အသက်ကိုးနှစ်အရွယ် မိန်းကလေးတစ်ဦးအား အလှူခံကြွလာသည့် ဘုန်းကြီးမှ အဓမ္မပြုကျင့်ရန် ကြံစည်မှုဖြစ်ပွားခဲ့ကြောင်း ဧပြီ၂၄ ရက်တွင် စစ်ကိုင်းအမှတ် (၂) စခန်းမှ သိရသည်။
ဧပြီ ၂၃ ရက် နံနက် ၈ နာရီခန့်က စစ်ကိုင်းမြို့ နီလာရပ်ကွက်တွင်နေထိုင်သော ဒေါ်... (၄၃) နှစ်သည် အသက်ကိုးနှစ် ခြောက်လအရွယ်သမီးဖြစ်သူ မ.... အား နေ အိမ်တွင်ထားခဲ့ကာ သားဖြစ်သူနှင့် ဈေးဝယ်ထွက်သွားခဲ့ပြီး နံနက် ၉ နာရီခန့်တွင် ဦးဥတ္တမ ၃၀ နှစ်၊ ငါးဝါရှိ ဘုန်းကြီးသည် ၎င်းတို့နေအိမ်သို့ အလှူခံရောက်ရှိလာခဲ့ရာ ဒေါ်... ၏ သမီး မ... က အလှူငွေ ၂၀၀ ကျပ် ထည့်ခဲ့သော်လည်း ဘုန်းကြီးမှ လူကြီးများမရှိသည်ကို အခွင့်ကောင်းယူကာ နေအိမ်ပေါ်သို့ တက်ရောက်ပြီး မ... အား အဓမ္မပြုကျင့်ရန် ကြံစည်စဉ် မ.... က အော်ဟစ်အကူအညီတောင်းခဲ့ရာ ရပ်ကွက်အတွင်းရှိ လူများရောက်ရှိလာပြီး ဖမ်းဆီးနိုင်ခဲ့ကြောင်း ရဲမှုခင်းမှတ်တမ်းအရ သိရသည်။
အဆိုပါဖြစ်စဉ်နှင့်ပတ်သက်၍ ပြစ်မှုကျူးလွန်သူ (ဦးဥတ္တမ) လူနာမည် အောင်လွင်ဌေး၊ ၃၀ နှစ်အား စစ်ကိုင်းမြို့မရဲစခန်း တွင် (ပ)-၁၈၇/၂၀၁၈၊ ရာဇသတ်ကြီးဥပဒေ ပုဒ်မ- ၃၇၆/ ၅၁၁ ဖြင့် ဖမ်းဆီးအမှုဖွင့်ထားကြောင်း သိရသည်။
