<

ဧရာဝတီမြစ်ကမ်းနံဘေး ကမ်းပါးပြိုသည့်နေရာများတွင် မြစ်ကြောင်းထိန်းသိမ်းရန်အတွက် ရေ၀ပ်ဒဏ်ခံနိုင်သည့် မအူပင်သစ်မျိုးနှစ်သောင်း ပျိုးထောင်ထား

ကမ်းထိန်းတမံနှင့်အတူ ဒေသမျိုးရင်းကမ်းထိန်းအပင်များကိုပါ တွဲဖက်စိုက်ပျိုးဆောင်ရွက်နိုင်ရေးအတွက် ဧရာဝတီမြစ်ကမ်းနံဘေးရွာများသို့ တာဝန်ရှိသူများ သွားရောက်စစ်ဆေးစဉ်

မန္တလေးတိုင်းဒေသကြီး မတ္တရာမြို့နယ်အတွင်းရှိ ဧရာဝတီမြစ်ကမ်းနံဘေး ကမ်းပါးပြိုသည့်နေရာများတွင် မြစ်ကြောင်းထိန်းသိမ်းရန်အတွက် သစ်တောဦးစီးဌာနကရေအရင်း အမြစ်နှင့် မြစ်ချောင်းများ ဖွံ့ဖြိုးတိုးတက်ရေး ဦးစီးဌာနနှင့် ပူးပေါင်းပြီး ရေ၀ပ်ဒဏ်ခံနိုင်သည့် မအူပင်သစ်မျိုးနှစ်သောင်း  ပျိုးထောင်ထားပြီး စိုက်ပျိုးရန် နေရာများကို စိုက်ပျိုးပေးမည်ဟု မန္တလေးတိုင်းဒေသကြီးသစ်တော ဦးစီးဌာနမှ သိရသည်။

အဆိုပါ ဧရာဝတီမြစ်ကမ်းနံဘေး ကမ်းပါးပြိုသည့် နေရာများတွင် မြစ်ကြောင်းထိန်းသိမ်းရန်အတွက် ရေ၀ပ်ဒဏ်ခံနိုင်သည့် မအူပင်သစ်မျိုးအပြင် ဒေသမျိုးရင်းကမ်းထိန်းအပင်များဖြစ်သည့် ဒေသအခေါ်အဝေါ် ကျူပင်၊ ကိုင်းပင်၊ ထိကရုန်းပင်များကိုပါ ရေထိန်းနံရံများကြားတွင် ထည့်သွင်းစိုက်ပျိုးပြီး မြစ်ကမ်းနံဘေးရှိ ကျေးရွာများမိုးတွင်း၌ ရေတိုက်စားမှုဒဏ်မှ ကင်းဝေးအောင် လုပ်ဆောင်နေကြောင်း၊ အဓိက ကျေးရွာပြည်သူလူထုအနေဖြင့် ပူးပေါင်းဆောင်ရွက်ထိန်းသိမ်းဖို့လိုကြောင်း မန္တလေးတိုင်းဒေသကြီး သစ်တောဦးစီးဌာန ညွှန်ကြားရေးမှူး ဦးမြင့်သိန်းက ပြောကြားသည်။

“ဧရာဝတီမြစ်ကမ်းဘေးက ရွာတွေ နှစ်စဉ် မြစ်ကြောင်း ပြောင်းလဲမှုကြောင့် ရေတိုက်စားမှုခံရပါတယ်။ သူတို့အနေနဲ့လည်း အင်မတန် ဒုက္ခရောက်ကြပြီး သူတို့ရဲ့ ရွာတွေပါ ရေတိုက်စားမူကြောင့် ကမ်းပါးပြိုပျက်စီးဆုံးရှုံးနိုင်တယ်။ ဒါနဲ့ ပတ်သက်ပြီး သက်ဆိုင်ရာ တိုင်းဒေသကြီးအစိုးရကို ကျွန်တော်တို့ အဆင့်ဆင့် တင်ပြပြီးတော့ စီမံချက်မှတ်ပြီး ဆောင်ရွက်လျက်ရှိတယ်။ မန္တလေးတိုင်းဒေသကြီးအတွင်းမှာ ဧရာဝတီမြစ်ကမ်းနံဘေး ကျေးရွာများကို ရေအရင်းအမြစ်နှင့် မြစ်ချောင်းများ ဖွံဖြိုးတိုးတက်ရေးဦးစီးဌာန အနေနဲ့ ကမ်းပါးပြိုထိန်းသိမ်းရေးကို အင်ဂျင်နီယာပညာနဲ့ ရေထိန်းနံရံတွေ တည်ဆောက်နေသလို သစ်တောဦးစီးဌာနအနေနဲ့ ကမ်းပါးပြိုထိန်းသိမ်းရေးအတွက် သစ်ပင်စိုက်ပျိုးရေးလုပ်ငန်းကို ဆောင်ရွက်ဖို့စီမံနေပြီး အထူးသဖြင့် ရေ၀ပ်ဒဏ်တွေခံနိုင်တဲ့ မအူပင်သစ်မျိုး နှစ်သောင်းကို ပျိုးထောင်ထားပြီး စိုက်ပျိုးရန်နေရာများကို စိုက်ပျိုးပေးသွားမယ်။ ရေထိန်းနံရံတွေ ထိန်းပေးနိုင်ရန်အတွက် ရေထိန်းနံရံကြားတွေမှာလည်း ထည့်သွင်းစိုက်ပျိုးပေးသွားမယ်” ဟုမန္တလေးတိုင်းဒေသကြီး သစ်တောဦးစီးဌာန ညွှန်ကြားရေးမှူး ဦးမြင့်သိန်းက ပြောကြားသည်။

မြစ်ကမ်းပါး ကာကွယ်ထိန်းသိမ်းရေးလုပ်ငန်းများတွင် ကမ်းထိန်းတမံနှင့်အတူ  ဒေသမျိုးရင်း ကမ်းထိန်းအပင်များကိုပါ တွဲဖက်စိုက်ပျိုးဆောင်ရွက်နိုင်ရေးအတွက် ဧပြီ ၂၁ ရက်က ဧရာဝတီမြစ်ကမ်းနံဘေးရွာများကို မန္တလေးတိုင်းဒေသကြီး သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီး ဦးဦးမျိုးသစ်၊ မန္တလေးတိုင်းဒေသကြီး သစ်တောဦးစီးဌာနညွှန်ကြားရေးမှူး ဦးမြင့်သိန်း၊ တိုင်းအဆင့် ဆက်စပ်ဌာနအကြီးအကဲများက မတ္တရာမြို့နယ်အတွင်းရှိ ဧရာဝတီမြစ်ကမ်းနံဘေးရှိ ကမ်းပြိုကျေးရွာများတွင် မအူသစ်မျိုးများ စိုက်ပျိုးရေး၊ Vertiver Grass စိုက်ပျိုးရေး၊ ကမ်းပြိုကာကွယ်ရေးအတွက် ဆောင်ရွက်နေသည့် အစီအမံများကို ကွင်းဆင်းကြည့်ရှုစစ်ဆေးခဲ့ကြသည်။

April 24, 2018














Copy Protected by Chetan's WP-Copyprotect.