<

တောင်သူများအနေဖြင့် ဘဏ္ဍာရေးဆိုင်ရာ စီမံခန့်ခွဲမှုအပိုင်း အားနည်းသည့်အတွက် ချေးငွေများကို ရင်းနှီးမြှုပ်နှံမှုထက် မိသားစုသုံးစွဲမှုတွင် သုံးစွဲလေ့ရှိသဖြင့် ကြွေးတင်ရှိမှု ပိုမိုမြင့်မားနေ

ပဲခူးတိုင်းဒေသကြီးအတွင်းရှိ လယ်ယာလုပ်ငန်းခွင်တစ်ခုအား တွေ့ရစဉ် (ဓာတ်ပုံ-ဇော်ဝင်းချစ်)

တောင်သူများအနေဖြင့် ဘဏ္ဍာရေးဆိုင်ရာ စီမံခန့်ခွဲမှုအပိုင်းတွင် အားနည်းနေသည့်အတွက် ချေးငွေများကို ရင်းနှီးမြှုပ်နှံမှုထက် မိသားစုသုံးစွဲမှုများတွင် သုံးစွဲလေ့ရှိသဖြင့် ကြွေးတင်ရှိမှု ပိုမိုမြင့်မားနေကြောင်း ရန်ကုန်တိုင်းဒေသကြီး စိုက်ပျိုးရေးက ဖွံ့ဖြိုးတိုးတက်ရေးစီမံကိန်း (၂၀၁၈-၂၀၂၁) တတိယမူကြမ်းတွင် ဖော်ပြထားသည်။

လက်ရှိ လယ်ယာကဏ္ဍ စိုက်ပျိုးထုတ်လုပ်သူများ အနေဖြင့် မြန်မာ့လယ်ယာဖွံ့ဖြိုးရေးဘဏ်နှင့် ပုဂ္ဂလိကချေးငွေလုပ်ငန်းများမှ ချေးယူရရှိသော ဘဏ္ဍာငွေများဖြင့် အဓိက လုပ်ကိုင်နေကြကြောင်း၊ သုတေသနစစ်တမ်းများအရ ရန်ကုန်တိုင်းဒေသကြီးအတွင်းရှိ လယ်ယာလုပ်ငန်းလုပ်ကိုင်သော အိမ်ထောင်စု စုစုပေါင်း၏ ၄၈ ရာခိုင်နှုန်းသည် မိုးရာသီတွင်လည်းကောင်း၊ ၆၁ ရာခိုင်နှုန်းသည် ပွင့်လင်းရာသီတွင်လည်းကောင်း၊ မြန်မာ့လယ်ယာဖွံ့ ဖြိုးရေးဘဏ်မှ ချေးငွေရယူ ဆောင်ရွက်ခြင်းဖြစ်ကြောင်း မူကြမ်းတွင် ဖော်ပြထားသည်။

ထို့ပြင် ထုတ်ချေးပေးသော ချေးငွေသည် ကာလအားဖြင့်သော်လည်းကောင်း၊ အတိုးနှုန်းအားဖြင့်သော်လည်းကောင်း သင့်တော်သော အခြေအနေတွင်ရှိကြောင်း၊ သို့သော်လည်း အခက်အခဲတရပ်သည် လယ်ယာဖွံ့ဖြိုးရေးဘဏ်သည် တောင်သူအများအပြားကို တပြေးညီ ထုတ်ချေးပေးရန် ပြင်ဆင်ရသဖြင့် တောင်သူတစ်ဦးချင်းစီ၏ လိုအပ်သော ပမာဏနှင့် တိကျသောအချိန်တွင် ငွေချေးမပေးနိုင်သည့် အခက်အခဲ ဖြစ်နေကြောင်း၊ အခြားစိန်ခေါ်မှုတစ်ရပ်သည် တောင်သူများအနေဖြင့် ဘဏ္ဍာရေးဆိုင်ရာ စီမံခန့်ခွဲမှုအပိုင်းတွင် အားနည်းသည့်အတွက် ရရှိလာသောချေးငွေများကို လုပ်ငန်းရင်းနှီးမြှုပ်နှံမှုထက် အခြားမိသားစုသုံးစွဲမှုများတွင် လှည့်ပြောင်းသုံးစွဲလေ့ရှိသဖြင့် ကြွေးတင်ရှိမှု ပိုမိုမြင့်မားသကဲ့သို့ ဖြစ်နေကြောင်း မူကြမ်းတွင် ဖော်ပြထားသည်။

