မြန်မာနိုင်ငံတွင် ပထမဆုံးအဖြစ် အမှိုက်မှ အသွင်ပြောင်းလောင်စာတောင့် ထုတ်လုပ်နိုင်ရန် တောင်ကြီး စည်ပင်သာယာရေးကော်မတီမှ စီစဉ်နေဟုသိရ

မြန်မာနိုင်ငံတွင် ပထမဆုံးအဖြစ် အမှိုက်မှ အသွင်ပြောင်းလောင်စာတောင့် ထုတ်လုပ်နိုင်ရန် တောင်ကြီး စည်ပင်သာယာရေးကော်မတီမှ စီစဉ်နေဟုသိရ
Published 8 April 2018

မြန်မာနိုင်ငံတွင် ပထမဆုံးအဖြစ် အမှိုက်များမှ အသွင်ပြောင်းလောင်စာတောင့် (RTF) ထုတ်လုပ်နိုင်ရန် တောင်ကြီးစည်ပင်သာယာရေးကော်မတီမှ စီစဉ်နေသည်ဟု စည်ပင်သာယာရေးဌာန အမှုဆောင်အရာရှိ ဦးအေးကိုက ပြောကြားသည်။

(RTF) နည်းပညာဖြင့် အမှိုက်မှ အသွင်ပြောင်းလောင်စာတောင့် ထုတ်လုပ်ခြင်းသည် အာဖရိကနိုင်ငံ၌ တွင်ကျယ်နေသော လုပ်ငန်းတစ်ခုဖြစ်ပြီး အဆိုပါလုပ်ငန်းကို Youtube တွင် စတင်တွေ့ရှိရာမှ ထိုင်းနိုင်ငံအခြေစိုက် (အင်္ဂလန်နိုင်ငံ) မှ အဆိုပါကုမ္ပဏီကို ကမ်းလှမ်းခဲ့ရာ ယခုအခါ ပြည်ထောင်စုအစိုးရနှင့် ကနဦး MoU စာချုပ် လက်မှတ်ရေးထိုးထားပြီး လုပ်ငန်းစတင်လုပ်ကိုင်နိုင်ရန် MOA လက်မှတ်ထိုးရန်အဆင့်သာ ကျန်တော့ကြောင်း၊ တောင်ကြီးမြို့တွင် Pionner အဖြစ် စတင်လုပ်ကိုင်နိုင်ရန် စီစဉ်နေခြင်းဖြစ်ကြောင်း တောင်ကြီးမြို့နယ် စည်ပင်သာယာရေးဌာနမှ အမှုဆောင်အရာရှိ ဦးအေးကိုက ပြောကြားသည်။

အဆိုပါအမှိုက်မှ အသွင်ပြောင်းလောင်စာတောင့် ထုတ်လုပ်ခြင်းလုပ်ငန်းနှင့်ပတ်သက်၍ အကြံပြုချက်အစီရင်ခံစာကို ရေးသားနေပြီး ပြည်ထောင်စုကို တင်ပြပြီးခွင့်ပြုချက်ရရှိလျှင် လုပ်ငန်းစတင်နိုင်တော့မည်ဖြစ်ကြောင်း၊ တောင်ကြီး၌ အမှိုက်မှ အသွင်ပြောင်းလောင်စာတောင့် လုပ်ငန်းအောင်မြင်ခဲ့လျှင် မန္တလေးတိုင်းဒေသကြီးနှင့် ရန်ကုန်တိုင်းဒေသကြီးတို့တွင် ဆက်လက်အကောင်အထည်ဖော် ဆောင်ရွက်မည်ဖြစ်ကြောင်း ဦးအေးကိုက ပြောကြားသည်။

တောင်ကြီးမြို့တွင် ‘မွှေး’ အမှိုက်သိမ်းဆည်းရေးကုမ္ပဏီမှ မြို့တွင်းအမှိုက်သိမ်းဆည်းခြင်းလုပ်ငန်းကို ဆောင်ရွက်နေပြီး တောင်ကြီးမြို့ ကံကြီးရပ်ကွက်ရှိ အမှိုက်ကျင်းတွင် သွားရောက်စွန့်ပစ်နေခြင်းဖြစ်ကာ တောင်ကြီးမြို့ပေါ်တွင် တစ်နေ့လျှင် အမှိုက်တန်ချိန်ပေါင်း တန် ၁၀၀ မှ ၁၅၀ အထိ ထွက်ရှိကြောင်း၊ ရေမြောင်းနှင့် လမ်းကြိုလမ်းကြား၊ ဈေးများတွင် စည်ပင်မှ အမှိုက်သိမ်းဆည်းခြင်းလုပ်ငန်းကို ဆောင်ရွက်နေကြောင်း သိရသည်။

အမှိုက်ကို မီးရှို့ဖျက်ဆီးခြင်းနှင့် အမှိုက်မှ ဇီဝဓာတ်အား ထုတ်လုပ်ခြင်းလုပ်ငန်းများသည် ကုန်ကျစရိတ်များစွာရှိပြီး အဆိုပါဓာတ်အားများကို အသုံးချနိုင်ရန်လည်း ခက်ခဲကြောင်း၊ ယခု RTF နည်းပညာဖြင့် လောင်စာတောင့် ထုတ်လုပ်ခြင်းနည်းပညာသည် အမှိုက်မရှိတော့လျှင်လည်း ရပ်ထား၍ရပြီး ထွက်ရှိလာသော လောင်စာတောင့်များကို သံရည်ကျိုစက်နှင့် ဘိလပ်မြေစက်ရုံကဲ့သို့သော အကြီးစားစက်ရုံများကိုလည်း တင်ပို့ရောင်းချနိုင်သည့်အပြင် သိုလှောင်သိမ်းဆည်း၍လည်း အဆင်ပြေသဖြင့် ခေတ်စနစ်နှင့်ကိုက်ညီသော နည်းစနစ်တစ်ခုဖြစ်ကြောင်း သိရသည်။

“အမှိုက်ပုံကနေ လောင်စာတောင့်ထုတ်လုပ်ဖို့ နိုင်ငံခြားကုမ္ပဏီတစ်ခုနဲ့ ကန်ထရိုက်စာချုပ်ချုပ်ဆိုဖို့ရှိတယ်။ စာချုပ်ချုပ်ပြီးရင် အမှိုက်ပုံကနေ စွမ်းအင်လောင်စာတောင့်တွေ ထုတ်လုပ်မယ်။ အမှိုက်ပုံလည်း သန့်ရှင်းမယ်။ စည်ပင်သာယာလည်း ဝင်ငွေရမယ်။ အမှိုက်နဲ့ပတ်သက်ပြီးတော့ ပညာပေးလုပ်ငန်းတွေ၊ ပြည်သူ့သဘောထားအမြင်တွေလည်း ဆောင်ရွက်တယ်။ တိုးချဲ့ပြီးတော့ ပြည်သူကို ပညာပေးသွားဖို့လည်းရှိတယ်။ အမှိုက်စွန့်ပစ်မှုစနစ်မှာတော့ အမှိုက်ကျင်းနေရာမှာ မြေပြင်မှာ အမှိုက်ပစ်တဲ့စနစ်ပဲ ကျင့်သုံးနေတယ်” ဟု တောင်ကြီးမြို့နယ် စည်ပင်သာယာရေးဌာနမှ အမှုဆောင်အရာရှိ ဦးအေးကိုက ပြောကြားသည်။

Most Read

Most Recent