၂၀၁၇-၂၀၁၈ ဘဏ္ဍာနှစ်အတွင်း MIC က ခွင့်ပြုခဲ့သည့် ပြည်တွင်းပြည်ပ ရင်းနှီးမြှုပ်နှံမှုများမှ မြန်မာလုပ်သား တစ်သိန်းတစ်သောင်းကျော်အထိ အလုပ်အကိုင်ရရှိနိုင်မည် ဖြစ်ကြောင်း သိရ

၂၀၁၇-၂၀၁၈ ဘဏ္ဍာနှစ်အတွင်း MIC က ခွင့်ပြုခဲ့သည့် ပြည်တွင်းပြည်ပ ရင်းနှီးမြှုပ်နှံမှုများမှ မြန်မာလုပ်သား တစ်သိန်းတစ်သောင်းကျော်အထိ အလုပ်အကိုင်ရရှိနိုင်မည် ဖြစ်ကြောင်း သိရ
Published 11 April 2018

ပြည်ပရင်းနှီးမြှုပ်နှံမှုလုပ်ငန်း တစ်ခုတွင် ဝင်ရောက်လုပ်ကိုင်နေသည့် မြန်မာလုပ်သားအချု့ိကို တွေ့ရစဉ်

၂၀၁၇-၂၀၁၈ဘဏ္ဍာနှစ်အတွင်း မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) က ခွင့်ပြုခဲ့သည့် ပြည်တွင်းပြည်ပ ရင်းနှီးမြှုပ်နှံမှုများမှ နိုင်ငံသားများအတွက် အလုပ်အကိုင် အခွင့်အလမ်းရရှိသူဦးရေ တစ်သိန်းတစ်သောင်းကျော် အထိ ဖန်တီးပေးနိုင်မည် ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာနမှ သိရသည်။

၂၀၁၇-၂၀၁၈ ဘဏ္ဍာနှစ်အတွင်း ခွင့်ပြုခဲ့သည့် ပြည်တွင်းပြည်ပ ရင်းနှီးမြှုပ်နှံမှု လုပ်ငန်းများမှ နိုင်ငံသားများအတွက် အလုပ်အကိုင် အခွင့်အလမ်း ရရှိနိုင်မှုကို လေ့လာကြည့်ပါက နိုင်ငံခြားရင်းနှီးမြှုပ်နှံမှု လုပ်ငန်း ၂၂၂ ခုမှ ပြည်တွင်းလုပ်သားဦးရေ ၉၃၁၉၇ ဦး၊ ပြည်ပလုပ်သားဦးရေ ၂၅၀၈ ဦးအထိ ရရှိမည်ဖြစ်ကြောင်း သိရသည်။

နိုင်ငံသားရင်းနှီးမြှုပ်နှံမှု လုပ်ငန်း ၁၀၀ ကျော်မှ ပြည်တွင်းလုပ်သားဦးရေ ၂၁၅၈၃ ဦးကိုလည်းကောင်း၊ ပြည်ပလုပ်သားဦးရေ ၄၆၇ ဦးကိုလည်းကောင်း အသီးသီး အလုပ်အကိုင် ရရှိနိုင်မည် ဖြစ်ကြောင်း သိရသည်။

အလုပ်အကိုင် အခွင့်အလမ်း များပြားလာခြင်းကြောင့် ရန်ကုန်တိုင်းဒေသကြီးသို့ ပြောင်းရွှေ့နေထိုင်လာသူ ပိုမိုများပြားလာကြောင်း အပြည်ပြည်ဆိုင်ရာ အလုပ်သမား အဖွဲ့ချုပ်၏ စစ်တမ်းထုတ်ပြန်ချက်အရ သိရသည်။

ရန်ကုန်တိုင်းဒေသကြီးအတွင်း နေထိုင်လျက်ရှိသည့် လူဦးရေ၏ ၄၂ ဒသမ ၃ ရာခိုင် နှုန်းသည် အခြားတိုင်းဒေသကြီး၊ ပြည်နယ်များမှ ပြောင်းရွှေ့လာကြသူများဖြစ်ပြီး၂၆ ရာခိုင်နှုန်းသည် အလုပ်အကိုင်ကြောင့် ရွှေ့ပြောင်းသွားလာခြင်း ဖြစ်ကြောင်း စစ်တမ်းတွင် ဖော်ပြထားသည်။

World Bank နှင့် Livelihoods and Food Security Trust Fund (LIFT) တို့ပူးပေါင်းကာ ၂၀၁၅ ခုနှစ်အတွင်း ကောက်ယူထားသော စစ်တမ်းအရ နိုင်ငံတွင်း ပြောင်းရွှေ့မှုနှုန်းထားမှာ နိုင်ငံ၏ စီးပွားရေးက ပြောင်းလဲမှု စတင်ခဲ့သော၂၀၁၁ ခုနှစ်မှစတင်ကာ နိုင်ငံတွင်း ပြောင်းရွှေ့သွားလာမှု ပိုမိုဖြစ်ပေါ်လာခဲ့ကြောင်း သိရသည်။

JobNet.com.mm  ၏ ၂၀၁၈ ခုနှစ် မတ်လကုန်အထိ ရရှိသော စစ်တမ်းများအရ JobNet.com.mm ၏ Website တွင် အလုပ်အကိုင် လာရောက်ရှာဖွေကြသူများ၏ ၇၆ ရာခိုင်နှုန်းသည် ရန်ကုန်တိုင်းဒေသကြီးမှ ဖြစ်ကြောင်း၊ နိုင်ငံအတွင်း ဝင်ရောက်လာသော နိုင်ငံခြား ရင်းနှီးမြှုပ်နှံမှုများသည် ရန်ကုန်တိုင်းဒေသကြီး အတွင်းသို့သာ အဓိက ဝင်ရောက်လုပ်ကိုင် နေခြင်းကြောင့်ဖြစ်ကြောင်း သိရသည်။

JobNet.com.mm ၏ လေ့လာမှုများအရ တစ်နှစ်တာအတွင်း မြန်မာနိုင်ငံ ရင်းနှီးမြုပ်နံှမှုကော်မရှင်မှ လုပ်ကိုင်ခွင့်ပြုခဲ့သော လုပ်ငန်းများမှ ပေါ်ပေါက်လာသည့် အလုပ်အကိုင်ပေါင်း တစ်သိန်းခန့်တွင် ၇၀ ဒသမ ၄၆ ရာခိုင်နှုန်းသည် ရန်ကုန်တိုင်းဒေသကြီးတွင်ဖြစ်ပြီး ပဲခူးတိုင်းဒေသကြီးတွင် ၈ ဒသမ ၂၃ ရာခိုင်နှုန်းနှင့် မန္တလေးတိုင်းဒေသကြီးတွင် ၇ ဒသမ ၄၇ ရာခိုင်နှုန်း အသီးသီး ဖြစ်ကြောင်း သိရသည်။

မြန်မာနိုင်ငံသည် လုပ်သားအင်အား များပြားသည့် နိုင်ငံဖြစ်သော်လည်း ကျွမ်းကျင်လုပ်သား ရှားပါးသည့် စိန်ခေါ်မှုနှင့် ရင်ဆိုင်နေရကြောင်း သိရသည်။

Most Read

Most Recent