ဂျီဒီပီ တိုးတက်အောင်ဆောင်ရွက်ရာတွင် သဘာဝသယံဇာတမှထုတ်ယူကာ ထုတ်ကုန်တိုးမြှင့်ထုတ်လုပ်ခြင်းက နိုင်ငံအတွက်အန္တရာယ်ရှိဟုဆို

ဂျီဒီပီ တိုးတက်အောင်ဆောင်ရွက်ရာတွင် သဘာဝသယံဇာတမှထုတ်ယူကာ ထုတ်ကုန်တိုးမြှင့်ထုတ်လုပ်ခြင်းက နိုင်ငံအတွက်အန္တရာယ်ရှိဟုဆို
Published 9 April 2018

နိုင်ငံ့စီးပွားရေး ဂျီဒီပီ တိုးတက်အောင် ဆောင်ရွက်ရာတွင် သဘာဝသယံဇာတမှထုတ်ယူကာ ထုတ်ကုန်တိုးမြှင့် ထုတ်လုပ်ခြင်းက နိုင်ငံ့အတွက်အန္တရာယ်ရှိကြောင်း ဧပြီ ၈ ရက်က ကုန်သည်စက်မှုအသင်းချုပ်တွင် ပြုလုပ်သည့် ‘မျက်မှောက် မြန်မာ့စီးပွားရေး အလားအလာသုံးသပ်ခြင်း’ အခမ်းအနားမှ သိရသည်။

“သဘာဝသယံဇာတပစ္စည်းတွေကို ထုတ်ပြီးတော့ စီးပွားရေးတိုးတက်အောင် လုပ်တာကတော့ အန္တရာယ်ရှိပါတယ်” ဟု အဆိုပါအခမ်းအနားတွင် ပါဝင်ဆွေးနွေးသူ ရန်ကုန်စီးပွားရေးတက္ကသိုလ်၊ ဘောဂဗေဒဌာနမှ ပါမောက္ခဌာနမှူး ဒေါက်တာသီတာကြူက ပြောကြားသည်။

လာမည့် ၂၀၃၀ ပြည့်နှစ်တွင် မြန်မာနိုင်ငံ၏ ဂျီဒီပီရှစ်ရာခိုင်နှုန်းအထိ တိုးတက်လာအောင်မည်ကဲ့သို့ ဆောင်ရွက်သင့်လဲဆိုသည့် ဆွေးနွေးမှုအပေါ် ဒေါက်တာသီတာကြူက ပြန်လည်သုံးသပ်ပြောကြားခဲ့ခြင်း ဖြစ်သည်။

ဂျီဒီပီတိုးတက်မှု အခြေခံသဘောတရား လေးမျိုးရှိကြောင်း၊ ယင်းလေးမျိုးမှာ အရင်းအနှီးဖြစ်သည့် ရင်းနှီးမြှုပ်နှံမှု၊ လူ့စွမ်းအားအရင်းအမြစ်၊ နည်းပညာတိုးတက်မှုနှင့် သဘာဝသယံဇာတမှ ထုတ်ယူသုံးစွဲခြင်းများကြောင့် ဂျီဒီပီတိုးတက်လာနိုင်ကြောင်း ထည့်သွင်းဆွေးနွေးခဲ့သည်။

အဆိုပါအခြေခံအချက်လေးချက်အနက် ပြည်တွင်းကုန်ထုတ်လုပ်မှုများ မြင့်တက်စေမည့် ပြည်တွင်းပြည်ပ ရင်းနှီးမြှုပ်နှံမှုများ ဝင်ရောက်လာနိုင်အောင် ဆွဲဆောင်သင့်ကြောင်း ဒေါက်တာသီတာကြူက ပြောကြားသည်။

“ကိုယ့်နိုင်ငံက စီးပွားရေးကို ရှစ်ရာခိုင်နှုန်းလောက် တိုးတက်အောင်လုပ်မယ်ဆိုရင်တော့ အကောင်းဆုံးနည်းလမ်းကတော့ ထုတ်ကုန်တွေမြှင့်ဖို့ ရင်းနှီးမြှုပ်နှံမှုတွေ တိုးလာအောင် နိုင်ငံခြားရင်းနှီးမြှုပ်နှံမှုသာမက ပြည်တွင်းကသူတွေရဲ့ ရင်းနှီးမြှုပ်နှံမှုကိုပါ စွမ်းဆောင်နိုင်မယ့် ပတ်ဝန်းကျင်တွေ လုပ်ဆောင်ပေးဖို့လိုပါတယ်” ဟု ၎င်းက ပြောကြားသည်။

၂၀၁၇-၂၀၁၈ ဘဏ္ဍာနှစ်အကုန်အထိ မြန်မာနိုင်ငံအတွင်းသို့ နိုင်ငံခြားရင်းနှီးမြှုပ်နှံမှု စုစုပေါင်း အမေရိကန်ဒေါ်လာ ၆ ဒသမ ၁၁၅ ဘီလျံကျော် ဝင်ရောက်ထားကြောင်း မတ်လ ၂၂ ရက်က ရန်ကုန်မြို့ရှိ မြန်မာနိုင်ငံ ရင်းနှီးမြှုပ်နှံမှုကော်မရှင်တွင် ပြုလုပ်သည့် သတင်းစာရှင်းလင်းပွဲမှ သိရသည်။

