<

မြန်မာနိုင်ငံအနေဖြင့် လုပ်သားဈေးကွက်ကို စနစ်တကျ စီမံခန့်ခွဲရန်နှင့် နိုင်ငံသူ နိုင်ငံသားများအတွက် သင့်လျော်ကောင်းမွန်သော အလုပ်အကိုင် ဖန်တီးပေးရန် စိန်ခေါ်မှုများစွာ ရှိနေကြောင်း CTUM တွင် ဖော်ပြ

၂၀၁၈ ခုနှစ် မေ ၁ ရက်က ရန်ကုန်မြို့တွင် အလုပ်သမားများ ၎င်းတို့၏ လိုလားချက်များကို ဆန္ဒထုတ်ဖော်နေစဉ် (ဓာတ်ပုံ- မျိုးထက်ပိုင်)

မြန်မာနိုင်ငံအနေဖြင့် လုပ်သားဈေးကွက်ကို စနစ်တကျ စီမံခန့်ခွဲရန်နှင့် နိုင်ငံသူ နိုင်ငံသားများအတွက် သင့်လျော်ကောင်းမွန်သော အလုပ်အကိုင် ဖန်တီးပေးရန် စိန်ခေါ်မှုများစွာ ရှိနေသေးကြောင်း CTUM (Confederation of Trade Unions Myanmar) မြန်မာနိုင်ငံလုံးဆိုင်ရာ အလုပ်သမားသမဂ္ဂများ အဖွဲ့ချုပ်၏ မေ ၁ ရက် သတင်းထုတ်ပြန်မှုတွင် ဖော်ပြသည်။

ယင်းထုတ်ပြန်ချက်၌ တစ်နေ့အလုပ်ချိန် ရှစ်နာရီ သတ်မှတ်နိုင်ရေး လုပ်ငန်းခွင် အခြေအနေ တိုးတက်ကောင်းမွန်ရေး လူမှုတရားမျှတရေးတို့အတွက် တိုက်ပွဲဝင်ခဲ့ကြသော တိုက်ပွဲဝင်နေသော အလုပ်သမား ညီအစ်ကို မောင်နှမများကို ၂၀၁၈ ခုနှစ် မေ ၁ ရက်ကျရောက်သည့် ၁၂၈ ကြိမ်မြောက်အ ပြည်ပြည်ဆိုင်ရာ အလုပ်သမားနေ့ (မေဒေး) နေ့တွင် ဂုဏ်ပြုကြောင်း၊ ရှေ့ကညီအစ်ကို မောင်နှမများ၏ ကြိုးစားရုန်းကန်ခဲ့မှုကြောင့် ယနေ့မျိုးဆက်များမှာ ဤအသီးအပွင့်များကို ခံစားနေရခြင်း ဖြစ်ကြောင်း၊ သို့သော် ယင်းအခြေအနေတွင် ရပ်တန့်နေ၍ မရကြောင်း၊ ယနေ့ခေတ် လုပ်သားဈေးကွက်တွင် ယခုမျိုးဆက်နှင့် နောင်အနာဂတ် မျိုးဆက်သစ်များအတွက် စိန်ခေါ်မှုအသစ်များစွာ ရှိနေသည့် အတွက်ကြောင့် ဖြစ်ကြောင်း၊ လုပ်သားဈေးကွက် အခြေအနေ ပြောင်းလဲလာနေပြီဖြစ်ကြောင်း၊ လွတ်လပ်သော ကုန်သွယ်ရေး သဘောတူညီချက် စာချုပ်များကို အသုံးပြု၍ ကမ္ဘာ့ကုန်စည်စီးဆင်းမှု ကွင်းဆက်တစ်လျှောက် ရင်းနှီးမြှုပ်နှံသူများ အနေဖြင့် ၎င်းတို့အတွက် ထုတ်လုပ်မှု တိုးတက်ရန်၊ စီးပွားရေး အကျိုးအမြတ်များများ ရရှိရန်၊ နိုင်ငံပေါင်းစုံတွင် အလုပ်အကိုင်ပုံစံအသစ် လုပ်နည်းလုပ်ဟန်အသစ်၊ နည်းပညာအသစ် များစွာဖြင့် ရင်းနှီးမြှုပ်နှံလာကြပြီ ဖြစ်ကြောင်း ထုတ်ပြန်ချက်တွင် ပါရှိသည်။

