ငြိမ်းချမ်းရေးကော်မရှင်နှင့် KNPP တို့ ဧပြီ ၂၆ ရက်က လွိုင်ကော်မြို့တွင် တွေ့ဆုံဆွေးနွေးပွဲ ကျင်းပနေစဉ် (ဓာတ်ပုံ-မခိုင်)

အစိုးရ၏ ငြိမ်းချမ်းရေးကော်မရှင် (PC) နှင့် ကရင်နီအမျိုးသားတိုးတက်ရေးပါတီ (KNPP) ၏ ငြိမ်းချမ်းရေးတွေ့ဆုံဆွေး နွေးရေးကော်မီတီ (PNC) တို့ တရားဝင်ဆွေးနွေးပွဲကို ဧပြီ ၂၆ ရက် နံနက်ပိုင်းမှစတင်ကာ ကယားပြည်နယ် လွိုင်ကော်မြို့ရှိ ပြည်နယ်ခန်းမတွင် ပြုလုပ်လျက်ရှိသည်။

အဆိုပါ ဆွေးနွေးပွဲတွင် ပြည်နယ်အဆင့် နှင့် ပြည်ထောင်စုအဆင့်တို့တွင် KNPP နှင့် အစိုးရတို့ကြား ချုပ်ဆိုခဲ့သော နှစ်ဖက် သဘောတူညီချက်များကို ဆက်လက်အကောင်အထည်ဖော်နိုင်ရန်အတွက် ပြည်နယ် အဆင့်နှင့် ဒေသအဆင့်ပူးတွဲစောင့်ကြည့်ရေး ကိစ္စများ၊ လူ့အခွင့်အရေးဆိုင်ရာ စောင့်ကြည့် လေ့လာရေးအဖွဲ့ကိစ္စများ၊ လူမှုရေးကူ ညီထောက်ပံ့မှုကိစ္စများ၊ ပြည်နယ်အတွင်း  INGO နှင့် NGO များ လုပ်ငန်းဆောင်ရွက်မှုကိစ္စများ၊ မူးယစ်ဆေးဝါး၊ သစ်တောပြုန်းတီးမှု နှင့် လူကုန်ကူးမှုကိစ္စများ၊ ပြည်နယ်နှင့်ပြည်ထောင်စုအဆင့်များတွင် ဆက်ဆံရေးတာဝန်ခံများ ပြန်လည်ထားရှိရေးကိစ္စများနှင့် တပ်ပိုင်းဆိုင်ရာကိစ္စများကို ဆွေးနွေးသွားမည် ဖြစ်ကြောင်း KNPP က ထုတ်ပြန်ထားသည်။

ယင်းဆွေးနွေးပွဲကို ဧပြီ ၂၇ ရက်ထိပြုလုပ်မည်ဖြစ်ပြီး ဆွေးနွေးပွဲသို့ အစိုးရဘက်မှ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန (NRPC) ဒုတိယဥက္ကဋ္ဌ  နိုင်ငံတော်အတိုင်ပင်ခံရုံးဝန်ကြီးဌာန ပြည်ထောင်စုဝန်ကြီးဦးကျော်တင့်ဆွေ၊ ငြိမ်းချမ်းရေး ကော်မရှင်ဥက္ကဋ္ဌ ဒေါက်တာတင်မျိုးဝင်း၊ ဒုတိယဥက္ကဋ္ဌ ဦးသိန်းဇော်၊ အတွင်းရေးမှူး ဦးခင်ဇော်ဦး၊ အဖွဲ့ဝင်များဖြစ်သည့် ဒေါက်တာအောင်ထွန်းသက်၊ ဦးအောင်စိုးနှင့် ငြိမ်း ချမ်းရေးကော်မရှင်အကြံပေးအဖွဲ့ဝင် ဦးလှမောင်ရွှေ၊ တပ်မတော်ကိုယ်စားလှယ်များအဖြစ် အမှတ် (၂) စစ်ဆင်ရေးအထူးအဖွဲ့မှူး ဒုတိယဗိုလ်ချုပ်ကြီး သန်းထွန်းဦး၊ ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးပူးတွဲ စောင့်ကြည့်ရေးကော်မတီ (JMC-U) အဖွဲ့ဝင် ဒုတိယဗိုလ်ချုပ်ကြီးမင်းနောင်၊ ပြည်နယ်အစိုးရအဖွဲ့၊ ဌာနဆိုင်ရာ ညွှန်ကြားရေးမှူးချုပ်များ တက်ရောက်သည်။

