ဧပြီမှ စက်တင်ဘာအထိ ခြောက်လတာကာလအတွက် ရင်းနှီးမြှုပ်နှံမှုများ ခွင့်ပြုလျက်ရှိရာ FDI ဒေါ်လာ ၆၆ သန်းကျော်နှင့် နိုင်ငံသားရင်းနှီးမြှုပ်နှံမှု ဒေါ်လာ ၁၀၇ သန်းကျော်အပါအဝင် ကျပ် ၆၁၂ ဒသမ ၁၈၈ ဘီလျံကျော်အထိ စတင်မြှုပ်နှံ

ဧပြီမှ စက်တင်ဘာအထိ ခြောက်လတာကာလအတွက် ရင်းနှီးမြှုပ်နှံမှုများ ခွင့်ပြုလျက်ရှိရာ FDI ဒေါ်လာ ၆၆ သန်းကျော်နှင့် နိုင်ငံသားရင်းနှီးမြှုပ်နှံမှု ဒေါ်လာ ၁၀၇ သန်းကျော်အပါအဝင် ကျပ် ၆၁၂ ဒသမ ၁၈၈ ဘီလျံကျော်အထိ စတင်မြှုပ်နှံ
Published 26 April 2018

နိုင်ငံခြားရင်းနှီးမြှုပ်နှံမှုဖြင့် ဆောင်ရွက်နေသည့် ရန်ကုန်မြို့ရှိ စက်ရုံတစ်ရုံကိုတွေ့ရစဉ်(ဓာတ်ပုံ-မင်းသီဟဇော်)

၂၀၁၈ခုနှစ် ဧပြီမှ စက်တင်ဘာအထိ ခြောက်လတာကာလအတွက် ရင်းနှီးမြှုပ်နှံမှုများကို ခွင့်ပြုပေးလျက်ရှိရာ နိုင်ငံခြားရင်းနှီးမြှုပ်နှံမှုပမာဏ (FDI) ဒေါ်လာ ၆၆ သန်းကျော်နှင့်  မြန်မာနိုင်ငံသားရင်းနှီးမြှုပ်နှံမှု ပမာဏ ဒေါ်လာ ၁၀၇ သန်းကျော်အပါအဝင် ကျပ် ၆၁၂ ဒသမ ၁၈၈ ဘီလျံကျော်အထိ စတင်ဝင်ရောက်မြှုပ်နှံထားကြောင်း ဧပြီ ၂၄ရက်က ရန်ကုန်မြို့ရှိ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနတွင် ကျင်းပသည့်ရှင်းလင်းပွဲမှ သိရသည်။

မြန်မာနိုင်ငံရင်းနှီးမြှုပ်နှံမှုကော်မရှင်၏ အစည်းအဝေးအမှတ်စဉ် (၅/၂၀၁၈)အရ နိုင်ငံခြားရင်းနှီးမြှုပ်နှံမှုလုပ်ငန်းတစ်ခု ခွင့်ပြုခဲ့သည်။ ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီက အတည်ပြုခဲ့သည့် လုပ်ငန်းတစ်ခုနှင့် မန္တလေးတိုင်းဒေသကြီး ရင်းနှီးမြှုပ်နှံမှုကော်မတီက အတည်ပြုပေးခဲ့သည့် လုပ်ငန်းတစ်ခုရှိသဖြင့် အဆိုပါအစည်းအဝေးကာလတွင် စုစုပေါင်းလုပ်ငန်းသုံးခုမှ ရင်းနှီးမြှုပ်နှံမှုပမာဏ ဒေါ်လာ ၉ ဒသမ ၃၀၇ သန်းကို ခွင့်ပြု/ အတည်ပြုပေးခဲ့ပြီး အဆိုပါလုပ်ငန်းများမှ ပြည်တွင်းလုပ်သားများအတွက် အလုပ်အကိုင်အခွင့်အလမ်းပေါင်း ၁၅၇၆ ခုကို ဖန်တီးပေးနိုင်မည်ဖြစ်ကြောင်းနှင့် ခွင့်ပြု / အတည်ပြုလုပ်ငန်းသုံးခုမှာ စက်မှုကဏ္ဍလုပ်ငန်းနှစ်ခုနှင့် အခြားဝန်ဆောင်မှုကဏ္ဍ လုပ်ငန်းတစ်ခုတို့ဖြစ်ကြောင်း မြန်မာနိုင်ငံ ရင်းနှီးမြှုပ်နှံမှုကော်မတီသတင်းထုတ်ပြန် ချက်အမှတ်စဉ် (၅ / ၂၀၁၈)အရ သိရသည်။

