ဘင်္ဂလားဒေ့ရှ်မှ ပြန်လည် ဝင်ရောက်လာသူများ ပြန်လည် လက်ခံရေးအတွက် လုပ်ငန်းကော်မတီနှစ်ခုကို ထပ်မံ ဖွဲ့စည်းသွားမည် ဖြစ်ကြောင်း လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန ပြည်ထောင်စုဝန်ကြီး ဒေါက်တာ ဝင်းမြတ်အေးက ဧပြီ ၂၀ ရက်တွင် ပြုလုပ်သည့် နေရပ်စွန့်ခွာသူများ ပြန်လည်လက်ခံရေးနှင့် ပြန်လည်နေရာချထားရေး ကော်မတီ၏ ဒုတိယအကြိမ် လုပ်ငန်းညှိနှိုင်း အစည်းအဝေးတွင် ပြောကြားခဲ့ခြင်း ဖြစ်ကြောင်း လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၏ ထုတ်ပြန်ချက်အရ သိရသည်။
ပြည်ထောင်စုဝန်ကြီးက နေရပ်စွန့်ခွာသူများ ပြန်လည် လက်ခံရေးနှင့် ပြန်လည်နေရာချထားရေးအတွက် သတ်မှတ်ထားသော လုပ်ထုံးလုပ်နည်းများနှင့်အညီ အုပ်ချုပ်မှုပိုင်းကို ပိုမိုပီပြင်အောင် ဆောင်ရွက်နိုင်ရန်အတွက် တစ်ဖက်နိုင်ငံမှ ပြန်လည် ဝင်ရောက်သူများကို ပြန်လည် လက်ခံရာတွင် ဥပဒေနှင့်အညီ စနစ်တကျ စီစဉ်ဆောင်ရွက်ရန်အတွက် ကော်မတီကို ဖွဲ့စည်းရခြင်း ဖြစ်ကြောင်း၊ နေရပ်စွန့်ခွာသူများ ပြန်လည် လက်ခံရေးနှင့် ပြန်လည်နေရာချထားရေး ဆောင်ရွက်မှုနှင့် ပတ်သက်ပြီး နှောင့်နှေးကြန့်ကြာမှုများ ရှိနေရခြင်းသည် မြန်မာ-ဘင်္ဂလားဒေ့ရှ် နှစ်နိုင်ငံ သဘောတူစာချုပ်အရ ဇန်နဝါရီ ၂၃ ရက်မှ စတင်ပြီး လက်ခံဆောင်ရွက်ရန် အဆင်သင့် ဖြစ်နေခဲ့သော်လည်း တရားဝင် ပြန်လည် ဝင်ရောက်လာခြင်း မရှိသည့်အတွက် ဘင်္ဂလားဒေ့ရှ်နိုင်ငံသို့ သွားရောက် စုံစမ်းခဲ့ရာ အကြောင်းမှန်ကို သိရှိခဲ့သဖြင့် သတင်းစာရှင်းလင်းပွဲ ပြုလုပ်ခဲ့ကြောင်း ပြောကြားသည်။
ထို့ပြင် ပြန်လည် လက်ခံရေး ဆောင်ရွက်ရာတွင် ပြန်လည် လက်ခံမည့်ပုံစံတွင် စနစ်တကျ ဖြည့်စွက် ဆောင်ရွက်ရမည့်ဖြစ်ကြောင်း၊ NVC နှင့်ပတ်သက်၍ NVC ကိုင်ဆောင်လျှင် ရရှိမည့် အကျိုးကျေးဇူး ရှစ်ချက်နှင့် မြန်မာ-အင်္ဂလိပ် နှစ်ဘာသာဖြင့် ထုတ်ပြန်ပေးရန် အမျိုးသားမှတ်ပုံတင်ရေး ဦးစီးဌာနမှ တာဝန်ယူ ဆောင်ရွက်ပေးပြီး နိုင်ငံပိုင် မီဒီယာများမှတစ်ဆင့် ထုတ်ပြန် ဆောင်ရွက်သွားမည် ဖြစ်ကြောင်း၊ လုပ်ငန်းကော်မတီ နှစ်ခုကိုလည်း ထပ်မံ ဖွဲ့စည်းဆောင်ရွက်သွားမည် ဖြစ်ပါကြောင်း၊ ပြန်လည် ဝင်ရောက်သူများသည် နှစ်နိုင်ငံ သဘောတူညီချက်အတိုင်း လက်ခံရေး စခန်းများမှတစ်ဆင့် ဝင်ရောက်ရမည်ဖြစ်ပြီး သတ်မှတ်ချက်များအတိုင်း NVC ကိုင်ဆောင်ပြီး ပြန်လည်လက်ခံရေး ကြားစခန်းတွင် ခေတ္တနေထိုင်ရမည် ဖြစ်ကြောင်း ပြည်ထောင်စုဝန်ကြီးက ပြောကြားသည်။
ယင်းအပြင် ပြန်လည်လက်ခံရေး ကြားစခန်းတွင် မိုးရွာပါက မြေသားများ ရွှံ့ဗွက်ဖြစ်နိုင်သဖြင့် လမ်းများအား ကျောက်ခင်းလမ်းများ၊ ရေထုတ်ပြွန်များ ဆောင်ရွက်သွားရန်ကိစ္စ၊ သယ်ယူပို့ဆောင်ရေးအတွက် တပ်မတော်မှ မော်တော်ယာဉ်များ စက်သုံးဆီရရှိရေး စီမံဆောင်ရွက်ပေးရန်ကိစ္စ၊ လက်ခံရေး နှင့် ကြားစခန်းများတွင် အုပ်ချုပ်ရေးနှင့် ဆိုင်သည့်အဖွဲ့များ ဖွဲ့စည်းဆောင်ရွက်ပေးရန်ကိစ္စ၊ လယ်မြေများကို တာဝန်ယူ ဆောင်ရွက်ပေးမည့် အပိုင်းများကို ပွင့်ပွင့်လင်းလင်း ရှင်းလင်းပေးရန်ကိစ္စ၊ ကျွေးမွေး စားသောက်စရိတ်များ တိုးမြှင့်ပေးမည့်နှုန်းထား သတ်မှတ်ပေးရန်ကိစ္စ၊ ပြန်လည် နေရာချထားရေးအပိုင်း ဖြစ်သော နေအိမ်များတွင် သောက်သုံးရေနှင့် အိမ်သာကျင်းများ စနစ်တကျ ဆောင်ရွက်ထားရှိရန် ကိစ္စများနှင့်ပတ်သက်၍ ဆောင်ရွက်သွားရမည် ဖြစ်ကြောင်း ပြည်ထောင်စုဝန်ကြီး ဒေါက်တာ ဝင်းမြတ်အေးက ပြောကြားသည်။