ထို့အတူ KNPP ဘက်မှ အထွေထွေအတွင်းရေးမှုး ဦးရွှေမျိုးသန့်၊ အတွင်းရေးမှူး (၂)ခူးဒယ်နီယာယ်၊ ဗဟိုအလုပ်အမှုဆောင် ကော်မတီဝင်ဗိုလ်ချုပ်စောဘီထူး၊ ဗိုလ်မှူးဘုန်းနိုင်၊ ခူးထဲဘူး၊  ခူးညေးရယ်၊ ခူးတော်ရယ် (S) ၊ ခူးတော်ရယ် (T) ၊ စောလှကေထူးနှင့် ငြိမ်းချမ်းရေးအကျိုးတော်ဆောင် ဦးကြည်စိန်တို့ ပါဝင်တက်ရောက်သည်။

NCA ရေးထိုးပါက လက်နက်အပ်နှံရမည် ဆိုသည့် ထင်ယောင်ထင်မှားဖြစ်မှုများ ရှိနေကြောင်း၊ NCa ဆိုသည်မှာ လက်နက်ကိုင်ပဋိပက္ခမဖြစ်ပွားရေးအတွက် ပစ်ခတ်တိုက်ခိုက်မှုများရပ်စဲပြီး ရပ်စဲထားသည့် ပစ်ခတ်တိုက်ခိုက်မှုများ ခိုင်မာရေးစနစ်တကျ ဆောင်ရွက်ခြင်းဖြစ်သကဲ့သို့ တစ်ဖက်တွင်လည်း နိုင်ငံရေးဆွေးနွေးပွဲများတွင် နိုင်ငံရေး ပြဿနာများညှိနှိုင်းအဖြေရှာရန် အစပြုခြင်းသာဖြစ်ကြောင်း ပြည်ထောင်စုဝန်ကြီး ဦးကျော်တင့်ဆွေက အဖွင့်အမှာစကားတွင် ပြောကြားသည်။

“ဒီကနေ့ဆွေးနွေးပွဲမှာ နှစ်ဦးနှစ်ဖက် ပွင့်ပွင့်လင်လင်း ဆွေးနွေးပြီးတော့ တစ်ဆို့နေတာတွေကို ပြေလည်သွားအောင်၊ အခက်အခဲ ဖြစ်နေတာတွေကို ပယ်ဖျက်နိုင်အောင် နားလည်မှုရှိရှိ ယုံကြည်မှုမြင့်မြင့်မားမားနဲ့ ဆွေး နွေးကြဖို့။ အထူးသဖြင့် အနာဂတ်မှာ ပေါ်ထွန်းမယ့် ဒီမိုကရေစီဖက်ဒရယ်ပြည်ထောင်စုကြီး တည်ဆောက်ရေးအတွက် အရေးကြီးတဲ့ အခြေခံမူတွေ ဆွေးနွေးညှိနှိုင်းနေပြီဖြစ်တဲ့ ပြည်ထောင်စုငြိမ်းချမ်းရေး ညီလာခံ ၂၁ ရာစု ပင်လုံအစည်းအဝေးကြီးမှာ ပါဝင်နိုင်ရေးကို ရှေးရှုကြဖို့ အလေးအနက်မေတ္တာရပ်ခံလိုပါတယ်။ ကယားပြည်နယ်သူ၊ ပြည်နယ်သားတွေ မျှော်လင့်ချက်ကို အလေးအမြတ်ပြုပြီးတော့ ဆွေးနွေးပွဲရလဒ်ကောင်းတွေ ထွက်ပေါ်ပြီးတော့ NCA လက်မှတ်ရေးထိုးနိုင်မယ့် အခြေအနေတွေကိုဆုံးဖြတ်နိုင်ပါစေ။ ရောက်ရှိနိုင်ပါစေ” ဟု ပြည်ထောင်စုဝန်ကြီးဦးကျော်တင့်ဆွေက ပြောကြားသည်။

