ဖမ်းဆီးခံ ရိုက်တာသတင်းထောက်နှစ်ဦးနှင့် ရဲဝန်ထမ်းများအတွက် အရပ်ဘက်အဖွဲ့အစည်း ၁၆၃ ဖွဲ့က သမ္မတထံ အိတ်ဖွင့်ပေးစာပေးပို့

ဖမ်းဆီးခံ ရိုက်တာသတင်းထောက်နှစ်ဦးနှင့် ရဲဝန်ထမ်းများအတွက် အရပ်ဘက်အဖွဲ့အစည်း ၁၆၃ ဖွဲ့က သမ္မတထံ အိတ်ဖွင့်ပေးစာပေးပို့
Published 27 April 2018

ဖမ်းဆီးခံ ရိုက်တာသတင်းထောက်နှစ်ဦးနှင့် ရဲဝန်ထမ်းများအတွက် တရားမျှတမှုရရှိရေးနှင့် အမှုမှန် ပေါ်ပေါက်ရေးအတွက် အရပ်ဘက်အဖွဲ့အစည်း ၁၆၃ ဖွဲ့က သမ္မတဦးဝင်းမြင့်ထံ ဧပြီ ၂၆ ရက်က အိတ်ဖွင့်စာပေးပို့ခဲ့ကြောင်း သိရသည်။

အိတ်ဖွင့်ပေးစာတွင် ရိုက်တာသတင်းဌာန၏ သတင်းထောက်များဖြစ်သည့် သက်မောင်ဦး (ခ) ကိုဝလုံးနှင့် ကျော်စိုးဦး (ခ) မိုးအောင်တို့ ဖမ်းဆီးခံထားရသည်မှာ လေးလကျော် ကြာမြင့်ခဲ့ပြီဖြစ်ကြောင်း၊ ၎င်းတို့ဖော်ထုတ်ရေးသားခဲ့သော လူအစုလိုက် အပြုံလိုက် သတ်ဖြတ်မှု သတင်းဖြစ်စဉ်နှင့်ပတ်သက်၍ တပ်မတော်က စုံစမ်းစစ်ဆေးမှု ပြုလုပ်ခဲ့ပြီး ပြစ်မှုကျူးလွန်သူများကို ပြစ်ဒဏ်ချမှတ် အရေးယူခဲ့ပြီးဖြစ်ကြောင်း၊ သို့သော် ဖမ်းဆီးခံထားရသည့် သတင်းထောက်များနှင့် ရဲဝန်ထမ်းများမှာမူ အချုပ်ဖြင့် တရားရင်ဆိုင်နေရဆဲဖြစ်ကြောင်း စသည်တို့ပါရှိသည်။

ထို့ပြင် အဆိုပါအမှုနှင့်ပတ်သက်၍ ရန်ကုန်မြောက်ပိုင်းခရိုင်တရားရုံးတွင် ဧပြီ ၂၀ ရက် တရားရုံးချိန်း၌ သတင်းထောက်နှစ်ဦးတို့ကို ထောင်ချောက်ဆင်ဖမ်းဆီးရေးအတွက် ရဲမှူးချုပ်တင်ကိုကိုက ဦးစီးကွပ်ကဲခဲ့သည်ဟု အမှုမှ တရားလိုပြသက်သေ ဒုရဲမှူး မိုးရန်နိုင်က ထွက်ဆိုခဲ့ကြောင်း၊ ဒုရဲမှူးမိုးရန်နိုင်ကို ၂၀၁၇ ခုနှစ် ဒီဇင်ဘာ ၁၂ ရက်မှ ၂၀၁၈ ခုနှစ် ဧပြီ ၂၀ ရက်အထိ ၁၂၉ ရက်တိုင် ရဲအချုပ်တွင်ချုပ်ထားပြီး ဖမ်းဆီးခံလိုက်ရကတည်းကပင် ပြင်ပလောကနှင့် အဆက်အသွယ် ဖြတ်တောက်ခံရမှုများကို ဒုရဲမှူးမိုးရန်နိုင်၏ တရားရုံးထွက်ဆိုချက်များအရ သိရကြောင်း၊ တရားရုံးမှ အပြစ်ရှိသည် မရှိသည် တစ်စုံတစ်ရာ ဆုံးဖြတ်ချက်မချသေးခင် ဒုရဲမှူး မိုးရန်နိုင်၏ မိသားစုကို ရဲလိုင်းခန်းမှ နှစ်ရက်အတွင်း ဖယ်ရှားစေခဲ့သည့် လုပ်ရပ်များမှာလည်း ပြည်သူများ၏ စိတ်နှလုံးကို ကြီးစွာ ထိခိုက်စေကြောင်း၊ အထက်ပါ အချက်အလက်များအရ အမှုဖြစ်စဉ်သည် ကျိုးကြောင်းဆီလျော်မှု မရှိကြောင်း ပေါ်လွင်ထင်ရှားနေပြီး ဖမ်းဆီးချုပ်နှောင်ခံ သတင်းထောက်များနှင့် ရဲဝန်ထမ်းများအတွက် တရားမျှတမှုကင်းမဲ့နေသည်ဟု ယုံကြည်ကြောင်း အိတ်ဖွင့်ပေးစာတွင် ဆက်လက်ဖော်ပြသည်။

