<

ရာထူးလျှော့ချ အပြစ်ပေးခံရသည့် ဧရာဝတီတိုင်း စည်ပင်သာယာရေးအဖွဲ့ ညွှန်ကြားရေးမှူးဟောင်းမှာ လုပ်ငန်းတာဝန်များ ဆက်လက် မထမ်းဆောင်လိုသောကြောင့် ပင်စင်ခံစားခွင့် လျှောက်တင်

ဧရာဝတီတိုင်းဒေသကြီး အစိုးရသစ် လက်ထက်တွင် ပထမဆုံးအကြိမ်အဖြစ် နိုင်ငံ့ဝန်ထမ်း ဥပဒေနှင့်မညီဟုဆိုကာ ရာထူးလျှော့ချ အပြစ်ပေးခံခဲ့ရသည့် ဧရာဝတီတိုင်းဒေသကြီး စည်ပင်သာယာရေးအဖွဲ့ ညွှန်ကြားရေးမှူး ဦးအောင်မင်းနိုင်အနေဖြင့် ရာထူးလျှော့ချခြင်း ခံခဲ့ရသည့် ဖျာပုံမြို့နယ် အမှုဆောင်အရာရှိအဖြစ် ဆက်လက် တာဝန်မထမ်းဆောင်လိုတော့သောကြောင့် လုပ်သက်ပြည့်ပင်စင် ခံစားခွင့်ပြုရန် အစိုးရအဖွဲ့ထံ တင်ပြခဲ့ကြောင်း သတင်းရရှိသည်။

ဧပြီ ၁၉ ရက်တွင် ပြုလုပ်သည့် ဧရာဝတီတိုင်းဒေသကြီး အစိုးရအဖွဲ့ အစည်းအဝေး ဆုံးဖြတ်ချက်အရ တိုင်းဒေသကြီး စည်ပင်သာယာရေးအဖွဲ့ ညွှန်ကြားရေးမှူး ဦးအောင်မင်းနိုင်မှာ နိုင်ငံ့ဝန်ထမ်းများ လိုက်နာရမည့် ဥပဒေ နည်းဥပဒေများနှင့် စည်းကမ်းများကို ဖောက်ဖျက် ကျူးလွန်ခဲ့သောကြောင့်ဟုဆိုကာ လက်ရှိ တာဝန်ထမ်းဆောင်နေသည့် ညွှန်ကြားရေးမှူးရာထူးမှ ဒုတိယညွှန်ကြားရေးမှူး ရာထူးသို့ ရာထူးတစ်ဆင့်ချ အရေးယူခဲ့ပြီး ဖျာပုံမြို့နယ် စည်ပင်သာယာရေးအဖွဲ့ အမှုဆောင် အရာရှိအဖြစ်သို့ နေရာပြောင်းရွှေ့ အရေးယူ ဆောင်ရွက်ခဲ့ကြောင်း၊ လစ်လပ်သွားသည့် ညွှန်ကြားရေးမှူးနေရာတွင် ဧရာဝတီတိုင်းဒေသကြီး စည်ပင်သာယာရေးအဖွဲ့မှ ဒုတိယ အင်ဂျင်နီယာမှူးကြီး ဦးနိုင်လင်းမောင်အား ခေတ္တညွှန်ကြားရေးမှူးအဖြစ် ပြောင်းလဲ တာဝန်ပေးခဲ့ကြောင်း၊ ယင်းကဲ့သို့ အရေးယူ ဆောင်ရွက်မှုကြောင့် ဦးအောင်မင်းနိုင် အနေဖြင့် လုပ်ငန်းတာဝန်များကို ဆက်လက် မထမ်းဆောင်လိုသောကြောင့် လုပ်သက်ပြည့်ပင်စင် ခံစားခွင့် လျှောက်ထားခဲ့ပြီး ရာထူးတာဝန်များမှ အနားယူခဲ့ကြောင်း သိရသည်။

“သဘောကတော့ ကိစ္စ၀ိစ္စတွေက ရှိနေတော့ ကျွန်တော် ဆက်လက်ပြီးတော့မှ တာဝန် မထမ်းဆောင်တော့ဘူးလေ။ ကျွန်တော့်ရဲ့ လုပ်သက်ပြည့်ပင်စင် ခံစားခွင့် ကျွန်တော် တင်လိုက်တာ၊ အစိုးရအဖွဲ့က နိုင်ငံဝန်ထမ်းဥပဒေနဲ့ မညီဆိုပြီး ပြောတဲ့အပေါ်မှာတော့ ဖြေရှင်းဆောင်ရွက်စရာ လောလောဆယ်မှာတော့ မရှိသေးပါဘူး”ဟု ယခင်ညွှန်ကြားရေးမှူးဟောင်း ဦးအောင်မင်းနိုင်က ဆိုသည်။

လုပ်သက်ပြည့်ပင်စင် ခံစားခွင့်ပြုရန် တင်ပြရာတွင် ယခင်ညွှန်ကြားရေးမှူး ရာထူးဖြင့်သာ လျှောက်ထားခြင်း ဟုတ် မဟုတ်နှင့် ယခု ရာထူးလျှော့ချ အရေးယူခံထားရသည့် ဒုတိယညွှန်ကြားရေးမှူးအဖြစ် လျှောက်ထားခြင်း ဟုတ် မဟုတ်အပေါ် ဧရာဝတီတိုင်းဒေသကြီး အစိုးရအဖွဲ့၏ အရေးယူအပြစ်ပေး ခံခဲ့ရသည့် ညွှန်ကြားရေးမှူးဟောင်း ဦးအောင်မင်းင် အနေဖြင့် တိကျစွာပြောကြားခဲ့ခြင်း မရှိကြောင်း သိရသည်။

April 22, 2018














Copy Protected by Chetan's WP-Copyprotect.