စီမံကိန်းများအတွက် တောင်းဆိုထားသော ဘတ်ဂျက်များအား သတ်မှတ်ချိန်အတွင်း အမှန်တကယ်သုံးစွဲခြင်းမပြုသည့် လုပ်နည်းလုပ်ဟန်များကို ပြောင်းလဲရန်လိုအပ်ကြောင်း လွှတ်တော်ကိုယ်စားလှယ်အချို့ အကြုံပြု

စီမံကိန်းများအတွက် တောင်းဆိုထားသော ဘတ်ဂျက်များအား သတ်မှတ်ချိန်အတွင်း အမှန်တကယ်သုံးစွဲခြင်းမပြုသည့် လုပ်နည်းလုပ်ဟန်များကို ပြောင်းလဲရန်လိုအပ်ကြောင်း လွှတ်တော်ကိုယ်စားလှယ်အချို့ အကြုံပြု
Published 2 May 2018

မတ် ၂၂ ရက်က ပြုလုပ်သော ပြည်ထောင်စုလွှတ်တော် အစည်းအဝေးခေတ္တရပ်နားစဉ် လွှတ်တော်ကိုယ်စားလှယ်များအား တွေ့ရစဉ်

စီမံကိန်းများအတွက် တောင်းဆိုထားသော ဘတ်ဂျက်များအား သတ်မှတ်ချိန်အတွင်း အမှန်တကယ်သုံးစွဲခြင်းမရှိသည့် လုပ်နည်းလုပ်ဟန်များကို ပြောင်းလဲရန်လိုအပ်ကြောင်း လွှတ်တော်ကိုယ်စားလှယ်အချို့က အကြံပြုပြောကြားသည်။

၂၀၁၁-၂၀၁၂ ဘဏ္ဍာနှစ်မှ ၂၀၁၇- ၂၀၁၈ ဘဏ္ဍာနှစ် ခုနစ်နှစ်အတွင်း နောက်ဆက်တွဲ ဘတ်ဂျက်ခွင့်ပြုငွေမှာ ကျပ်ဘီလျံ ၁၃၀၀၀ ကျော်ရှိပြီး ဘတ်ဂျက်ပိုလျှံငွေ အသားတင်ပြန်လည်အပ်နှံမှုမှာ ကျပ်ဘီလျံ ၁၁၀၀၀ ကျော်ရှိကြောင်း ပြည်ထောင်စုလွှတ် တော်ပြည်သူ့ငွေစာရင်းပူးပေါင်းကော်မတီ၏ အစီရင်ခံစာအရ သိရသည်။

“လုပ်ငန်းအတွက် လက်ဝယ်ထုတ်လိုက်တယ်။ ပြီးသွားမှလုပ်ငန်းမဖြစ်ပါဘူးဆိုပြီး ပြန်အပ်မယ်ဆိုရင် ဘယ်လောက် နစ်နာလဲ။ အဲဒီတော့ ကျွန်တော်ပြောချင် တာကချပေးတဲ့ပိုက်ဆံကို မသုံးဘဲနေလိုက်ရင် တစ်နှစ်နာမသွားဘူးလား။ နောက်နှစ်အတွက်လည်း ပြန်တင်ရမယ်။ အဲဒီလိုမျိုး လုပ်တာတွေက အခုနပြောသလိုပေါ့ ပြည်ထောင်စုလွှတ်တော်ကဖြတ်တဲ့ ဘတ်ဂျက်အပေါ်မှာနည်းလို့ ကိုးလို့ကန့်လန့်လုပ်တာရယ်။ အခုနပြောသလိုပေ့ါ။ အတိုးရပြီး လုပ်စားတာတွေရှိမယ်။ နောက်တစ်ခုက မသုံးဘဲနဲ့ကျော်တဲ့အတွက်ကို တစ်နှစ်နောက်ကျသွားပြီ” ဟု ထန်းတစ်ပင်မဲဆန္ဒနယ် ပြည်သူ့လွှတ်တော်ကိုယ်စားလှယ် ဦးနေမျိုးထွန်းက ပြောကြားသည်။