ကရင်နီအမျိုးသားတိုးတက်ရေး ပါတီ ဗဟိုကော်မတီဝင် ဗိုလ်ချုပ်စောဘီထူးက KNPP အနေဖြင့် NCA လက်မှတ်မထိုးနိုင်သေးပါကလည်း ပြည်နယ်၏ အေးချမ်းရေးကို ဆက်လက်ထိန်းသိမ်းသွားမည်ဖြစ်ကြောင်း အဖွင့်အမှာစကားတွင် ပြောကြားသည် ။

“ကျွန်တော်တို့ပြည်နယ်မှာ စစ်မှန်တဲ့ ငြိမ်းချမ်းရေးကို တည်ဆောက်ရေးမှတစ်ဆင့် ငြိမ်းချမ်းရေးအသွင် အဖြေရှာသွားမယ့်နည်းတွေ၊ လက်နက်ကိုင်ပဋိပက္ခဖြစ်ပွားတဲ့ တခြားတိုင်းရင်းသားဒေသတွေမှာလည်း စစ်ပွဲများကို အပြန်အလှန်ယုံကြည်မှု တည်ဆောက်ရန် စစ်မှန်တဲ့ငြိမ်းချမ်းရေးကိုတည်ဆောက်ပြီးမှတစ်ဆင့် ဖယ်ဒရယ်ပြည်ထောင်စုကြီးကိုတည်ဆောက်ရန် ကြိုးပမ်းသွားကြပါလို့ ကျွန်တော့အနေနဲ့ တိုက်တွန်းလိုပါတယ်” ဟု ဗိုလ်ချုပ်စောဘီထူးက ပြောကြားသည်။

ထို့ပြင် ဆွေးနွေးပွဲသို့ KNPP ၏ ဖိတ်ခေါ်ချက်အရ ပြည်နယ်အတွင်းရှိ ဒေသခံ နိုင်ငံရေးပါတီများမှ ကိုယ်စားလှယ်များ၊ အရပ်ဘက် လူမှုအသင်းအဖွဲ့များမှ ကိုယ်စားလှယ်များ၊ ဘာသာရေးအဖွဲ့အစည်းခေါင်းဆောင်များနှင့် NCA  ရေးထိုးထားပြီးသော တိုင်းရင်းသား လက်နက်ကိုင် တော်လှန်ရေး အဖွဲ့အစည်းများမှ ကိုယ်စားလှယ်များ လေ့လာသူအဖြစ် တက်ရောက်ကြသည်။

KNPP သည် ပြည်နယ်အဆင့်၊ ပြည်ထောင်စုအဆင့် အပစ်အခတ်ရပ်စဲရေး သဘောတူစာချုပ် လက်မှတ်ရေးထိုးထားသည့် အဖွဲ့ဖြစ်သည်။

NLD ပါတီဦးဆောင်သော အစိုးရသစ်လက်ထက်တွင် KNPP သည် NCA လက်မှတ်ရေးထိုးနိုင်ရေးအတွက် ညီညွတ်သောတိုင်းရင်းသားလူမျိုးများ ဖက်ဒရယ်ကောင်စီ (UNFC) မှတစ်ဆင့် အခြားသော UNFC အဖွဲ့ဝင် တိုင်းရင်းသားလက်နက်ကိုင်အဖွဲ့ များနှင့်အတူ အစိုးရနှင့် ၁၇ လကျော်ကြာ ဆွေးနွေးခဲ့သည်။

သို့ရာတွင် အစိုးရနှင့် UNFC အကြား ဆွေးနွေးရေးတစ်ဆို့မှုအချို့ဖြစ်ပေါ်နေချိန်တွင် UNFC အဖွဲ့ဝင် မွန်ပြည်သစ်ပါတီ (NMSP) နှင့် လားဟူဒီမိုကရက်တစ်အစည်းအရုံး (LDU) တို့သည် NCA စာချုပ်တွင်လက်မှတ်ရေးထိုးခဲ့သဖြင့် KNPP အဖွဲ့သည် ကျန်ရှိခဲ့ခြင်းဖြစ်သည်။