ဧရာဝတီတိုင်းဒေသကြီးအတွင်း ကျေးလက်တစ်ခုတွင် တည်ဆောက်ထားသည့် Cyclone Shelter တစ်လုံးကို တွေ့ရစဉ်
ဧရာဝတီတိုင်းဒေသကြီးတွင် ယခုနှစ်အတွင်း မုန်တိုင်းဒဏ်ခံအဆောက်အအုံ Cyclone Shelter ၅၀ ကျော် တည်ဆောက်မည်ဖြစ်ကြောင်း လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနညွှန်ကြားရေးမှူး ဒေါ်မြတ်မိုးသွင်က ပြောကြားသည်။
“ဧရာဝတီတိုင်းမှာတင်ပဲ အလုံး ၅၀ ကျော်ဆောက်မယ်။ အမျိုးသားသဘာဝဘေးအန္တရာယ်ဆိုင်ရာ ရန်ပုံငွေဆိုတာ ရှိတယ်လေ။ ဒီရန်ပုံငွေထဲကနေမှ အများကြီး အသုံးပြုပြီးတော့မှ ဆောက်ပေးတာပေါ့။ ဒီအစိုးရလက်ထက်မှာ အကြီးစားရင်းနှီးမြှုပ်နှံမှု လုပ်ပေးတာပေါ့နော်။ Cyclone Shelter တွေရဲ့ ထိရောက်မှုကို မြှင့်တင်ဖို့ဆိုပြီး ဘေးဖြစ်ချိန်မှာ Shelter အဖြစ်သုံးမယ်။ ကျန်တဲ့ အချိန်မှာ စာသင်ကျောင်း၊ လူမှုရေး၊ သာရေးနာရေးကိစ္စတွေကို သုံးနိုင်ဖို့ Community Shelter တွေ၊ Multipurpose Shelter တွေကို ဦးစားပေးဆောက်မှာပေါ့” ဟု ညွှန်ကြားရေးမှူး ဒေါ်မြတ်မိုးသွင်က ပြောကြားသည်။
အဆိုပါ မုန်တိုင်းဒဏ်ခံ အဆောက်အအုံများတည်ဆောက်ရာတွင် အနီးအနား ကျေးရွာများရှိ ပြည်သူများအား လွှမ်းခြုံနိုင်စေရန် လူဦးရေအလိုက် အချိုးကျတည်ဆောက်မည်ဖြစ်ကြောင်း၊ ထို့အတွက် နေရာဒေသအလိုက် အရွယ်အစားအမျိုးမျိုး၊ ပုံစံအမျိုးတည်ဆောက်မည်ဖြစ်ကြောင်း ၎င်းက ပြောကြားသည်။
“ဖောင်ဒေးရှင်းက အမြင့်ပေါ့နော်။ အောက်မှာ တိရစ္ဆာန်တွေကို ကယ်ဆယ်နိုင်အောင်၊ ပထမထပ်မှာ လူနေရင် အောက်ထပ်မှာ ကျွဲနွားတွေ ရွှေ့ပြောင်းထားနိုင်အောင် လုပ်ထားပါတယ်။ အသက်ကယ်ပုံးတွေ၊ ရေကန်တွေပါထားတယ်။ ပြီးရင် လျှပ်စစ်မီးရအောင် မီးစက်တွေ၊ ဆီတွေပါလုပ်ထားပါတယ်။ စာသင်ကျောင်းတွေဘာတွေမှာတော့ အဲဒီလောက်အထိ အကြီးကြီးတွဲ မဆောက်နိုင်ပေမယ့် ခိုလှုံဖို့အတွက်တော့ ဖြစ်တယ်ပေါ့နော်။ ပုံမှန်အားဖြင့် နိုင်ငံတကာ Criteria နဲ့ညီအောင်ဆိုရင်တော့ Shelter ဖြစ်ရင် စားနပ်ရိက္ခာ၊ သောက်သုံးရေ၊ လျှပ်စစ်မီးတွေရနိုင်ဖို့ တစ်ခါတည်းလုပ်ထားဖို့ ရှိပါတယ်” ဟု ဒေါ်မြတ်မိုးသွင်က ပြောကြားသည်။
ဧရာဝတီတိုင်းဒေသကြီးတွင် ၂၀၁၂ ခုနှစ်က Shelter Assessment ပြုလုပ်ထားချက်အရ လက်ရှိတွင် အစိုးရ အပါအဝင် အဖွဲ့အစည်းအသီးသီးမှ တည်ဆောက်ပေးထားသည့် မုန်တိုင်းဒဏ်ခံအဆောက်အအုံ အလုံး ၃၀၀၀ ကျော်ရှိကြောင်း၊ သို့ရာတွင် ပြည့်စုံလုံလောက်မှုမရှိသေးကြောင်း ၎င်းက ပြောကြားသည်။
လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနအနေဖြင့် ၂၀၁၈ ခုနှစ်အတွင်း အမျိုးသားသဘာ၀ ဘေးအန္တရာယ်ဆိုင်ရာ စီမံခန့်ခွဲမှုရန်ပုံငွေ ၁၅ ဒသမ ၉၇၃ ဘီလျံဖြင့် ဘက်စုံသုံး မုန်တိုင်းဒဏ်ခံအဆောက်အအုံများကို ဧရာဝတီတိုင်းဒေသကြီးတွင် ၅၇ လုံး၊ ရခိုင်ပြည်နယ်တွင် ၂၆ လုံး ၊ ချင်းပြည်နယ်တွင် တစ်လုံး၊ ရှမ်းပြည်နယ်တွင် တစ်လုံးတည်ဆောက်ပေးမည်ဖြစ်ကြောင်း သိရသည်။