ယင်းကြောင့် အမှုဖြစ်စဉ်နှင့်ပတ်သက်၍ ရိုက်တာသတင်းထောက်နှစ်ဦးနှင့် ပြည်သူ့ရဲဝန်ထမ်းများအား ခြွင်းချက်မရှိ အမြန်ဆုံး ပြန်လွှတ်ပေးရန်၊ နိုင်ငံတော် လျှို့ဝှက်စာရွက်စာတမ်းများကို ဒုရဲမှူးမိုးရန်နိုင်က သတင်းထောက်များကို ပေးသည်ဟု ထင်မြင်အောင် နှစ်ဖက်စလုံးကို ထောင်ချောက်ဆင် ဖမ်းဆီးခြင်းကိစ္စသည် နိုင်ငံတော်တရားစီရင်ရေးမဏ္ဍိုင်၏ ဖြောင့်မတ်မှန်ကန်မှုကို ခြိမ်းခြောက်မှုဖြစ်စေပြီး ပြည်သူလူထုက တရားဥပဒေစိုးမိုးရေးအပေါ် ယုံကြည်မှု ဆက်လက်ကင်းမဲ့လာစေနိုင်သောကြောင့် နိုင်ငံတော်အဆင့် လွတ်လပ်သော စုံစမ်းစစ်ဆေးရေးကော်မရှင်တစ်ရပ် ဖွဲ့စည်း၍ အမြန်ဆုံး စစ်ဆေးဖော်ထုတ်ပေးရန်၊ ဖမ်းဆီးခံသတင်းထောက်များနှင့် ရဲဝန်ထမ်းမိသားစုဝင်များအားလုံးတို့၏ စိတ်ပိုင်းဆိုင်ရာလုံခြုံရေး၊ ရုပ်ပိုင်းဆိုင်ရာလုံခြုံရေး၊ ကျန်းမာရေအခြေအနေနှင့် လူ့အခွင့်အရေးဆိုင်ရာ အခြေအနေအရပ်ရပ်များ ထိခိုက်မှုမရှိစေရေး အလေးထား ဆောင်ရွက်ပေးရန်၊ ထို့ကြောင့် နိုင်ငံတော်သမ္မတဦးဝင်းမြင့်၏ နှစ်သစ်ကူး နှုတ်ခွန်းဆက်စကားဖြစ်သည့် “ဘက်မလိုက်သော၊ လွတ်လပ်သော၊ တရားမျှတမှုနှင့် ဆင်ခြင်တုံတရားတို့ကို ချိန်ခွင်လျှာကဲ့သို့ ထိန်းညှိနိုင်သော တရားစီရင်ရေးမဏ္ဍိုင်ဖြစ်အောင် ကြိုးပမ်းမည်” ဟူသော စကားနှင့်အညီ လက်တွေ့အကောင်အထည်ဖော် ဆောင်ရွက်ပေးရန် နိုင်ငံတော်သမ္မတကြီးထံသို့ တောင်းဆိုကြောင်း အရပ်ဘက်အဖွဲ့အစည်း ၁၆၃ ဖွဲ့က ၎င်းတို့အဖွဲ့လက်မှတ်များ ရေးထိုးကာ အိတ်ဖွင့်ပေးစာပို့ခဲ့ခြင်းဖြစ်သည်။

Most Read