လျှပ်စစ်နှင့် စွမ်းအင်ဝန်ကြီးဌာန၏ လက်ဝယ်ရှိ စက်သုံးဆီများထဲမှ ဓာတ်ဆီဂါလန်သုံးသန်းကို ဈေးကွက်အတွင်းသို့ ဖြည့်ဆည်းရောင်းချပေးမည်ဖြစ်ပြီး စက်သုံးဆီ ဈေးနှုန်းကျဆင်းရေး လုပ်ဆောင်သွားမည် ဖြစ်ကြောင်း သိရသည်။
မြန်မာနိုင်ငံသည် စက်သုံးဆီအား နိုင်ငံအတွင်းထွက်ရှိသော ရေနံမှတစ်ဆင့် ကိုယ်တိုင်ထုတ်လုပ်သုံးစွဲသည့် နိုင်ငံဖြစ်သော်လည်း ပြည်တွင်းထုတ်လုပ်နေမှု လုံလောက်ခြင်းမရှိသည့်အတွက် ပြည်ပမှ မှာယူတင်သွင်း သုံးစွဲလျက်ရှိပြီး နိုင်ငံတော်ဖွံ့ဖြိုးတိုးတက်မှု အခြေအနေအရ စက်သုံးဆီသုံးစွဲမှု ပိုမိုများပြားလာသည့်အတွက် တင်သွင်းမှု တစ်နှစ်ထက်တစ်နှစ် တိုးတက်တင်သွင်းနေရကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ဆိုသည်။
ထို့ပြင် နိုင်ငံတော်ဖွံ့ဖြိုးတိုးတက်ရေးအတွက် စက်သုံးဆီများကို အရည်အသွေးနှင့် ဈေးနှုန်းမှန်ကန်စွာဖြင့် သုံးစွဲနိုင်ရေး အထူးအရေးကြီးပြီး နိုင်ငံတကာဈေးနှုန်းအပေါ် အခြေခံ၍ ပြည်တွင်းဈေးနှုန်းများ ပြောင်းလဲမည်ဖြစ်သော်လည်း ဖြစ်သင့်ဖြစ်ထိုက်သည့် ပြောင်းလဲမှုမျိုးဖြစ်စေရန် လိုအပ်နေကြောင်း ဒေါက်တာသန်းမြင့်က ဆိုသည်။ လက်ရှိတွင် စက်သုံးဆီဈေးနှုန်းများ ကြီးမြင့်နေမှုကြောင့် ကုန်ထုတ်လုပ်မှုစရိတ်၊ သယ်ယူပို့ဆောင်ရေး စရိတ်များ မြင့်တက်လာပြီး အထွေထွေ ကုန်ဈေးနှုန်းများအပေါ်တွင်ပါ အကျိုးသက်ရောက်မှု ဖြစ်ပေါ်နေကြောင်း ဒေါက်တာသန်းမြင့်က ဆိုသည်။
ထို့ကြောင့် စက်သုံးဆီဈေးနှုန်း တည်ငြိမ်ရေး၊ ဈေးနှုန်းကျဆင်းရေးအတွက် ရေတို၊ ရေရှည်စီမံကိန်းများ၊ စက်သုံးဆီများကို ဝယ်ယူ၊ သိုလှောင်၊ သယ်ယူ၊ ဖြန့်ဖြူးရောင်းချသည့် လုပ်ငန်းတစ်လျှောက် (Supply Chain) တစ်ခုလုံးအတွက် ထည့်သွင်းစဉ်းစားပြီး သက်ဆိုင်ရာ တာဝန်ရှိသူများ ပူးပေါင်းပါဝင်ဆောင်ရွက်ရန် လိုအပ်မည်ဟု ဒေါက်တာသန်းမြင့်က ဆက်လက်ပြောကြားသည်။
လက်ရှိတွင် စက်သုံးဆီဈေးနှုန်း တည်ငြိမ်ရေး၊ ဈေးနှုန်းကျဆင်းရေးအတွက် လတ်တလော ဖြေရှင်းဆောင်ရွက်ရမည့်နည်းလမ်း၊ ကာလလတ်နှင့် ကာလရှည်ဆောင်ရွက်ရမည့်နည်းလမ်းများ ဆွေးနွေးညှိနှိုင်း ဆောင်ရွက်သွားမည်ဖြစ်ပြီး ဌာနဆိုင်ရာများမှ ဆောင်ရွက်ရမည့် ကိစ္စရပ်များကိုလည်း ဆောင်ရွက်ပေးသွားမည်ဖြစ်ကာ စက်သုံးဆီ သိုလှောင်နိုင်မှု စွမ်းအားကိုလည်း ရေရှည်တွင် တိုးမြှင့်ဆောင်ရွက်ရန် လိုအပ်ကြောင်းနှင့် နိုင်ငံအတွင်း ရေနံချက်လုပ်နိုင်စွမ်းကိုလည်း မြှင့်တင်ဆောင်ရွက်ပေးသွားမည်ဖြစ်ကြောင်း လျှပ်စစ်နှင့် စွမ်းအင်ဝန်ကြီးဌာန ပြည်ထောင်စုဝန်ကြီး ဦးဝင်းခိုင်က ဆိုသည်။
