KNPP အနေဖြင့် NCA တွင် အမြန်ဆုံး ပါဝင်လက်မှတ်ရေးထိုးနိုင်ရေး ကြိုးပမ်းဆောင်ရွက်မည်ဖြစ်ကြောင်း အစိုးရနှင့် KNPP တရားဝင် တွေ့ဆုံမှုအပြီး ပူးတွဲကြေညာချက် ထုတ်ပြန်

KNPP အနေဖြင့် NCA တွင် အမြန်ဆုံး ပါဝင်လက်မှတ်ရေးထိုးနိုင်ရေး ကြိုးပမ်းဆောင်ရွက်မည်ဖြစ်ကြောင်း အစိုးရနှင့် KNPP တရားဝင် တွေ့ဆုံမှုအပြီး ပူးတွဲကြေညာချက် ထုတ်ပြန်
Published 28 April 2018

အစိုးရနှင့် KNPP ဆွေးနွေးပွဲအပြီးတွင် ငြိမ်းချမ်းရေးကော်မရှင်ဥက္ကဋ္ဌ ဒေါက်တာတင်မျိုးဝင်း ကျေးဇူးတင်စကား ပြောကြားနေစဉ်

ကရင်နီအမျိုးသားတိုးတက်ရေးပါတီ (KNPP) အနေဖြင့် NCA တွင် အမြန်ဆုံး ပါဝင်လက်မှတ်ရေးထိုးနိုင်ရေး ကြိုးပမ်းဆောင်ရွက်သွားမည်ဖြစ်ကြောင်း အစိုးရနှင့် KNPP တို့၏ တရားဝင်တွေ့ဆုံမှုအပြီးတွင် ပူးတွဲ ကြေညာချက် ထုတ်ပြန်သည်။

အစိုးရ၏ ငြိမ်းချမ်းရေးကော်မရှင်နှင့် KNPP ၏ ငြိမ်းချမ်းရေး တွေ့ဆုံဆွေးနွေးရေး ကော်မတီတို့အကြား တရားဝင်ဆွေးနွေးပွဲကို ကယားပြည်နယ် လွိုင်ကော်မြို့၌ ဧပြီ ၂၆ ရက်မှ ၂၇ ရက်ထိ နှစ်ရက်ကြာ ပြုလုပ်ခဲ့ပြီးနောက် အချက်သုံးချက်ပါသော ပူးတွဲကြေညာချက်ကို ထုတ်ပြန်ခဲ့ခြင်းဖြစ်သည်။

ထိုသို့ NCA မရေးထိုးမီ ရေတိုကာလအတွင်း (၁) Local Monitoring Team & JMC ကိစ္စ နှစ်ဖက်တပ်ဖွဲ့များ သွားလာမှု ဆက်သွယ်မှု ပြည်နယ်အဆင့်တွင် ညှိနှိုင်းရေးကိစ္စ၊ ပြည်နယ်အစိုးရနှင့် KNPP ကြားနှစ်ဖက် သဘောတူညီထားသည့်အတိုင်း ပုံမှန်တွေ့ဆုံဆွေးနွေး ညှိနှိုင်းဆောင်ရွက်ရန်၊ (၂) ပြည်နယ်နှင့် ပြည်ထောင်စုအဆင့်များတွင် ဆက်ဆံရေး တာဝန်ခံများ ပြန်လည်ထားရှိရေးကိစ္စ၊ ပြည်နယ်နှင့် ပြည်ထောင်စုအဆင့်တွင် နှစ်ဖက်ညှိနှိုင်း သဘောတူထားသော ဆက်ဆံရေးလမ်းကြောင်းများမှတစ်ဆင့် ဆောင်ရွက်ရန်၊ (၃) တပ်ပိုင်းဆိုင်ရာ ကိစ္စများနှင့်ပတ်သက်၍ ဆွေးနွေးရာတွင် တိုးတက်မှုများရရှိခဲ့ပြီး နှစ်ဖက်ညှိနှိုင်းသဘောတူသည့်အတိုင်း ဆက်လက်ဆောင်ရွက်ရန်တို့ကို နှစ်ဖက်ညှိနှိုင်း ဆွေးနွေးသဘောတူညီမှုရရှိခဲ့သဖြင့် KNPP အနေဖြင့် NCA သဘောတူစာချုပ်တွင် ပါဝင်လက်မှတ်ရေးထိုးနိုင်ရေး ဆက်လက်ကြိုးပမ်း ဆောင်ရွက်သွားရန် သဘောတူညီခဲ့ကြောင်း ထုတ်ပြန်ကြေညာချက်တွင် ပါရှိသည်။

