖွံ့ဖြိုးရေး စီမံကိန်းကို အဆိုပြု တင်ပြခြင်း ဖြစ်ကြောင်း သိရသည်။
အဆိုပါ စီမံကိန်းနေရာသည် မရမ်းကုန်းမြို့နယ်ရှိ မြေနှစ်ဧကတွင် ၃၁ ဒသမ ၃၆၄ ဘီလျံ ကုန်ကျခံကာ ကာလတို စီမံကိန်းအဖြစ် ၂၀၁၈-၂၀၁၉ တွင် အကောင်အထည်ဖော် ဆောင်ရွက်မည် ဖြစ်ကြောင်း အစီရင်ခံစာတွင် ဖော်ပြထားသည်။
စီမံကိန်း ရည်မှန်းချက်သည် ထိရောက်သော မြို့မြေအသုံးချမှု ဖြစ်ပေါ်လာစေရန်၊ လူထု၏ ဒီမိုကရေစီအောင်ပွဲ ပြတိုက်ဖြစ်သော ရှစ်လေးလုံး အထိမ်းအမှတ်ပြတိုက်ကို အဆင့်အတန်းမီ တည်ဆောက်နိုင်ရန်၊ စီးပွားရေး အကျိုးအမြတ်များကို လူမှုရေးအရ အကျိုးဖြစ်ထွန်းစေမည့် ပြည်သူလူထုနေရေး အဆင့်မြှင့်တင်ပေးမည့် ပြည်သူ့အရောင်းအိမ်ရာ စီမံကိန်းများတွင် Cross Subsidy ဖြင့် ရင်းနှီးစိုက်ထုတ် ဖော်ဆောင်ပေးနိုင်ရန် ဖြစ်ကြောင်း၊ အလုပ်အကိုင် အခွင့်အလမ်းများ ဖန်တီးနိုင်ရန်၊ နိုင်ငံတကာစီးပွားရေး လုပ်ငန်းများအတွက် ကမ္ဘာ့အဆင့်မီ စီးပွားရေး အဆောက်အအုံနှင့် ပတ်ဝန်းကျင်ကောင်း ဖန်တီးပေးရန်၊ ရန်ကုန်မြို့တော်၏ ဖွံ့ဖြိုးမှုဥပဓိကို မြှင့်တင်နိုင်ရန်တို့ ဖြစ်ကြောင်း၊ လက်ရှိအချိန်တွင် မြေတိုင်းတာခြင်းနှင့် စီမံကိန်း ဖြစ်တန်စွမ်းကို အကြိုလေ့လာခြင်းများ ပြုလုပ်ပြီးဖြစ်ကြောင်း အစီရင်ခံစာတွင် ဖော်ပြထားသည်။
ရန်ကုန်တိုင်းအတွင်း ပြည်တွင်းပြည်ပ ရင်းနှီးမြှုပ်နှံမှုဖြင့် အိမ်ရာဖွံ့ဖြိုးရေး စီမံကိန်း များ၊ စက်မှုကဏ္ဍ ဖွံ့ဖြိုးရေး စီမံကိန်းများ၊ စီးပွားရေး အဆောက်အအုံ ဖွံ့ဖြိုးရေးစီမံကိန်းများ ပါဝင်မည့် မြို့ပြဖွံ့ဖြိုးရေးဆိုင်ရာ လုပ်ငန်းစီမံကိန်း အစီရင်ခံစာ (၂၀၁၈-၂၀၂၁) အား တိုင်းဒေသကြီး လွှတ်တော်သို့ မေ ၃ ရက်တွင် တင်ပြခဲ့ကြောင်း သိရသည်။
အဆိုပါ အစီရင်ခံစာအား မေ ၃ ရက်တွင် ပြုလုပ်သည့် ဒုတိယအကြိမ် ရန်ကုန်တိုင်းဒေသကြီး လွှတ်တော် ဆဋ္ဌမပုံမှန် အစည်းအဝေး (၂၂) ရက်မြောက်နေ့တွင် ရန်ကုန်တိုင်းဒေသကြီး အစိုးရအဖွဲ့ လျှပ်စစ်၊ စက်မှု လက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က တိုင်းဒေသကြီး လွှတ်တော်သို့ တင်ပြခဲ့ခြင်းဖြစ်သည်။
