တရားဥပဒေမဲ့ လူ့အခွင့်အရေး ဆုံးရှုံးမှုများကို နိုင်ငံသူနိုင်ငံသားများနှင့် နောင်မျိုးဆက်များ မခံစားရစေရေးအတွက် ပိုမိုအရှိန်မြှင့်တင်၍ တည်ဆဲဥပဒေများနှင့်အညီ မှန်မှန်ကန်ကန် ဆောင်ရွက်စေလိုကြောင်း မြန်မာနိုင်ငံ လူ့အခွင့်အရေး ကော်မရှင်ဥက္ကဋ္ဌနှင့် အဖွဲ့ဝင်များအား တွေ့ဆုံစဉ် နိုင်ငံတော်သမ္မတ ဦးဝင်းမြင့်က ပြောကြားသည်။

နိုင်ငံတော်သမ္မတ ဦးဝင်းမြင့်သည် မြန်မာနိုင်ငံ အမျိုးသားလူ့အခွင့်အရေးကော်မရှင် ဥက္ကဋ္ဌ ဦးဝင်းမြနှင့်အဖွဲ့ဝင်များအား ဧပြီ ၁၂ ရက် နံနက် ၁၀ နာရီတွင် နေပြည်တော်ရှိ နိုင်ငံတော်သမ္မတအိမ်တော် ဧည့်ခန်းမဆောင်၌ တွေ့ဆုံခဲ့ကြောင်း နိုင်ငံတော်သမ္မတရုံးက သတင်းထုတ်ပြန်ထားသည်။

ထိုသို့တွေ့ဆုံစဉ် နိုင်ငံတော်သမ္မတက တရားဥပဒေစိုးမိုးရေး၊ ဒီမိုကရေစီရေးနှင့် လူ့အခွင့်အရေးတို့သည် တစ်ခုနှင့်တစ်ခု ဆက်စပ်လျက်ရှိကြောင်း၊ အဆိုပါ အချက်များမှ တစ်စုံတစ်ခုကို ချိုးဖောက်ခြင်းခံရပါက အခြားအချက်များကို ချိုးဖောက်ခံရသည်နှင့် တူညီကြောင်း၊ လူ့အခွင့်အရေးသည် နက်နဲကျယ်ပြန့်ကြောင်း၊ နိုင်ငံသားများ၏ မူလလူ့အခွင့်အရေးသည် မည်သူတစ်ဦးတစ်ယောက်ကပေးသည့် အခွင့်အရေးများမဟုတ်ဘဲ မွေးရာပါ အခွင့်အရေးများပင်ဖြစ်ကြောင်း၊ လူ့အခွင့်အရေး ကြေညာစာတမ်းပါ အချက်အချို့သည် ဖွဲ့စည်းပုံအခြေခံဥပဒေ၊ ပြည်ထောင်စုတရားစီရင်ရေးဥပဒေ၊ ပြစ်မှုဆိုင်ရာ ကျင့်ထုံးဥပဒေ၊ ပြစ်မှုဆိုင်ရာဥပဒေ၊ တရားရုံးများလက်စွဲနှင့် တည်ဆဲဥပဒေတို့တွင် ပါရှိပြီးဖြစ်ကြောင်း၊ လူ့အခွင့်အရေးကို လေးစားလိုက်နာခြင်းဖြင့် တရားဥပဒေစိုးမိုးရေးနှင့် ဒီမိုကရေစီ အခွင့်အရေးတို့သည် ကျွဲကူးရေပါသလို ရရှိပြီးဖြစ်ကြောင်း ပြောကြားသည်။

ထို့ပြင် ရဲအချုပ်၊ တရားရုံးအချုပ်၊ အကျဉ်းထောင်၊ အကျဉ်းစခန်းနှင့် ရဲဘက်စခန်းများတွင် အချုပ်သား အကျဉ်းသားများ လူ့အခွင့်အရေး ချိုးဖောက်မှုမခံရစေရေးနှင့် ရသင့်ရထိုက်သည့် အခွင့်အရေးများ ရရှိစေရေးအတွက် လုပ်ထုံးလုပ်နည်းများနှင့်အညီ စီမံဆောင်ရွက်သွားရန် လိုအပ်မည်ဖြစ်ပါကြောင်း၊ တရားဥပဒေမဲ့ လူ့အခွင့်အရေး ဆုံးရှုံးမှုများကို နိုင်ငံသူ နိုင်ငံသားများနှင့် နောင်မျိုးဆက်များ မခံစားရစေရေးအတွက် လူ့အခွင့်အရေးကော်မရှင်အနေဖြင့် ပိုမိုအရှိန်မြှင့််တင်၍ တည်ဆဲဥပဒေများနှင့်အညီ မှန်မှန်ကန်ကန် ဆောင်ရွက်စေလိုပါကြောင်း၊ နိုင်ငံသားအားလုံး မွေးရာပါ လူ့အခွင့်အရေးနှင့် နိုင်ငံသားအခွင့်အရေးများ အပြည့်အ၀ ရရှိစေရေးအတွက် အပြည်ပြည်ဆိုင်ရာ လူ့အခွင့်အရေးစာချုပ်များ၊ ကွန်ဗင်းရှင်းပါ အချက်များ၊ တည်ဆဲဥပဒေများနှင့်အညီ ဆောင်ရွက်စေလိုကြောင်း နိုင်ငံတော်သမ္မတက ဦးဝင်းမြင့်က ပြောကြားသည်။