ထို့ကြောင့်တောင်သူများ၏ လိုအပ်ချက်များကို စနစ်တကျ ဖော်ထုတ်ပြီး တစ်ဦးချင်းအလိုက် အမှန်တကယ် စီးပွားဖြစ် ရင်းနှီးမြှုပ်နှံပေးနိုင်မည့် အသေးစားငွေချေးလုပ်ငန်းများ၊ ကျေးလက်အခြေပြုကုန်သည်ငယ်များနှင့် ကျေးလက်ကုန်ကြမ်း တန်းဖိုးမြှင့်တင်ရေးအတွက် တစ်နိုင်တစ်ပိုင် ကုန်ထုတ်ရုံများကို ငွေချေးပေးနိုင်မည့် အသေးစား၊ အလတ်စား စက်မှုလုပ်ငန်းများ ဖွံ့ဖြိုးရေး ရန်ပုံငွေများ၊ တောင်သူများနှင့် အကျိုးတူ ဆောင်ရွက်မည့် ပုဂ္ဂလိကလုပ်ငန်းများကို အထူးပံ့ပိုးမည့် နှစ်ဆင့်ခံ ချေးငွေအစီအစဉ်များကို တန်ဖိုးမြှင့် ကွင်းဆက်ကြောင်းတစ်လျှောက် ငွေဖြည့်စည်းရေး စနစ်တကျ ဖွံ့ဖြိုးလာရေးကို ရန်ကုန်တိုင်းဒေသအတွင်း စတင်စမ်းသပ် ဆောင်ရွက်နိုင်ပါက အကျိုးဖြစ်ထွန်းမည်ဖြစ်ကြောင်း မူကြမ်းတွင် ဖော်ပြထားသည်။

ဆက်လက်ပြီး ယင်းစနစ်တွင် သက်ဆိုင်သူများအကြား ထိရောက်သော ငွေကြေးစီမံခန့်ခွဲမှုနှင့် အသုံးချမှုများမဖြစ်စေရန်အတွက် လိုအပ်သော သင်တန်းကျောင်းများ ဖွင့်လှစ်ခြင်း၊ ပညာပေးအစီအစဉ်များ ရေးဆွဲခြင်းနှင့် တောင်သူအခြေပြု ငွေစုငွေချေး အဖွဲ့အစည်းများ ဖွဲ့စည်းလုပ်ဆောင်စေခြင်း အစရှိသည်တို့ကိုလည်း ထည့်သွင်းရေးဆွဲသင့်ကြောင်း၊ ရိတ်သိမ်းချိန်လွန်နည်းပညာနှင့် အခြေခံ အဆောက်အအုံများ အားနည်းမှုများကြောင့် လေ့လွင့်ဆုံးရှုံးမှုများနှင့် သဘာဝဘေးအန္တရာယ်ဆုံးရှုံးမှုများကို ကာကွယ်နိုင်ရန် သီးနှံ အာမခံစနစ်တရပ်ကို ဖော်ဆောင်ရမည်ဖြစ်ကြောင်း၊ အဆိုပါ လုပ်ငန်းများအတွက် လိုအပ်နေသော မတည်ငွေကို ပြည်ပရင်းနှီးမြှုပ်နှံမှုနှင့် ချေးငွေအစီအစဉ်များမှ တစ်ဆင့် ဆောင်ရွက်နိုင်ရေးအတွက် ထည့်သွင်းစဉ်းစားရမည်ဖြစ်ကြောင်း မူကြမ်းတွင် ဖော်ပြထားသည်။

April 19, 2018














Copy Protected by Chetan's WP-Copyprotect.