ထို့ပြင် ပြည်သူ့လွှတ်တော်ကိုယ်စား လှယ်ဦးနေမျိုးထွန်းက စီမံကိန်းများနှင့်ပတ်သက်၍ ချပေးထားသည့် ဘတ်ဂျက်များကို သတ်မှတ်ချိန်အတွင်း အမှန်တကယ်သုံးစွဲရန် လိုအပ်ကြောင်း၊ နိုင်ငံတော်သမ္မတ ဦးဝင်းမြင့်က ပြောကြားထားသည့် တင်သွင်းတောင်း ဆိုထားသည့် ဘတ်ဂျက်များကို အချိန်မီအမှန်တကယ် သုံးစွဲခြင်းမပြုဘဲထားသည့် လုပ်ငန်းလုပ်ဟန်များကို ပြောင်းလဲရလိမ့်မည်ဆိုသည့်အချက်ကို ထောက်ခံကြောင်း ပြောကြားသည်။

“အဲဒါတွေကို ဘယ်လိုစိစစ်ဖို့လိုလဲဆိုတော့ ကျွန်တော်ပြောချင်တာက မြို့နယ်အဆင့်မှာရှိတဲ့ ဘတ်ဂျက်ကို တင်ပြတောင်းဆိုတဲ့ ဌာနတွေအနေနဲ့ မှန်မှန်ကန်ကန်ကွင်းဆင်းပြီးတော့ မြေပြင်အတိုင်း အမှန်တကယ် တွက်ချက်ဖို့လိုတယ်။ နောက်ပြီးတော့ နဂိုတုန်းက PAE နဲ့လုပ်တယ်။ အခုက ဒေသပေါက်ဈေးနဲ့တွက်တယ်။ အဲဒါကိုလည်း တိတိပပ မှန်မှန်ကန်ကန်ကိုယ့်အိတ်ထဲက ငွေကိုသုံးသလို ကျွန်တော်ပြောချင်တာက ဒီလမ်းကိုခင်းမယ်ဆိုရင် အောက်က ကျောက်မခင်းဘဲ ခင်းလည်းအဆင်ပြေတယ်။ အပေါ်ကနေ ကွန်ကရစ်တမ်းလောင်းလို့ရတဲ့ အနေအထား ဆိုရင်လည်း ခံတယ်ဆိုရင် ကျောက်ကိစ္စကို မထည့်နဲ့။ အောက်က ကျောက်ကြမ်းခင်းတာကို မထည့်နဲ့။ ပိုထည့်ထားပြီးတော့ သူတို့က မလိုဘူးဆိုပြီးတော့ အောက်ပိုင်းကို လျော့ပြီးတော့ အပေါ်ပိုင်းနဲ့ လုပ်သွားတော့ စားတာပေါ့ဗျာ။ အဲဒါတွေကိုလည်း နောက်ဆုံး Third Party ဆိုတဲ့အဖွဲ့အစည်းကလည်း မှန်မှန်ကန်ကန် independent body လည်း ဖြစ်ပြီးတော့ တကယ့်ကို အမှန်တကယ်လုပ်ဆောင်နိုင်တဲ့ အဖွဲ့အစည်းဖြစ်ဖို့လည်းလိုတယ်” ဟု ဦးနေမျိုးထွန်းက သုံးသပ်ပြောကြားသည်။

ပြည်သူ့ဘဏ္ဍာများအလေအလွင့် မရှိရန် စီမံခန့်ခွဲနိုင်ရန်အတွက် စီမံကိန်း၏ ကုန်ကျစရိတ်ကို အနီးစပ်ဆုံးတိကျမှန်ကန်စွာ ခန့်မှန်းတွက်ချက်ပြနိုင်ရန်၊ ဒေသ၏ကာလ ပေါက်ဈေးနှင့်အညီ တွက်ချက်နိုင်ရန် ဆောင်ရွက်ရမည်ဖြစ်ကြောင်း၊ ထို့ပြင် တင်သွင်းတောင်းဆိုထားသည့် ဘတ်ဂျက်များကိုလည်း အချိန်မီအမှန်တကယ်သုံးစွဲခြင်း မပြုဘဲထားသည့် လုပ်နည်းလုပ်ဟန်များကို ပြောင်းလဲရမည်ဖြစ်ကြောင်း နိုင်ငံတော်သမ္မတ ဦးဝင်းမြင့်က နှစ်သစ်ကူးနှုတ်ခွန်းဆက်စကားတွင် ထည့်သွင်းပြောကြားထားသည်။

