ရှမ်းပြည်နယ်ရှိ ကျောက်မဲမြို့နယ်နှင့် ကွန်ကော်ကျေးရွာအုပ်စုတို့ ဆက်သွယ်ထားသည့် ပန်ကျိုင်းကြိုးတံတားကို မီးရှို့ဖျက်ဆီးခဲ့သည့် ကိစ္စနှင့်ပတ်သက်၍ ရှမ်းပြည်ပြန်လည်ထူထောင်ရေးကောင်စီ (RCSS) နှင့် တအန်းလက်နက်ကိုင်အဖွဲ့ (TNLA) တို့ အပြန်အလှန်စွပ်စွဲထားသည်။
ပထမဦးစွာ TNLA တပ်ဖွဲ့က အင်အားအမြောက်အမြားအသုံးပြု၍ ရှမ်းပြည်မြောက်ပိုင်း ကျောက်မဲခရိုင် သီပေါမြို့နယ် အုံမုကျေးရွာအုပ်စုဒေသအတွင်းရှိ RCSS တပ်ဖွဲ့အား တိုက်ခိုက်ခဲ့ပြီး ကျောက်မဲမြို့နှင့် ကွန်ကော်ကျေးရွာသို့ အဓိကဆက်သွယ်ထားသည့် ပန်ကျိုင်းတံတားကို TNLA က မီးရှို့ဖျက်ဆီးခဲ့ကြောင်း သတင်းရရှိသည်ဟု RCSS အဖွဲ့ပိုင် သတင်းဌာနဖြစ်သော Tai Freedom ၏ ဧပြီ ၂၅ ရက် သတင်းတစ်ပုဒ်တွင် ဖော်ပြထားသည်။
RCSS နှင့် TNLA တို့သည် ဧပြီ ၂၃ ရက်တွင် ပစ်ခတ်မှုဖြစ်ပွားခဲ့ပြီး TNLA တပ်ဖွဲ့သည် ပန်ကျိုင်းတံတားသို့ ရောက်ရှိချိန်တွင် တံတားအား မီးရှို့ဖျက်ဆီးခဲ့ကြောင်း၊ TNLA တပ်ဖွဲ့မှဖျက်ဆီးခဲ့သည့် အဆိုပါတံတားသည် ကျောက်မဲမြို့နှင့် ကွန်ကော်ကျေးရွာအုပ်စုကို အဓိကဆက်သွယ်ထားသည့် တံတားတစ်စင်းဖြစ်သောကြောင့် ဒေသခံများ သွားလာရေးအတွက် အခက်အခဲ ရင်ဆိုင်နေရကြောင်း Tai Freedom သတင်းတွင် ပါရှိ သည်။
ထို့အတူ ကျောက်မဲမြို့နယ်နှင့် ကွန်ကော်ကျေးရွာအုပ်စုတို့ကို ဆက်သွယ်ထားသည့် ပန်ကျိုင်းကြိုးတံတားအား TNLA တပ် ဖွဲ့က ဧပြီ ၂၃ ရက် ညနေ ၇ နာရီခွဲတွင် မီးရှို့ဖျက်ဆီးခဲ့ခြင်းဖြစ်ကြောင်း ဒေသခံများထံမှ သိရသည်ဟု TNLA က ဧပြီ ၂၄ ရက်တွင် သတင်းထုတ်ပြန်ခဲ့သည်။
TNLA နှင့် RCSS တို့သည် မတ် ၁၀ ရက်မှစ၍ မတ် ၂၄ ရက်အထိ ကွန်ကော်၊ တောဖယ်၊ ခိုငင်း၊ ရူနန်း၊ ကိုက်တိုင် အနီးတစ်ဝိုက်တွင် တိုက်ပွဲဖြစ်ပွားခဲ့ပြီး TNLA က အဆိုပါဒေသများအား ဝင်ရောက်ရှင်းလင်းနိုင်ခဲ့ကြောင်း၊ အဆိုပါဒေသအား ဝင်ရောက်ရှင်းလင်းအပြီးတွင် TNLA က ကွန်ကော်၊ တောဖယ်ဒေသအတွင်း ထိန်းချုပ်နေရာယူထားသဖြင့် RCSS တပ်ဖွဲ့သည် ပန်ကျိုင်းကြိုးတံတားနှင့် ကျောက်မဲအခြေစိုက် မြန်မာ့တပ်မတော် ခမရ (၅၀၁) နှင့် (၅၀၂) တပ်စခန်းအကြားတွင် အခြေချတပ်စွဲထားကြောင်း TNLA သတင်းထုတ်ပြန်ချက်တွင် ပါရှိသည်။
အဆိုပါလမ်းကြောင်းတွင် RCSS တပ်ဖွဲ့က ကွန်ကော်၊ တောဖယ်၊ အုန်းအွီး၊ ခိုငင်းစသည့် ကျေးရွာဘက်ရှိ တအန်းလူမျိုးဒေသခံများ အဓိကဆက်သွယ်သွားလာသည့် လမ်းကြောင်းအား ပစ်မှတ်ထားပိတ်ဆို့စစ်ဆေးမှု ပြုလုပ်နေခြင်းသည် တစ်နှစ်ကျော်ကြာမြင့်ခဲ့ပြီးဖြစ်ကြောင်း TNLA သတင်းထုတ်ပြန်ချက်တွင် ဖော်ပြထားသည်။
RCSS နှင့် TNLA တို့သည် မကြာခဏ ပစ်ခတ်မှုဖြစ်ပွားလေ့ရှိသည့် တိုင်းရင်းသား လက်နက်ကိုင်အဖွဲ့များဖြစ်သည်။ RCSS အဖွဲ့မှာ တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထားပြီး TNLA အဖွဲ့မှာ လက်မှတ်မရေးထိုးရသေးပေ။
အဆိုပါ တိုင်းရင်းသားလက်နက်ကိုင်နှစ်ဖွဲ့ ပဋိပက္ခကြောင့် ဒေသတွင်း ရှမ်းလူမျိုးနှင့် တအန်း (ပလောင်) လူမျိုးတိုကြား အမုန်းတရားဖြစ်ပေါ်မှုများရှိနေပြီး ဈေးရောင်းဈေးဝယ်ပြုလုပ်ခြင်းကဲ့သို့ ကိစ္စရပ်များတွင် ထိခိုက်မှုများရှိနေကြောင်း သိရသည်။
ထိုသို့လက်နက်ကိုင်အဖွဲ့နှစ်ခုအကြား ပြဿနာသည် လူမျိုးရေးပြဿနာမဟုတ်ကြောင်း ဒေသခံများသိရှိလာစေရန် အရပ်ဘက်အဖွဲ့အစည်းအချို့က ဒေသခံပြည်သူများအား ပညာပေးစည်းရုံးမှုများ ပြုလုပ်နေရကြောင်း သိရသည်။
