မြန်မာနှစ်ဆန်းတစ်ရက်နေ့ (ဧပြီလ ၁၇ ရက်နေ့) တွင် နိုင်ငံတော်သမ္မတ၏ လွတ်ငြိမ်းချမ်းသာခွင့်အမိန့်ဖြင့် အကျဉ်းသားများအား လွှတ်ပေးခဲ့ရာ မြိတ်ခရိုင်အတွင်း အကျဉ်းသား ၂၉၃ ဦး ပါဝင်ခဲ့ပြီး မူးယစ်ဆေးဝါးအမှုဖြင့် အကျဉ်းကျခံနေရသူ အများစုပါဝင်ခဲ့ကြောင်း သိရသည်။
ပြည်ထောင်စုသမ္မတမြန်မာနိုင်ငံတော်၊ နိုင်ငံတော်သမ္မတရုံးအမိန့်စာအမှတ် ၁၇/၂၀၁၈ ကျင့် ၄၀၁ (ခ) အရ လွတ်ငြိမ်းချမ်းသာခွင့်ပေးရာတွင် အကျဉ်းထောင်/စခန်း အသီးသီးတွင် အကျဉ်းကျခံနေရသည့် နိုင်ငံသားအကျဉ်းသား/သူ ၈၄၉၀ လွတ်ငြိမ်းချမ်းသာခွင့် ရခဲ့ကြောင်း သိရသည်။
“ဒီကနေ့ ကျွန်တော်တို့ မြိတ်အကျဉ်းထောင်ကနေ ကျား ၄၇ ဦး၊ မ ၉ ဦး အားလုံးပေါင်း ၅၇ ဦး လွှတ်ပေးလိုက်တာပါ။ လွတ်ငြိမ်းချမ်းသာခွင့်ပေးတဲ့အပိုင်းမှာ အများစုကတော့ မူးယစ်ဆေးသုံးစွဲတဲ့ အမှုနဲ့ ပြစ်ဒဏ်ကျခံနေရတဲ့သူတွေ များပါတယ်။ အသက်ကြီးအကျဉ်းသူတစ်ဦးပါတယ်။ အသက် ၆၀ ကျော် အဖွားတစ်ဦးပါတယ်။ အားလုံးပေါင်းလိုက်ရင် ၅၇ ဦးပါ နိုင်ငံရေးအကျဉ်းသားမရှိပါဘူး။ စည်းကမ်းသတ်မှတ်ချက်မထားဘဲနဲ့ ဆောင်ရွက်တာပါ။ ၄၀၁(ခ)ဆိုတဲ့ အဓိပ္ပါယ်ပါ” ဟု မြိတ်အကျဉ်းထောင်မှ လက်ထောက်ညွန်ကြားရေးမှူး ဦးနိုင်စိုးလင်းက ပြောကြားခဲ့သည်။ မြိတ်ခရိုင်အတွင်းမှ အကျဉ်းသားများကို လွှတ်ပေးရာတွင် မြိတ်အကျဉ်းထောင်မှ ၅၆ ဦး၊ ကျောက်ဖြူတောင်အကျဉ်းစခန်းမှ ၁၀၁ ဦး၊ ပုလော၊ ပလောက်(နတ်စင်ကုန်း) အကျဉ်းစခန်းမှ ၄၄ ဦး၊ ဆင်ဖြူရှင်အကျဉ်းစခန်း (တနင်္သာရီ) မှ ၉၂ ဦးတို့အား လွတ်ငြိမ်းချမ်းသာခွင့်ပေးခဲ့ကြောင်း သိရသည်။