၂၀၁၈ခုနှစ် ဧပြီလအထိ နိုင်ငံခြားရင်း နှီးမြှုပ်နှံမှုလုပ်ငန်းသုံးခု ရင်းနှီးမြှုပ်နှံမှုပမာဏ ဒေါ်လာ ၉ ဒသမ ၃၀၇ သန်းဖြစ်သည်။ ရင်းနှီးမြှုပ်နှံမှုတိုးမြှင့်ခြင်းအပါအဝင် စုစုပေါင်း ရင်းနှီးမြှုပ်နှံမှုပမာဏမှာ ဒေါ်လာ၄၄ ဒသမ ၂၁၉ သန်း၊ အထူးစီးပွားရေးဇုန်ဥပဒေအရ သီလဝါအထူးစီးပွားရေးဇုန်တွင် ရင်းနှီးမြှုပ်နှံမှုပမာဏ ဒေါ်လာ ၂၁ ဒသမ ၈၀၀ သန်းခွင့်ပြုခဲ့သဖြင့် စုစုပေါင်းခွင့်ပြုပြီး ရင်းနှီးမြှုပ်နှံမှု ပမာဏ ဒေါ်လာ ၆၆ ဒသမ ၀၁၉ သန်း ဖြစ်သည်။

အဆိုပါအစည်းအဝေးတွင် မြန်မာနိုင်ငံ သားရင်းနှီးမြှုပ်နှံမှုလုပ်ငန်းရှစ်ခုခွင့်ပြုခဲ့ပြီး လုပ်ငန်းသုံးခုကိုအတည်ပြုခဲ့သည်။ မန္တလေးတိုင်းဒေသကြီး ရင်းနှီးမြှုပ်နှံမှုကော်မတီက အတည်ပြုပေးခဲ့သည့်လုပ်ငန်းနှစ်ခုနှင့် ကရင်ပြည်နယ် ရင်းနှီးမြှုပ်နှံမှုကော်မတီက အတည်ပြုပေးခဲ့သည့် လုပ်ငန်းတစ်ခုရှိသဖြင့် စုစုပေါင်းလုပ်ငန်း ၁၄ ခုမှ ရင်းနှီးမြှုပ်နှံမှု ပမာဏ ဒေါ်လာ ၁၀၆ ဒသမ ၀၄၆ သန်းအပါအဝင် ကျပ် ၆၀၃၁၈၈ဒသမ ၈၆၃ သန်းခွင့်ပြု/ အတည်ပြုပေးခဲ့သည်။

ခွင့်ပြု/ အတည်ပြု လုပ်ငန်း ၁၄ ခုမှာ ဟိုတယ်နှင့်ခရီးသွားကဏ္ဍလေးခု၊ မွေးမြူရေးနှင့်ရေလုပ်ငန်းကဏ္ဍတစ်ခု၊ စက်မှုကဏ္ဍလေးခု၊ အခြားဝန်ဆောင်မှုကဏ္ဍသုံးခု၊ အိမ်ယာအဆောက်အအုံ ကဏ္ဍတစ်ခုနှင့်လျှပ်စစ်ကဏ္ဍတစ်ခုတို့ ဖြစ်သည်။

၂၀၁၈ခုနှစ် ဧပြီမှ စက်တင်ဘာခြောက်လကာလအတွက် မြန်မာနိုင်ငံသားရင်းနှီးမြှုပ်နှံမှု ခွင့်ပြုပေးခဲ့မှုမှာ ၂၀၁၈ခုနှစ် ဧပြီလ အထိ မြန်မာနိုင်ငံသားရင်းနှီးမြှုပ်နှံမှုလုပ်ငန်း ၁၄ ခု၊ ဒေါ်လာ ၁၀၆ ဒသမ ၀၄၆ သန်း အပါအဝင် ကျပ် ၆၀၃၁၈၈ ဒသမ ၈၆၃ သန်း ဖြစ်သည်။

ရင်းနှီးမြှုပ်နှံမှုတိုးမြှင့်ခြင်းအပါအဝင် စုစုပေါင်းရင်းနှီးမြှုပ်နှံမှုပမာဏ ဒေါ်လာ ၁၀၇ ဒသမ၁၂၆သန်းအပါအဝင် ကျပ် ၆၁၂၁၈၈ ဒသမ ၈၆၃ သန်းကို ခွင့်ပြုပေးခဲ့ကြောင်း အဆိုပါသတင်းစာရှင်းလင်းပွဲတွင် ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနမှ ညွှန်ကြားရေးမှူးချုပ်ဦးအောင်နိုင်ဦးက ပြောကြားသည်။

Most Recent