ထို့ပြင် လုပ်ငန်းအတွက် အတည်တကျရှိသည့် အလုပ်အကိုင်ပုံစံမျိုးမဟုတ်ဘဲ အိမ်တွင်နေ၍ ထုတ်လုပ်မှု ၀န်ဆောင်မှုကို ဆောင်ရွက်ပေးနိုင်သော အလုပ်အကိုင်မှအစ နေ့စား၊ ယာယီ၊ ပုတ်ပြတ် အလုပ်အကိုင်အဆုံး အလုပ်သမားများ၏ အခြေခံအခွင့်အရေးများကို အာမခံချက် မပေးနိုင်သော ပုံစံမျိုးဖြင့် လုပ်ကိုင်လာကြကြောင်း၊ အထူးသဖြင့် လွတ်လပ်စွာ အသင်းအပင်းဖွဲ့စည်းခွင့်နှင့် စုပေါင်းညှိနှိုင်း အရေးဆိုခွင့်များသည် နေ့စဉ်နှင့်အမျှ ခြိမ်းခြောက်ခံနေရကြောင်း၊ လူ့အခွင့်အရေး အလုပ်တာဝန်သိသော ကျင့်ဝတ်ကိုလေးစား လိုက်နာသော ရင်းနှီးမြှုပ်နှံမှုများမှ သွေဖည်လာကြသည့် အပြင် လူသားအလုပ်အစား စက်ရုပ်များကို အစားထိုးသုံးစွဲလာကြပြီ ဖြစ်ကြောင်း၊ အလုပ်သမားများ အနေဖြင့် နည်းပညာကို အမီမလိုက်နိုင်ပါက စက်ရုပ်များ အစားထိုး သုံးစွဲလာမှုကြောင့် အလုပ်လက်မဲ့များ ဘ၀ကိုပင် မကြာမီ ရောက်ရှိကြတော့မည် ဖြစ်ကြောင်း၊ ယင်းအခြေအနေတွင်  အစိုးရ – အလုပ်ရှင် – အလုပ်သမား ပူးပေါင်းဆောင်ရွက်မှု အားနည်းသေးသော ခိုင်မာအားကောင်းသည့် အလုပ်သမားဥပဒေ မရှိသေးသော၊ ဥပဒေ စည်းကြပ်နိုင်မှု အားနည်းနေသေးသော လုပ်ငန်းကျွမ်းကျင်မှု မရှိသည့် နည်းပညာကို အမီလိုက်နိုင်စွမ်း မရှိသည့် အလုပ်သမား အများစု ရှိနေသည့် မြန်မာနိုင်ငံ အနေဖြင့် လုပ်သားဈေးကွက်ကို စနစ်တကျ စီမံခန့်ခွဲရန်နှင့် နိုင်ငံသူ နိုင်ငံသားများအတွက် သင့်လျော်ကောင်းမွန်သော အလုပ်အကိုင် ဖန်တီးပေးရန် စိန်ခေါ်မှုများစွာ ရှိနေသေးကြောင်း ထုတ်ပြန်ချက်တွင် ဆက်လက်ဖော်ပြသည်။

ယင်းကြောင့် ကမ္ဘာ့ကုန်စည်စီးဆင်းမှု ကွင်းဆက်တစ်လျှောက် အချိန်နှင့် တစ်ပြေးညီ ဖြစ်ပေါ်တိုးတက် ပြောင်းလဲနေသော လုပ်သားဈေးကွက်အတွင်း ထိရောက်သော စီမံအုပ်ချုပ်မှုဖြင့် စိန်ခေါ်မှုများကို အခွင့်အလမ်းများအဖြစ် ပြောင်းလဲ၍ အလုပ်သမားများ သင့်လျော်ကောင်းမွန်သော အလုပ်အကိုင် အာမခံချက်ရှိရန်၊ နိုင်ငံအတွက် အကျိုးဖြစ်ထွန်းစေရန်နှင့် နိုင်ငံဖွံ့ဖြိုးမှု ရေရှည်တည်တံ့ ခိုင်မြဲစေရန် ကြိုးပမ်းဆောင်ရွက်ခြင်းသည် သမိုင်းပေး တာဝန်ပင်ဖြစ်ကြောင်း ယင်းကြောင့် ၁၂၈ ကြိမ်မြောက် မေဒေးနေ့တွင် အားသစ်လောင်း၍ ဤအလုပ်သမားလှုပ်ရှားမှုအား ခိုင်မာအားကောင်းစေရန် သွေးစည်းညီညွတ်စွာဖြင့် ဆက်လက်ချီတက်ကြရမည် ဖြစ်ကြောင်း CTUM က သတင်းထုတ်ပြန်သည်။

 

 

May 1, 2018














Copy Protected by Chetan's WP-Copyprotect.