မြန်မာရှင်းရှင်း ခနောက်စိမ်းသန့်စင် စက်ရုံအား တာဝန်ရှိသူများ စစ်ဆေးနေသည်ကို တွေ့ရစဉ်
မော်လမြိုင်စက်မှုဇုန်တွင် ကျောက်မီးသွေးနှင့် စမ်းသပ်လည်ပတ်နေသော ခနောက်စိမ်း သန့်စင်စက်ရုံ နှစ်ရုံကို ခေတ္တရပ်ဆိုင်းပြီး အနံ့ဆိုး ပျောက်သည်အထိ ပြုပြင်စစ်ဆေးပြီးမှ လည်ပတ်ခွင့်ပြုရန် ဒေသခံများ တောင်းဆိုကြောင်း သတင်းရရှိသည်။
“ဒီခနောက်စိမ်းနဲ့ ပတ်သက်ပြီး၂၀၁၄ ကတည်းက လွှတ်တော်ထဲရောက်အောင် ဒေါ်ခင်ဌေးကြွယ် ကိုယ်တိုင် Information ပေးပြီးမေးမြန်းတယ်။၂၀၁၅ မှာ ဒီစက်ရုံတွေ အကုန်လုံးပိတ်ခဲ့တယ်။ အခုစက် စမ်းသပ်လည်ခွင့်ပေးတယ်။ မလည်ပတ်န့ဲလို့ မပြောပါဘူး။ သူတို့တွေ ရင်းနှီးမြှုပ်နှံမှု အများကြီးကို အလေးထားပါတယ်။ ဒါပေမဲ့ အခုလည်ပတ်တဲ့အခါ အနံ့ဆိုးကြီးတွေ ထွက်နေတာကို မထိန်းနိုင်လို့ရှိရင် ဘယ်လိုလုပ်မလဲ။ ညဘက် အနံ့ဆိုး ထွက်နေတဲ့အကြောင်း မြန်မာဆန်းဇော် ကုမ္ပဏီမန်နေဂျာကို ဖုန်းဆက်ပြီး ပြောပါတယ်။ ဘေးမှာ လူတွေအများကြီး ရှိပါတယ်။ ခင်ဗျားတို့စက်ရုံကို ရိုက်ခွဲတော့မယ်။ ခဲတွေနဲ့ ထုတော့မယ်။ အစ်ကိုရယ်ထိန်းလို့ မရဘူး။ နောက်ထပ် သုံးနာရီလောက် အနံ့ခံလိုက်ဦးတဲ့။ ဘယ်လိုပေါင်းစပ်မလဲ။ အခုဝန်ကြီးတို့လာတယ်။ စက်ရုံတွေက ဘာအနံ့မှ မထွက်ရင် ဒီလူတွေ အားအားယားယား ဘယ်သူမှ လာထိုင်မှာ မဟုတ်ဘူး။ အနံ့တွေ မထွက်အောင် ဝန်ကြီးတို့က သဘာဝပတ်ဝန်းကျင်ဆိုင်ရာက ဆောင်ရွက်ပေးပါ။ အနံ့ထွက်နေတဲ့အချိန် ခေတ္တယာယီ ရပ်ဆိုင်းပေးပါ။ အခုစမ်းသပ် လည်ပတ်တဲ့ အဆင့်ပဲ ရှိပါသေးတယ်။ ဒီအတွင်းမှာ ဒုက္ခရောက်နေတဲ့ ပြည်သူတွေကို ကူညီတဲ့အနေနဲ့ ခေတ္တရပ်ဆိုင်းပေးပါ။ ပြုပြင်စရာရှိတာ ပြင်ခိုင်းပါ။ အနံ့ပျောက်ရင်ရပြီ။ နိုင်ငံတော်ရမယ့် အခွန်ဘဏ္ဍာကို မဖျက်ဘူး။ အနံ့မထွက်အောင် လုပ်ပြီးမှ လည်ပတ်ပါ။ ဒီကလူတွေ တကယ်ခံစားရလို့ လာပြောတာ။ ဝန်ကြီးတို့ကို တောင်းပန်ချင်တာက ဒီစမ်းသပ်လည်ပတ်တဲ့ ကာလမှာ ခေတ္တရပ်ဆိုင်းပေးပါ။ ဆရာတို့စစ်ပြီးလို့ ပုံမှန်လည်ပတ်ပြီး အားလုံးအိုကေ၊ ဘာအနံ့မှ မထွက်ရင် ပြည်သူတွေ ဘာမှမပြောတော့ပါ။ အဲဒါကို ကိုယ်စားတင်ပြပြောခြင်း ဖြစ်ပါတယ်” ဟု အရပ်ဘက် လူမှုအဖွဲ့အစည်းခေါင်းဆောင် ကိုဘိုဘိုဝင်းက မေ ၄ ရက်တွင် မော်လမြိုင်စက်မှုဇုန် အစည်းအဝေးခန်းမ၌ ပြုလုပ်သော မွန်ပြည်နယ် အစိုးရဌာန သဘာ၀ ပတ်ဝန်းကျင်ဆိုင်ရာ ဌာနများ၊ ခနောက်စိမ်း သန့်စင်စက်ရုံနှင့် လူထုတွေ့ဆုံပွဲ၌ ပြောကြားသည်။