၂၀၁၇-၂၀၁၈ ဘဏ္ဍာနှစ် မတ်လအကုန်အထိ နိုင်ငံခြားရင်းနှီးမြှုပ်နှံမှု လုပ်ငန်းပေါင်း ၂၂၂ ခုကို ခွင့်ပြုပေးခဲ့ပြီး ရင်းနှီးမြှုပ်နှံမှု စုစုပေါင်းပမာဏ ဒေါ်လာ ၄ ဒသမ ၇၇၆ ဘီလျံကျော်နှင့် ရင်းနှီးမြှုပ်နှံမှုတိုးမြှင့်ခြင်း အပါအဝင် စုစုပေါင်းပမာဏ ဒေါ်လာ ၅ ဒသမ ၇၁၇ ဘီလျံကျော်အထိ ရှိခဲ့ကြောင်း သိရသည်။

ထို့အပြင် အထူးစီးပွားရေးဇုန်ဥပဒေအရ သီလဝါအထူးစီးပွားရေးဇုန်တွင် ရင်းနှီးမြှုပ်နှံမှုပမာဏ ဒေါ်လာသန်း ၄၀၀ ခန့်ခွင့်ပြုပေးခဲ့သည့်အတွက် ယခုဘဏ္ဍာနှစ်တွင် မြန်မာနိုင်ငံအတွင်းသို့ နိုင်ငံခြားရင်းနှီးမြှုပ်နှံမှု စုစုပေါင်းဒေါ်လာ ၆ ဒသမ ၁၁၅ ဘီလျံကျော်အထိ ခွင့်ပြုပေးထားပြီးဖြစ်သည်။

မြန်မာနိုင်ငံရင်းနှီးမြှုပ်နှံမှုကော်မရှင်အနေဖြင့် ရင်းနှီးမြှုပ်နှံမှုလုပ်ငန်းများကို ခွင့်ပြုပေးရာတွင် လုပ်ငန်း၏စီးပွားရေးတွက်ခြေကိုက်မှု၊ အလုပ်အကိုင်သစ်များ ဖန်တီးပေးနိုင်မှု၊ အမျိုးသားဝင်ငွေနှင့် အခွန်တိုးတက်ရရှိနိုင်မှု၊ ပြည်တွင်းပြည်ပ ဈေးကွက်အခြေအနေ၊ ပြည်တွင်းစားသုံးရန်လိုအပ်ချက်၊ နည်းပညာဆီလျော်မှု၊ တီထွင်ဆန်းသစ်မှု၊ နည်းပညာလွှဲပြောင်းရရှိမှု၊ ပတ်ဝန်းကျင်ထိခိုက်မှုနှင့် လူမှုရေးထိခိုက်မှု ထိန်းသိမ်းကာကွယ်ရေး ဆောင်ရွက်မှုအစီအမံများ၊ တာဝန်ယူမှုရှိသော ရင်းနှီးမြှုပ်နှံမှုဖြစ်ခြင်းနှင့် တည်ဆဲဥပဒေများကို လိုက်နာခြင်းစသည့် အချက်များကိုအခြေခံ၍ စိစစ်ခြင်းဖြစ်ကြောင်း သိရသည်။

၂၀၃၀ ပြည့်နှစ်အထိ မြန်မာနိုင်ငံတွင်းသို့ နိုင်ငံခြားတိုက်ရိုက်ရင်းနှီးမြှုပ်နှံမှု တန်ဖိုး ဒေါ်လာသန်းထောင်ပေါင်း ၁၄၀ အထိရရှိရန် ရည်မှန်းထားကြောင်း စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပြောကြားသည်။

“နိုင်ငံခြားရင်းနှီးမြှုပ်နှံမှုများ တိုးမြင့်လာဖို့အတွက် ရည်ရွယ်ပြီး ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနအနေနဲ့ ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) ရဲ့အကူအညီနဲ့ ကာလရှည်နိုင်ငံခြား တိုက်ရိုက်ရင်းနှီးမြှုပ်နှံမှု တိုးမြှင့်ရေးဆိုင်ရာစီမံကိန်း ရေးဆွဲရာမှာ ၂၀၁၄ ခုနှစ်ကနေ ၂၀၃၀ ပြည့်နှစ်အထိ နိုင်ငံခြားရင်းနှီးမြှုပ်နှံမှုတန်ဖိုး ဒေါ်လာသန်းထောင်ပေါင်း ၁၄၀ ရရှိရန် ရည်မှန်းထားတယ်ဆိုတာ သုံးသပ်တွေ့ရှိရပါတယ်” ဟု စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပြောကြားသည်။

Most Read

Most Recent