“အရင်တုန်းက ပဏာမ အပစ်အခတ်ရပ်စဲရေးနောက်ပိုင်း စောစောပိုင်းကာလဖြစ်ပေါ် တိုးတက်မှုတွေမှာ ကျွန်တော်တို့ဘက်က တပ်တွေ တပ်မတော်ဘက်ကို စစ်ဆင်ရေးတွေ ရုပ်သိမ်းပေးပါလို့ ပြောဆိုဆွေးနွေးခဲ့တာရှိတယ်။ တပ်မတော်ကလည်း သူ့ကတိကဝတ်အတိုင်း ဥပမာအားဖြင့် တပ်မတွေ ရုပ်သိမ်းတယ်။ တပ်မ ၅၅ လိုဟာ ရုပ်သိမ်းတယ်။ တချို့စခန်းတွေကို ရုပ်သိမ်းလိုက်တာရှိတယ်။ ဒီကြားထဲမှာ ဘာဖြစ်လာလဲဆိုတော့ ကျွန်တော်တို့အနေနဲ့ NCA ထိုးတဲ့အခါမှာ နှောင့်နှေးမှုတွေဖြစ်နေတာတို့ ဒီအစိုးရတက်လာတဲ့ လက်ထက်မှာ ကြားထဲမှာ အပြန်အလှန် ဆက်ဆံထိတွေ့မှုတွေနည်းတဲ့အခါ တပ်မတော်ပိုင်းကလည်း ပြန်ပြီးတော့ သံသယရှိတဲ့ချိန်မှာ စစ်ရေးဆိုင်ရာပြန်ပြီးတော့ လှုပ်ရှားမှုတွေ တွေ့မြင်လာရတယ်။ ဒါတွေက NCA သွားမယ့်လမ်းကြောင်းပေါ်မှာ ရှိတဲ့အတွက်ကြောင့် မလိုလားအပ်တဲ့ ထိတွေ့မှုတွေ မဖြစ်အောင် အပြန်အလှန် ထိန်းထိန်းသိမ်းသိမ်း လုပ်ကြရအောင်ဆိုပြီးတော့ ပြီးခဲ့တဲ့သဘောတူညီချက်တွေကို ညှိနှိုင်းဆောင်ရွက်သွားမယ်လို့ လက်ရှိအခြေအနေထက်စာရင် ပိုပြီးကောင်းမွန်တဲ့ အခြေအနေတစ်ခုကို ဖန်တီးနိုင်မယ်လို့ ကျွန်တော်တို့ ယုံကြည်ပါတယ်” ဟု KNPP အထွေထွေအတွင်းရေးမှူး ဦးရွှေမျိုးသန့်က ဆွေးနွေးပွဲအပြီး သတင်းထောက်များအား ပြောကြားသည်။

NCA မထိုးနိုင်သေးသည့်ကာလအတွင်း ရှိပြီးသား သဘောတူညီချက်များဖြင့် ပြည်နယ်၏ တည်ငြိမ်အေးချမ်းရေးကို ဆက်လက်ထိန်းသိမ်းသွားမည်ဖြစ်ကြောင်းနှင့် တွေ့ဆုံဆွေးနွေးမှုမှာ အားရမှုရှိကြောင်းလည်း ဦးရွှေမျိုးသန့်က ပြောကြားသည်။

KNPP သည် ပြည်နယ်အဆင့်၊ ပြည်ထောင်စုအဆင့် အပစ်အခတ်ရပ်စဲရေး သဘောတူစာချုပ် လက်မှတ်ရေးထိုးထားသည့် အဖွဲ့ဖြစ်သည်။ NLD ပါတီဦးဆောင်သော အစိုးရသစ်လက်ထက်တွင် KNPP သည် NCA လက်မှတ်ရေးထိုးနိုင်ရေးအတွက် ညီညွတ်သောတိုင်းရင်းသားလူမျိုးများ ဖက်ဒရယ်ကောင်စီ (UNFC) မှတစ်ဆင့် အခြားသော UNFC အဖွဲ့ဝင် တိုင်းရင်းသားလက်နက်ကိုင်အဖွဲ့များနှင့်အတူ အစိုးရနှင့် ၁၇ လကျော်ကြာ ဆွေးနွေးခဲ့သည်။

သို့ရာတွင် အစိုးရနှင့် UNFC အကြား ဆွေးနွေးရေးတစ်ဆို့မှုအချို့ ဖြစ်ပေါ်နေချိန်တွင် UNFC အဖွဲ့ဝင် မွန်ပြည်သစ်ပါတီ (NMSP) နှင့် လားဟူဒီမိုကရက်တစ် အစည်းအရုံး (LDU) တို့သည် NCA စာချုပ်တွင် လက်မှတ်ရေးထိုးခဲ့သဖြင့် KNPP အဖွဲ့သည် ကျန်ရှိခဲ့ခြင်းဖြစ်သည်။

Most Read

Most Recent