၂၀၁၈-၂၀၁၉ ဘဏ္ဍာနှစ် မြန်မာသစ်လုပ်ငန်း သစ်ထုတ်ရန်အတွက် မန္တလေးတိုင်း သစ်တောဦးစီးဌာနက သစ်မာပင် ၂၇၀၀ ပင်ထောင်ရိုက် သတ်မှတ်ပေးထား

၂၀၁၈-၂၀၁၉ ဘဏ္ဍာနှစ် မြန်မာသစ်လုပ်ငန်း သစ်ထုတ်ရန်အတွက် မန္တလေးတိုင်း သစ်တောဦးစီးဌာနက သစ်မာပင် ၂၇၀၀ ပင်ထောင်ရိုက် သတ်မှတ်ပေးထား
Published 5 May 2018

မန္တလေးတိုင်း သစ်တောဦးစီးဌာနက သစ်မာပင်ထောင်ရိုက် သတ်မှတ်ပေးစဉ်

၂၀၁၈-၂၀၁၉ ဘဏ္ဍာနှစ် မြန်မာသစ်လုပ်ငန်း သစ်ထုတ်ရန်အတွက် မန္တလေးတိုင်း သစ်တောဦးစီးဌာနက သစ်မာပင် ၂၇၀၀ ပင် ထောင်ရိုက်သတ်မှတ် ပေးထားသည်ဟု မန္တလေးတိုင်း ဒေသကြီး သစ်တောဦးစီးဌာနထံမှ သိရသည်။

သစ်တောဦးစီးဌာနတွင် ပင်ထောင်ရိုက်လုပ်ငန်း နှစ်မျိုးရှိပြီး ကျွန်းစိုရိုက်မှတ်ခြင်း လုပ်ငန်းနှင့် သစ်မာပင်ထောင်ရိုက်မှတ်ခြင်း လုပ်ငန်းဆိုပြီး နှစ်မျိုးရှိကြောင်း၊ သစ်တောဦးစီးဌာန အနေနှင့် မြန်မာသစ်လုပ်ငန်းကနေ တရားဝင် သစ်ထုတ်ရန်အတွက် ပင်ထောင်ရိုက်ခြင်းကို ၂၀၁၇-၂၀၁၈ ဘဏ္ဍာနှစ်မှာ မြန်မာသစ်လုပ်ငန်းနဲ့ ပူးပေါင်းပြီး သစ်မာပင် ထောင်ရိုက်မှတ်ခြင်း ဆောင်ရွက်လျက်ရာ ၂၀၁၈-၂၀၁၉ ဘဏ္ဍာနှစ်အတွက် သစ်ထုတ်လုပ်ရန် သစ်မာပင် ၂၇၀၀ ပင်ထောင်ရိုက် သတ်မှတ် ပေးထားသည်ဟု မန္တလေးတိုင်းဒေသကြီး သစ်တောဦးစီးဌာန ညွှန်ကြားရေးမှူး ဦးမြင့်သိန်းက ပြောကြားသည်။

