ညီစားစခန်းတွင် NCA နှင့်ပတ်သက်သည့် လူထုတွေ့ဆုံရှင်းလင်းပွဲ ပြုလုပ်နေသည်ကို တွေ့ရစဉ်
မွန်ပြည်သစ်ပါတီ (NMSP) က တစ်နိုင်ငံလုံး ပစ်ခတ်တိုက်ခိုက်ရပ်စဲရေး သဘောတူစာချုပ် (NCA) တွင် လက်မှတ်ရေးထိုးခဲ့ခြင်းနှင့်ပတ်သက်ပြီး ပထမဆုံးလူထုတွေ့ဆုံ ရှင်းလင်းပွဲအား မွန်ပြည်နယ် ရေးမြို့နယ် ရေးချောင်းဖျားဒေသ မွန်အမျိုးသားပညာရေး ဗဟိုဌာန အခြေစိုက်ရာ ညီစားစခန်း၌ ဧပြီ ၉ ရက်မှ စတင်ကာ ပြုလုပ်လျက်ရှိကြောင်း သတင်းရရှိသည်။
အဆိုပါ လူထုတွေ့ဆုံရှင်းလင်းပွဲတွင် မွန်ဆရာတော်၊ သံဃာတော်များ၊ မွန်ဒေသလုံးဆိုင်ရာ ဒီမိုကရေစီပါတီ (AMDP) နှင့် မွန်အမျိုးသားပါတီ (MNP) တို့မှ ကိုယ်စားလှယ်များ၊ မွန်အရပ်ဘက်လူမှု အဖွဲ့အစည်းများကိုယ်စားလှယ်များ၊ ထိုင်းနိုင်ငံမှ မွန်တိုင်းရင်းသားလူမျိုးကိုယ်စားလှယ်များ၊ အခြား ဖိတ်ကြားသင့်သူများ စုစုပေါင်း ကိုယ်စားလှယ် ၁၉၇ ဦး တက်ရောက်လျက်ရှိပြီး ဧပြီ ၁၁ ရက်ထိပြုလုပ်မည် ဖြစ်သည်။
မွန်ပြည်သစ်ပါတီက ဦးဆောင်ကျင်းပရမည့် မွန်လူမျိုးအလိုက် အမျိုးသားအဆင့် ဆွေးနွေးပွဲများမတိုင်မီ NCA နှင့်ပတ်သက်ပြီး လူထုရှင်းလင်းပွဲများပြုလုပ်ရန် စီစဉ်ခဲ့သော်လည်း ရှင်းလင်းပွဲသို့တက်ရောက်မည့် လူထုအင်အားများနေသောကြောင့် ပြန်လည်လျှော့ချရန် တပ်မတော်က ပြောဆိုလာသဖြင့် ရှင်းလင်းပွဲများအား ကျင်းပရန် နှောင့်နှေးခဲ့ပြီး ယခုမှသာ စတင်ကျင်းပနိုင်ခြင်း ဖြစ်သည်။
“မွန်ပြည်သစ်ပါတီအနေနဲ့ NCA လက်မှတ်ရေးထိုးခြင်းကိစ္စနဲ့ ပတ်သက်ပြီးတော့ နေရာငါးခုမှာ ပြည်သူလူထုကို ချပြရှင်းလင်း ဆွေးနွေးပွဲတွေလုပ်ဆောင်ဖို့ စီစဉ်ဆောင်ရွက်ခဲ့ပါတယ်။ ဒါပေမဲ့ ကန့်သတ်ချက်တွေရှိတဲ့အတွက် လူထုတွေ့ဆုံပွဲတွေကို ရပ်ဆိုင်းခဲ့ရပြီးတော့ ဖြစ်စဉ်တွေကို အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးဗဟိုဌာနကို တင်ပြခဲ့ပါတယ်။ မွန်ပြည်နယ်အတွင်းမှာ လူထုတွေ့ဆုံပွဲလုပ်မယ့် ညီစားစခန်းနဲ့ ဝယ်ဇင်စခန်းတို့မှာ အင်အား ၂၀၀၊ ကရင်ပြည်နယ်အတွင်းမှာ လူထုတွေ့ဆုံပွဲလုပ်မယ့် တောင်ပေါက်၊ အင်းခွနဲ့ ဂျပန်ရေတွင်းကျေးရွာတွေမှာ အင်အား ၅၀ လောက်နဲ့ လုပ်ဆောင်နိုင်တယ်ဆိုပြီး အကြောင်းပြန်လာတယ်” ဟု မွန်ပြည်သစ် ဗဟိုကော်မတီဝင် နိုင်ဝင်းလှက ပြောကြားသည်။
