မွန်ပြည်နယ်အတွင်းရှိ ရော်ဘာကုန်ကြမ်း လုပ်ငန်းခွင်တစ်ခုကို တွေ့ရစဉ်
သြင်္ကန်အပြီးတွင် မွန်ပြည်နယ် ရော်ဘာဈေး အနည်းငယ် မြင့်တက်လာကြောင်း ရော်ဘာလုပ်ငန်းရှင်များထံမှ သိရသည်။
“ကမ္ဘာ့ရော်ဘာ၊ ထိုင်းဈေးကွက်ရော ပြန်မြင့်လာတယ်။ ပြည်တွင်းက ဖိနပ်လိုင်းပါ မြင့်လာတော့ သြင်္ကန်ပြီး ဈေးနည်းနည်းမြင့်လာတာ အခုဆို အထူလိုင်းရိုးရိုးအဆင့်- ၃ က တစ်ပေါင်ကျပ် ၇၂၀ ကျော်၊ အပါးဖိနပ်လိုင်းက တစ်ပေါင် ၇၉၀ ကျော် ရလာပါပြီ။ သီလဝါစက်မှုဇုန် မြန်မာတာယာကုမ္ပဏီကလည်း အဆင့်တစ်ကို ဈေးကောင်းပေးနေတယ်။ သြင်္ကန်မတိုင်ခင်က တစ်ပေါင် ၆၅၀ ဝန်းကျင်လောက်ပဲ ရှိပါတယ်။ ဈေးကျတာ ဖေဖော်ဝါရီ၊ မတ်လပိုင်းကနေကျသွားတာ။ သြင်္ကန်မတိုင်ခင်အထိပေါ့” ဟု ကျိုက်မရောမြို့နယ် ရော်ဘာခြံပိုင်ရှင် ဦးအေးအောင်က ပြောကြားသည်။
ယခုနှစ် ရော်ဘာရာသီအဖွင့် မိုးကုန်စက်တင်ဘာတွင် တစ်ပေါင် ၉၅၀ မှကျပ် ၆၀၀ အထိ၊ ဖိနပ်လိုင်းသည် တစ်ပေါင် ကျပ် ၈၀၀ မှ အနိမ့်ဆုံး ကျပ် ၇၀၀ အထိ ရောက်ရှိပြီး ယခုဈေးနှုန်းအနည်းငယ်ပြန် မြင့်တက်ခြင်းဖြစ်ကြောင်း၊ လက်ရှိ မွန်ပြည်နယ် ရော်ဘာစုစုပေါင်း ထွက်ရှိမှု၏ ၁၀၀ ရာခိုင်နှုန်းတွင် အဆင့် ၁ ရာခိုင်နှုန်း ၃၀ တွင် ဖိနပ်အပါးလိုင်း ရာခိုင်နှုန်း ၂၀ ပါဝင်ပြီး ကျန် ၁၀ ရာခိုင်နှုန်းမှာ ပြည်တွင်း တာယာစက်ရုံများက ပေါက်ဈေးထက် ကျပ်တစ်ရာပိုပေးဝယ်နေကာ ကျန်ပြည်နယ်၏ ရာခိုင်နှုန်း ၇၀ မှာ အထူလိုင်း ဖြစ်သည်။ တရုတ်ဝယ်လက်ပေါ် မူတည်၍ ၎င်းတို့၏ဈေးဖွင့်မှုပေါ် မူတည်ကြောင်း၊ မြန်မာ့ရော်ဘာဈေးနှုန်းသည် နိုင်ငံတကာ ပေါက်ဈေးနှုန်းအတိုင်း ရရှိခံစားရန် အဓိက စိန်ခေါ်မှုမှာ အဆင့်မြင့် ထုတ်လုပ်နိုင်မှုပေါ်မူတည်ရာ လတ်တလော SME ချေးငွေမှ အဆင့်မြင့် ကုန်ကြမ်း စက်ရုံကြီးသုံးရုံ (ရေးမြို့၊ မုဒုံမြို့၊ ကျိုက်မရောမြို့နယ်) တို့အတွက် ချေးငွေထုတ်ပေးနေပြီ ဖြစ်သည်။ လာမည့် ရော်ဘာရာသီအစ ၂၀၁၈ ခုနှစ် စက်တင်ဘာတွင် Standard Rubber Market ဖြစ်ပေါ်၍ စင်ကာပူနိုင်ငံနှင့် MoU ထိုးထားသည့် တန်ချိန်ငါးသောင်းကို နိုင်ငံတကာဈေးနှင့်အညီ မွန်ပြည်နယ်မှ တင်ပို့ ရောင်းချနိုင်မည်ဖြစ်ကြောင်း ဦးသက်ဦး (အတွင်းရေးမှူး မွန်ပြည်နယ် ရော်ဘာထုတ်လုပ်သူအသင်း) က ပြောကြားသည်။
မြန်မာတစ်နိုင်ငံလုံး ရော်ဘာစိုက်ဧက ၁၄ သိန်းတွင် မွန်ပြည်နယ်သည် ရော်ဘာစိုက်ဧကငါးသိန်းနှင့် အများဆုံးဖြစ်ပြီး ဒေသခံ သုံးဦးတွင် နှစ်ဦးသည် ရော်ဘာစိုက်ပျိုးသည့်အတွက် မွန်ပြည်နယ်၏ စီးပွားရေး ဖွံ့ဖြိုးမှုဦးစားပေး လုပ်ငန်းငါးရပ်တွင် ရော်ဘာစိုက်ပျိုး ထုတ်လုပ်မှုကို ထည့်သွင်းပြီး ယခင်အစိုးရအဆက်ဆက် လျစ်လျူရှုထားသည့် ရော်ဘာစိုက်ပျိုးထုတ်လုပ်မှုကို အဆင့်မြင့် ရော်ဘာကုန်ကြမ်း ထုတ်ယူနိုင်ရန်၊ ဖော်မစ်အက်ဆစ် ပြောင်းလဲသုံးစွဲခြင်း၊ အဆင့်မြင့် ကုန်ကြမ်းစက်ရုံ တည်ဆောက်ရေး SME ချေးငွေ ထုတ်ပေးခြင်း အပါအဝင်၊ Standard Rubber Center တည်ထောင်ကာ နိုင်ငံတကာရော်ဘာပေါက်ဈေးအတိုင်း ခံစားရရှိရေး လုပ်ဆောင်နေကြောင်း သိရသည်။