ယင်းနောက် ဝန်ကြီးဒေါက်တာမင်းကြည်ဝင်း (မွန်ပြည်နယ် သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာန) က ဒေသခံများ ခံစားနေရမှု၊ ခနောက်စိမ်း သန့်စင်စက်ရုံများ ဆောင်ရွက်ထားမှုတို့ကို အနီးကပ်ဆုံး မွန်ပြည်နယ်အစိုးရ အစည်းအဝေးတွင် အရေးပေါ်အနေနှင့် တင်ပြသွားမည်ဖြစ်ပြီး အစိုးရအဖွဲ့၏ ဆုံးဖြတ်ချက်များအတိုင်း လုပ်ဆောင်သွားမည် ဖြစ်ကြောင်း ပြန်လည်ဖြေကြားခဲ့သည်။
ကျောက်မီးသွေးနှင့် လည်ပတ်နေသော မြန်မာဆန်းဇော် ခနောက်စိမ်း သန့်စင်စက်ရုံမှ ထုတ်လွှတ်သော အခိုးအငွေ့ကြောင့် အနီးပတ်ဝန်းကျင် လေထုအရည်အသွေး ညစ်ညမ်းမှု အခြေအနေကို ဌာနပိုင် စက်ကိရိယာများနှင့်၂၀၁၈ ခုနှစ် ဧပြီ ၄ ရက်၊ ၆ ရက်များ စစ်ဆေးတိုင်းထွာခဲ့ပြီး မြန်မာရှင်းရှင်း ခနောက်စိမ်း သန့်စင်စက်ရုံကို၂၀၁၈ ခုနှစ် ဧပြီ ၆၊ ၉ ရက်တို့တွင် စစ်ဆေးခဲ့ကြောင်း၊ စစ်ဆေးတွေ့ရှိချက်များအရ စက်ရုံနှစ်ခုလုံး၏ ကန့်သတ်ချက် ကျော်လွန်သော လေထု၊ အမှုန်အမွှားများကို အဆင့်မြင့် နည်းပညာဖြင့် လျှော့ချရန်၊ တတိယ အဖွဲ့အစည်းဖြင့် ပတ်ဝန်းကျင်ဒေသခံများကို ပွင့်လင်းစွာချပြ သဘောထားရယူရန်နှင့် EIA၊ IEE၊ EMP စီမံချက်များပါ အတိုင်း၊ ပတ်ဝန်းကျင် ထိန်းသိမ်းရေးဥပဒေ၊ နည်းဥပဒေ၊ လုပ်ထုံးလုပ်နည်းများ၊ ညွှန်ကြားချက်များ၊ စည်ပင်သာယာ ဥပဒေများအတိုင်း လိုက်နာဆောင်ရွက်ရန် ညွှန်ကြားထားသည်။
မော်လမြိုင် စက်မှုဇုန်နယ်မြေကို ၂၀၀၁ - ၂၀၀၂ ခုနှစ်က စတင်တည်ထောင်ခဲ့ပြီး ခနောက်စိမ်း သန့်စင်စက်ရုံ အနေနှင့် ခြောက်ရုံတည်ရှိပြီး လက်ရှိစမ်းသပ် လည်ပတ်ခွင့် ပေးထားသည်မှာ သုံးရုံတွင် ယနေ့အနံ့ဆိုး ထွက်သည်ဆိုသော ကျောက်မီးသွေး မီးဖုတ်သည့်နည်းသုံး မြန်မာဆန်းဇော်၊ မြန်မာရှင်းရှင်း ကုမ္ပဏီတို့ဖြစ်ကြောင်း၊ ကျန်စက်ရုံတို့သည် အက်စစ်နှင့် လျှပ်စစ်သုံး စက်ရုံတို့ ဖြစ်ကြောင်း သိရသည်။