ထို့ပြင် ဘတ်ဂျက်ပမာဏကြီးကြီးစိုက် ထုတ်သုံးစွဲရမည့် စီမံကိန်းကြီးများကို ထိထိရောက်ရောက် စိစစ်နိုင်သည့် အရည်အချင်းများကို စီမံကိန်းစိစစ်ရေးနှင့်တိုးတက်မှု အစီရင်ခံရေးနယ်ပယ်တွင် အမြန်ဆုံးမြှင့်တင်ပေးရမည်ဖြစ်ကြောင်း၊ လုပ်ငန်းစီမံကိန်းများမပြီး စီးဘဲအပြီးပြသည့် အဆင့်ဆင့်သော တာဝန်ရှိပုဂ္ဂိုလ်များ၊ နိုင်ငံတော်ကချမှတ်ထားသည့် တင်ဒါလုပ်ထုံးလုပ်နည်းနှင့် မညီညွတ်သော တင်ဒါခေါ်ယူမှုများ၊ တင်ဒါစည်းမျဉ်းထဲမှ လက်တစ်လုံးခြား လုပ်ကိုင်ဆောင်ရွက်မှုများကို ပြင်းပြင်းထန်ထန် အရေးယူရလိမ့်မည်ဖြစ်ကြောင်း သမ္မတဦးဝင်းမြင့်က ပြောကြားထားသည်။

တောင်းထားသည့် ဘတ်ဂျက်ကို သတ်မှတ်ချက်ချိန်အတွင်း အမှန်တကယ်သုံးစွဲနိုင်ခြင်း မရှိခြင်းအပေါ် ပြုပြင်ပြောင်းလဲရန်ကိစ္စနှင့် ပတ်သက်၍ “အဲဒီဟာကတော့ လုပ်ကိုလုပ်သင့်တဲ့ဟာပဲ။ မလုပ်ဘဲနဲ့ ကျွန်တော်တို့က ဒီအတိုင်းဆက်သွားနေရင် ဒီလိုပဲထပ်ဖြစ်နေမှာပဲ။ အဲဒါကြောင့် ဒီဘက်အစိုးရလက်ထက်မှာ ဘဏ္ဍာနှစ်ကို ပြောင်းလိုက်တာ။ ဘာကြောင့်လဲဆိုရင် ဟိုအရင်တုန်းက ဘဏ္ဍာနှစ်ကြောင့် ခြောက်လလောက်မိုးတွင်းလောက်က အလုပ်မလုပ်ကြရဘူး။ အများအားဖြင့်က။ အခုဟာက ဒီအသစ်နဲ့ဆိုလို့ရှိရင် ကျွန်တော်တို့က ဒါမလုပ်လို့မရ တော့ဘူး။ ချက်ချင်းကို ထလုပ်မှ မဟုတ်ဘူးဆိုလို့ရှိရင် ဟိုအရင်က ပုံစံအတိုင်းပဲ ကြာနေမယ်ဆိုလို့ရှိရင် ကျွန်တော်တို့ ချပေးလိုက်တဲ့  ဘတ်ဂျက်တွေက မိုးတွင်းမှ လုပ်ငန်းစနိုင်မယ့် ပုံစံဖြစ်သွားပြီ။ အဲဒီတော့ ဒီဟာတွေကို ပြုပြင်ပြောင်းလဲမှုတွေတော့ လုပ်လိမ့်မယ်။ လုပ်မှလည်းရမယ်” ဟု ဦးမျိုးဝင်းက ပြောကြားသည်။

ဘတ်ဂျက်ခွင့်ပြုငွေများကို အပြည့်အ၀ သုံးစွဲနိုင်မှု မရှိခြင်းကြောင့် အထွေထွေပိုလျှံ ရန်ပုံငွေသို့ နှစ်စဉ်ကျပ် ဘီလျံထောင်ဂဏန်းအထိ ပြန်လည်အပ်နှံလျက်ရှိရာ ဌာနများအနေဖြင့် ဘတ်ဂျက်တိုးမြှင့်ရရှိမှုနှင့် လိုက်လျောညီထွေဖြစ်ရန် အကောင်အထည်ဖော် ဆောင်ရွက်နိုင်မှုမရှိခြင်းကို သေချာစွာဆန်းစစ် လေ့လာသုံးသပ်ရန် လိုအပ်နေပြီဖြစ်ကြောင်း ပြည်ထောင်စုလွှတ်တော် ပြည်သူ့ငွေစာရင်းပူးပေါင်းကော်မတီက အကြံပြုထားသည်။

Most Read

Most Recent