“ကျွန်တော်တို့ မန္တလေးတိုင်း သစ်တောဦးစီးဌာန အနေနဲ့ ၂၀၁၈-၂၀၁၉ ဘဏ္ဍာနှစ်မှာ သစ်မာစုစုပေါင်း ၂၇၀၀ ပင်သစ်ထုတ်လုပ်ဖို့ မြန်မာသစ်လုပ်ငန်းအတွက် လုပ်ပေးထားတယ်။၂၀၁၈-၂၀၁၉ ဘဏ္ဍာနှစ်အတွက် ကျွန်းထုတ်လုပ်ခြင်း လုံးဝမရှိပါဘူး။ ထုတ်ဖို့ အစီအစဉ် လုံးဝမရှိပါဘူး။ သစ်တောဦးစီးဌာနက သစ်ထုတ်လုပ်မှုမှာ မြန်မာရွေးချယ်နည်း စနစ်ထုတ်လုပ်တဲ့ စနစ်ကို ကျင့်သုံးပါတယ်။ ဟိုလွန်ခဲ့တဲ့ နှစ်ပေါင်းများစွာ ကျင့်သုံးတဲ့ စနစ်ဖြစ်ပါတယ်။ မြန်မာရွေးချယ်စနစ်အတွက် တောထဲမှာရှိတဲ့ အပင်တွေ စာရင်းကောက်ပြီး နှစ်စဉ်ဘယ်လောက် ထုတ်လုပ်နိုင်တာ စာရင်းကောက်ပါတယ်။ နောက်စာရင်း အင်းပညာအရ တောဧရိယာကြီးကို နမူနာ ကြာပန်းရွေးချယ်တဲ့ နည်းစနစ်နဲ့ အလွှာတွေ ခွဲပြီးတော့မှ နမူနာခွက်တွေ ချမှတ်ပါတယ်။ သူတို့နည်းစနစ်အတိုင်း ချမှတ်ပြီးတာတွေကို ဝန်ထမ်းတွေက မြေပြင်မှာ ကွင်းဆင်းပြီး နမူနာခွက်စာရင်း ကောက်ပါတယ်။ ရရှိတဲ့ သစ်မျိုးပင်ထောင် စာရင်းတွေ လုံးပတ်အလိုက် အတန်းအစားအလိုက် ကုတ်နံပတ်တွေနဲ့ ကွန်ပျူတာမှာ ထည့်တွက်ခြင်းလုပ်ငန်းကို သစ်တောဦးစီးဌာနက စီမံဌာနမှ တွက်ချက်ပြီး ကိန်းဂဏန်းအရ ပင်ထောင်ပင်ရေပေါ့။ တစ်နှစ်ကို အပင်ဘယ်လောက်ထုတ်မယ်၊ သစ်မာဆို ဘယ်လောက်ထုတ်မယ် တွက်ချက်ထုတ်ပြီး နှစ်စဉ်ရှိပါတယ်။ ဒါကလည်း နှစ်စဉ်ခရိုင်အလိုက် ဆောင်ရွက်ပြီးတာ ဖြစ်ပါတယ်” ဟု မန္တလေးတိုင်းဒေသကြီး သစ်တောဦးစီးဌာန  ညွှန်ကြားရေးမှူး ဦးမြင့်သိန်းက ပြောကြားသည်။

၂၀၁၈-၂၀၁၉ ဘဏ္ဍာသစ်ထုတ်ရန်အတွက် မန္တလေးတိုင်းဒေသကြီး သစ်တောဦးစီးဌာနက ၂၀၁၇-၂၀၁၈ ခုနှစ်တွင် သစ်မာပင်ထောင်ရိုက်မှတ် လုပ်ငန်းကို စဉ့်ကူးမြို့နယ်အထက် မတ္တရာ(၄၁)တွင် သစ်မာပင် ၆၀၀၊ အထက် မတ္တရာ (၄၂)တွင် သစ်မာအပင်  ၁၂၀၀၊ မိုးကုတ်မြို့နယ် နန့်ပန်သဲနီ(၁၈) သစ်မာအပင် ၄၀၀ နှင့် မိုးကုတ်မြို့နယ် နန့်ပန်သဲနီ (၂၁) တွက် သစ်မာအပင် ၅၀၀ စုစုပေါင်း သစ်မာပင်၂၇၀၀ ကို ပင်ထောင်ရိုက်ပေးထားကြောင်း သိရသည်။

မန္တလေးတိုင်းဒေသကြီး သစ်တောဦးစီးဌာန ခရိုင်အလိုက် နှစ်စဉ်ခြောက်ပေအထက် သစ်ထုတ်လုပ်နိုင်သည့် မန္တလေးခရိုင်တွင် သစ်မာပင်အပင် ၁၃၀၊ ပြင်ဦးလွင်ခရိုင်တွင် သစ်မာပင်အပင် ၁၄၂၆၄၊ ကျောက်ဆည်ခရိုင်တွင် သစ်မာပင်အပင်၁၉၅၉၊ မိတ္ထီလာခရိုင်တွင် သစ်မာပင်အပင် ၈၂၀ နှင့် ရမည်းသင်းခရိုင်တွင် သစ်မာပင် အပင် ၉၅၀ စုစုပေါင်း နှစ်စဉ် သစ်မာပင်ထောင် ၁၈၁၂၃ ပင်ထောင်ရိုက် သတ်မှတ်ခြင်း လုပ်ဆောင်နိုင်သော်လည်း သစ်ထုတ်လုပ်နိုင်စွမ်းထက် များစွာလျော့နည်းပြီး သစ်ထုတ်လုပ်နေသည်ဟု သစ်တောဦးစီးဌာနထံမှ သိရသည်။

 

Most Read

Most Recent