ထိုသို့ လူထုရှင်းလင်းပွဲ စတင်ပြုလုပ်ရန်အတွက် မော်လမြိုင်မြို့ ဇေယျာမြိုင်ရပ်ကွက်ရှိ နိုင်ရွှေကျင်စာကြည့်တိုက်၌ ဧပြီ ၆ ရက် နံနက်ပိုင်းက မွန်ပြည်သစ်ပါတီ၊ မွန်နိုင်ငံရေးပါတီနှင့် မွန်အရပ်ဘက် လူမှုအဖွဲ့အစည်းများ တွေ့ဆုံပွဲပြုလုပ်ခဲ့ပြီး လူထုတွေ့ဆုံပွဲ လုပ်ငန်းကော်မတီအား မွန်ပြည်သစ်ပါတီမှ နိုင်ဗညား လယ်အပါအဝင်သုံးဦး၊ မွန်အမျိုးသားပါတီမှ နိုင်စံလှိုင်အပါအဝင်သုံးဦး၊ မွန်ဒေသလုံးဆိုင်ရာ ဒီမိုကရေစီပါတီမှ နိုင်စံတင် အပါအဝင် သုံးဦး၊ အရပ်ဘက်လူမှုအဖွဲ့အစည်းမှ ဦးမင်းအောင်ထူး အပါအဝင် သုံးဦးနှင့် ပြင်ပပညာရှင် နိုင်ဝင်းကြည်အပါအဝင် သုံးဦး၊ စုစုပေါင်း ၁၅ ဦးဖြင့် ဖွဲ့စည်းခဲ့သည်။
မွန်ပြည်သစ်ပါတီသည် ၂၀၁၈ ခုနှစ် ဖေဖော်ဝါရီ ၁၃ ရက်က တစ်နိုင်ငံလုံး အပစ်အခတ်တိုက်ခိုက်မှု ရပ်စဲရေးသဘောတူစာချုပ် (NCA) စာချုပ်တွင် လားဟူဒီမိုကရက် တစ်အစည်းအရုံး (LDU) နှင့်အတူ လက်မှတ်ရေးထိုးခဲ့ခြင်း ဖြစ်သည်။
မွန်ပြည်သစ်ပါတီအနေဖြင့် လူထုတွေ့ ဆုံရှင်းလင်းပွဲများကို ညီစားစခန်းအပြင် ၎င်းတို့ တပ်တည်ရာနေရာများဖြစ်သည့် ကရင်ပြည်နယ်၌ ကော့ဘိန်းကျေးရွာအနီး၊ ကြာအင်းဆိပ်ကြီးမြို့နယ် တောင်ပေါက်ကျေးရွာအနီးနှင့် ဘုရားသုံးဆူမြို့ ဂျပန်ရေတွင်းကျေးရွာများ၌လည်းကောင်း၊ မွန်ပြည်သစ်ပါတီ ထားဝယ်ခရိုင်ဌာနချုပ်ဖြစ်သည့် ဝယ်ဇင်စခန်းတို့၌လည်းကောင်း ပြုလုပ်ရန်လျာထားသည်။
ထို့ပြင် မွန်ပြည်သစ်ပါတီအနေဖြင့် NCA စာချုပ်အရ ၎င်းတို့ ဦးဆောင်ကျင်းပရမည့် မွန်လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲကို မူလက မတ်လကုန်ပိုင်းတွင် စီစဉ်ခဲ့သော်လည်း NCA နှင့်ပတ်သက်သည့် လူထုတွေ့ဆုံရှင်းလင်းပွဲများ မစတင်နိုင်သေးသောကြောင့် ရွှေ့ဆိုင်းလာခဲ့ရာ လက်ရှိတွင် မေလဆန်း၌ ကျင်းပရန်လျာထားကြောင်း သိရသည်။
NCA စာချုပ်တွင် ပါဝင်လက်မှတ်ရေးထိုးထားသည့် အဖွဲ့များအနက် ယခင်လက်မှတ်ရေးထိုးခဲ့သည့် တိုင်းရင်းသားလက်နက် ကိုင်ရှစ်ဖွဲ့တွင် ရှမ်းပြည်ပြန်လည်ထူထောင်ရေးကောင်စီ (RCSS/SSA) မှာ ရှမ်းလူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ ကျင်းပခွင့်ရရှိထားသော်လည်း အဆိုပါပွဲ အကြိုလူထုတွေ့ဆုံပွဲများ ပြုလုပ်ရာတွင် တပ်မတော်နှင့် အုပ်ချုပ်ရေးဘက်က တားမြစ်မှုများ ပြုလုပ်ခဲ့သဖြင့် ပြုလုပ်ဆဲအကြို တွေ့ဆုံပွဲများလည်း ရပ်ဆိုင်းခဲ့သည့်အပြင် အမျိုးသားအဆင့် နိုင်ငံရေးဆွေးနွေးပွဲ ကျင်းပရန်ကိုလည်း ရွှေ့ဆိုင်းထားကာ တစ်ဆို့မှုများဖြစ်ပေါ်နေပြီး အဆိုပါအခြေအနေအား ပြေလည်စေရန် အစိုးရဘက်မှ RCSS သို့ နည်းလမ်းနှစ်ခု ကမ်းလှမ်းထားသော်လည်း ပြေလည်မှု မရရှိသေးပေ။
ထို့အတူ NCA ရေးထိုးထားသည့် ရခိုင်ပြည်လွတ်မြောက်ရေးပါတီ (ALP) သည် လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲအား ကျင်းပခွင့်မရရှိသေးဘဲ အစိုးရဘက်ကမူ ရခိုင်ပြည်နယ်၏ လက်ရှိနိုင်ငံရေး အခြေအနေများကြောင့် ခွင့်မပြုခြင်းဖြစ်ကြောင်း ပြောဆိုထားသည်။
