ဌာနချင်း လုပ်ပိုင်ခွင့်များ မရှင်းလင်းသောကြောင့် စားသုံးသူ အခွင့်ရေး ချိုးဖောက်ခံရခြင်းများကို အသေအချာ အပြစ်ပေးနိုင်ခြင်း မရှိသေးဘဲ ဥပဒေစံနှုန်းများအတိုင်း စိစစ်အရေးယူမှုမရှိသဖြင့် တိုင်ကြားမှု နည်းပါးနေခြင်းဖြစ်ကြောင်း မြန်မာစားသုံးသူများသမဂ္ဂ၊ အတွင်းရေးမှူး ဦးမောင်မောင်က ပြောကြားသည်။

“တကယ်ဆိုရင် စားသုံးသူ ဥပဒေအရ အရေးယူလိုက်ရင် မြန်တာတွေ ရှိပါတယ်။ ဘယ်သူက တရားစွဲမလဲဆိုတော့ ဝန်ထမ်းက တရားရုံးကတောင်ပြန်ရမှာ မဟုတ်တော့ဘူးလေ။ အမှုသေးသေးတွေ မြန်မြန်ရှင်းနိုင်ရင် ကောင်းသလို အမှုကြီးတွေလည်း မညှာမတာ ပြတ်ပြတ်အရေးယူသင့်ပြီ။ ရဲအမှု မြောက်တယ်ဆို ရဲနဲ့တင်ပြတ်လည်း ပြီးတာပဲ။ ဌာနတွေက ကိုယ့်အပိုင်းကို အပြတ်ချရမှာပါ။ ဆေးဝါးအစာဆိုလည်း FDA က အပြတ်ရှင်းပေါ့။ စိုက်ပျိုးရေး ကိစ္စမတရားလုပ်လို့တိုင်တယ်။ ဌာနတွေလိုက်စုပေါင်းနေရတာနဲ့ နစ်နာသူက ဆက်ခံနေရတယ်။ လိမ်မှန်းသိရင် ရဲအမှုနဲ့ အရေးယူပြီးသား ဖြစ်နေရမှာ။ ရပ်ကျေးအုပ်ချုပ်ရေးမှူးကနေ လွှတ်တော်ကိုယ်စားလှယ်၊ ပြီးရင် ရပ်မိရပ်ဖ၊ ပြီးရင် သက်ဆိုင်ရာဌာန၊ ပြီးရင် စာချုပ်ချုပ်တဲ့ ရှေ့နေရှေ့ရပ်၊ ပြီးရင် စည်ပင်၊ ပြီးရင် ကျန်းမာရေး၊ ပြီးရင် စိုက်ပျိုးရေး၊ အားလုံးစုံတော့မှ မတရားလုပ်တဲ့သူက ဟိုလိုလို ဒီလိုနဲ့ လစ်ပြေး၊ ဌာနချင်း လုပ်ပိုင်ခွင့်တွေက မရှင်းမလင်းတာတွေ များနေတော့ မဟုတ်မှန်းသိလျက် ထိုခိုက်နစ်နာနေကြပါလျက် ဘာမှအသေအချာ အရေးယူ အပြစ်မပေးနိုင်ကြသေးဘူး။ ဥပဒေစံနှုန်းအတိုင်း စိစစ်အရေးယူမှုမရှိလို့ တိုင်တာနည်းတယ်လို့ ပြောလို့ရတာပေ့ါ” ဟု ဦးမောင်မောင်က ဆိုသည်။

စားသုံးသူအခွင့်ရေး ချိုးဖောက်ခံရခြင်းနှင့် ပတ်သက်ပြီး ဥပဒေစံနှုန်းများ ရှိပြီးသားအတိုင်း စိစစ်အရေးယူမည်ဆိုပါက ပြည်သူက ပိုယုံကြည်လာမည်ဖြစ်၍ ရလဒ်အပေါ် စိတ်ချယုံကြည် အားကိုးလာမည်ဖြစ်ကြောင်း၊ ပြည်သူများအနေဖြင့် အကြောက်တရားဖြင့် နေလာရသည့်အတွက် သိသော်လည်း မလုပ်ရဲ၊ မလုပ်ချင်ကြဘဲ ပြည်သူများ၏ အသိပညာထက် အုပ်ချုပ်သူများက သတ္တိရှိ ပြတ်သားပြီး စားသုံးသူအရေးကို ပိုနားလည် လက်ခံသဘောပေါက်ရန် အရေးတကြီး လိုအပ်နေကြောင်း မြန်မာစားသုံးသူများသမဂ္ဂ၊ အတွင်းရေးမှူး ဦးမောင်မောင်က သုံးသပ်ပြောကြားသည်။

မြန်မာနိုင်ငံတွင် စားသုံးသူ အခွင့်အရေး ချိုးဖောက်ခံရခြင်းများကို အခွင့်အရေး ချိုးဖောက်ခံရသည်ဟု မခံစားဘဲ ကံအပေါ် ပုံချနေသူများပြားပြီး တိုင်းပြည် ပြန်လည်ထူထောင်ရေးတွင် စားသုံးသူရပိုင်ခွင့် အခွင့်အရေးကို ကိုယ်ချင်းစာတရားအား အခြေခံကြရန်လိုကြောင်း ဦးမောင်မောင်က ပြောကြားသည်။

လက်ရှိအချိန်တွင် စားသုံးသူအခွင့်အရေး ချိုးဖောက်ခံရခြင်းကို စားသုံးသူရေးရာ ဦးစီးဌာနက တည်ထောင်ထားသည့် Website သို့ တိုင်ကြားနိုင်သလို မြန်မာစားသုံးသူများသမဂ္ဂသို့လည်း တိုင်ကြားနိုင်ကြောင်း သိရသည်။

မြန်မာစားသုံးသူများ သမဂ္ဂကို ၂၀၁၂ ခုနှစ်က စတင်ဖွဲ့စည်းခဲ့ခြင်းဖြစ်ပြီး သမဂ္ဂအနေဖြင့် တိုင်ကြားမှုများကို အချက်အလက် မှန်ကန်ရန်၊ တရားဝင်ဖြစ်ရန်၊ စာရွက်စာတမ်းနှင့် အဖြစ်အပျက်များကို အဆင့်ဆင့် စစ်ဆေးကာ စားသုံးသူရေးရာ ဦးစီးဌာနနှင့် တိုင်းဒေသကြီး စားသုံးသူ အငြင်းပွားမှု ဖြေရှင်းရေးအဖွဲ့သို့ ပေးပို့ပြီး မည်သို့အရေးယူ ဆောင်ရွက်ထားကြောင်း စားသုံးသူအား ပြန်လည်သတင်းပို့ပေးခြင်းများ ဆောင်ရွက်ပေးပြီး စေ့စပ်ညှိနှိုင်းခြင်း(လုံးဝ) လုပ်ခွင့်မရှိကြောင်း သိရသည်။