ထို့နောက် မြန်မာနိုင်ငံ လူ့အခွင့်အရေး ကော်မရှင်ဥက္ကဋ္ဌဦးဝင်းမြက ကော်မရှင်အနေဖြင့် နိုင်ငံတကာ လုပ်ထုံးလုပ်နည်းများနှင့်အညီ ဆောင်ရွက်နေမှု၊ ကမ္ဘာ့လူ့အခွင့်အရေး ကြေညာစာတမ်းကို တိုင်းရင်းသားဘာသာများဖြင့် ဘာသာပြန်ဆိုနေမှု၊ ကော်မရှင်၏ ဖွဲ့စည်းပုံပြင်ဆင် ဆောင်ရွက်နေမှု၊ ကော်မရှင်၏ အသိပညာပေး ဆောင်ရွက်မှုများနှင့် သင်တန်းဖွင့်လှစ်ပို့ချမှု အခြေအနေများ၊ စုံစမ်းစစ်ဆေး ဆောင်ရွက်နေမှု အခြေအနေများ၊ တွေ့ကြုံရသည့် အခက်အခဲများနှင့် အာဆီယံ အပါအဝင်နိုင်ငံတကာနှင့် ပူးပေါင်းဆောင်ရွက်မှု အခြေအနေများကို ရှင်းလင်းတင်ပြခဲ့ကြောင်း သိရသည်။

အဆိုပါ တွေ့ဆုံပွဲသို့ နိုင်ငံတော်သမ္မတနှင့်အတူ သမ္မတရုံးဝန်ကြီးဌာန ဒုတိယဝန်ကြီး ဦးမင်းသူနှင့် တာဝန်ရှိသူများ တက်ရောက်ကြပြီး မြန်မာနိုင်ငံ အမျိုးသားလူ့အခွင့်အရေး ကော်မရှင်ဥက္ကဋ္ဌ ဦးဝင်းမြနှင့်အတူ ဒုတိယ ဥက္ကဋ္ဌ ဦးစစ်မြိုင် အဖွဲ့ဝင်များဖြစ်ကြသည့် ဦးယုလွင်အောင်၊ ဦးညွန့်ဆွေ၊ ဦးခင်မောင်လေးနှင့် ဦးစိုးဘုန်းမြင့်တို့ တက်ရောက်ခဲ့ကြောင်း သိရသည်။

အလားတူ နိုင်ငံတော်သမ္မတဦးဝင်းမြင့်နှင့် အဂတိလိုက်စားမှုတိုက်ဖျက်ရေးကော်မရှင်ဥက္ကဋ္ဌ အပါအဝင် ကော်မရှင်အဖွဲ့ဝင်များ ပထမဆုံးအကြိမ်အဖြစ် ဧပြီ ၁၁ ရက် နံနက် ၁၀ နာရီတွင် နေပြည်တော်ရှိ နိုင်ငံတော်သမ္မတအိမ်တော် ဧည့်ခန်းမ၌ တွေ့ဆုံခဲ့ပြီး အဂတိလိုက်စားမှု တိုက်ဖျက်ရေးကော်မရှင် အနေဖြင့် ဆောင်ရွက်ရမည့် လုပ်ငန်းတာဝန်များကို မျက်နှာကြီးငယ်မလိုက်၊ ဆူကြုံနိမ့်မြင့်မရွေး ပြတ်ပြတ်သားသား ဆောင်ရွက်ရန်လိုကြောင်း နိုင်ငံတော်သမ္မတက မှာကြားသည်။

ထို့အတူ နိုင်ငံတော်သမ္မတဦးဝင်းမြင့်သည် ပြည်ထောင်စုတရားသူကြီးချုပ် ဦးထွန်းထွန်းဦး အပါအဝင် တရားလွှတ်တော်ချုပ် တရားသူကြီးများနှင့် ဧပြီ ၁၁ ရက် မွန်းလွဲပိုင်းတွင် နိုင်ငံတော်သမ္မတအိမ်တော်၌ တွေ့ဆုံခဲ့သည်။

ထိုသို့တွေ့ဆုံရာတွင် တရားစီရင်ရေးမဏ္ဍိုင် တည့်မတ်ခိုင်မာရေးအတွက် အဆင့်ဆင့် တာဝန်ယူမှု တာဝန်ခံမှုစနစ်များဖြင့် ဆင့်ကဲကြပ်မတ်သွားရန်လိုကြောင်း နိုင်ငံတော်သမ္မတက ပြောကြားသည်။