တရုတ်တစ်ရှူး ငှက်ပျောခင်းများကို တစ်နှစ်လျှင် တစ်ဧက ကျပ်တစ်သောင်းမှ ကျပ်နှစ်သောင်းအထိကောက်ခံရန် ကချင်ပြည်နယ်လွှတ်တော်က အတည်ပြုခဲ့ကြောင်း သိရသည်။

ကချင်ပြည်နယ်အစိုးရအဖွဲ့က တင်သွင်းသည့် ကချင်ပြည်နယ်မြေယာခွန်ဥပဒေကြမ်းကို  ဧပြီ ၄ ရက်တွင်ကျင်းပသည့် ဒုတိယအကြိမ် ကချင်ပြည်နယ်လွှတ်တော် ၁၁ ကြိမ်မြောက် ပုံမှန်အစည်းအဝေးဆဋ္ဌမနေ့တွင် အတည်ပြုရန် ဆွေးနွေးခဲ့ကြသော်လည်း ကျပ်တစ်သောင်းမှ ကျပ်နှစ်သောင်းအတွင်း ကောက်ခံရေးကို အငြင်းပွားပြီး ဧပြီ ၅ ရက် လွှတ်တော်အစည်းအဝေးတွင် လျှို့ဝှက်ဆန္ဒမဲပေး၍ ဆုံးဖြတ်ခဲ့ခြင်းဖြစ်သည်။

ယင်းဥပဒေကြမ်းနှင့်ပတ်သက်၍ ကချင်ပြည်နယ်အစိုးရအဖွဲ့က ယင်းအခွန်နှင့် ပတ်သက်ပြီး ငြင်းပယ်လိုခြင်း မရှိသော်လည်း အခွန်နှုန်းထားများနှင့်ပတ်သက်၍ ပြည်ထောင်စုအစိုးရက အမြင့်ဆုံး ကျပ်သုံးထောင်အထိသာ သတ်မှတ်ထားသဖြင့် အစိုးရအဖွဲ့က နည်းဥပဒေ ရေးဆွဲရာတွင်အစိုးရ၏ သတ်မှတ်ချက်နှင့် သတ်မှတ်နှုန်းထားအတိုင်း တွက်ယူမည်ဆိုပါက ယခုထက်ပိုမိုသော ပမာဏများလည်း ထွက်ပေါ်လာနိုင်ကြောင်း တင်ပြခဲ့သည်။

အစိုးရ၏ တင်ပြချက်အပေါ် ကချင်ပြည်နယ်လွှတ်တော် ဥပဒေကြမ်းကော်မတီက ဥပဒေတပ်ရပ်ကို လွှတ်တော်ကသာ အတည်ပြုခွင့်ရှိပြီး လွှတ်တော်က အတည်ပြုပြီးပါကလည်း လွှတ်တော်တွင် အချိန်အခါမရွေး ပြင်ဆင်နိုင်ပါကြောင်း၊ လွှတ်တော်၏ အဆုံးအဖြတ်ကိုသာယူလိုကြောင်း လွှတ်တော်တွင် တင်ပြခဲ့သဖြင့် လွှတ်တော်တွင် လျှို့ဝှက်မဲပေးစနစ်ဖြင့် မဲခွဲဆုံးဖြတ်ခဲ့ခြင်းဖြစ်သည်။

လွှတ်တော်တွင် မဲခွဲဆုံးဖြတ်ရာတွင် တက်ရောက်လာသည့် လွှတ်တော်ကိုယ်စားလှယ် ၄၃ ဦးစလုံး မဲပေးခဲ့ပြီး ထောက်ခံမဲ ၃၃ မဲ၊ ကန့်ကွက်မဲ ခုနစ်မဲ၊ ကြားနေ နှစ်မဲ၊ ပယ်မဲ တစ်မဲဖြင့် လွှတ်တော်တွင် အတည်ပြုခဲ့ခြင်း ဖြစ်သည်။

အတည်ပြုခဲ့သည့်ဥပဒေကြမ်းကို မကြာမီတွင် ကချင်ပြည်နယ်လွှတ်တော်ဥက္ကဋ္ဌက လက်မှတ်ရေးထိုးပြီး ကချင်ပြည်နယ်အစိုးရအဖွဲ့သို့ ပေးပို့ရမည်ဖြစ်ကာ ကချင်ပြည်နယ် ဝန်ကြီးချုပ်က ခုနစ်ရက်အတွင်း လက်မှတ်ထိုးသည်ဖြစ်စေ၊ မထိုးသည်ဖြစ်စေ အတည်ဖြစ်ကြောင်း သိရသည်။

တရုတ်နိုင်ငံမှ ရင်းနှီးမြှုပ်နှံသူများသည် ကချင်ပြည်နယ် ဧရာဝတီမြစ်အရှေ့ဘက်ကမ်းတွင် ဧကပေါင်းသောင်းနှင့်ချီ ဆက်လက်တိုးချဲ့စိုက်ပျိုးမှုများရှိနေပြီး ကချင်ပြည်နယ်အစိုးရအဖွဲ့က ခွင့်ပြုချက် တစ်စုံတစ်ရာ ပေးထားခြင်း မရှိသေးချေ။ တိုးချဲ့စိုက်ပျိုးမှုများကြောင့် အောက်ခြေတွင် မြေယာအငြင်းပွားမှုများ ဖြစ်ပွားနေဆဲဖြစ်ပြီး ကချင်ပြည်နယ် လွှတ်တော် ကိုယ်စားလှယ်များနှင့် တိုင်းရင်းသား ခေါင်းဆောင်များက ရှေရှည်တွင် ဆိုးကျိုးများ ဖြေရှင်းရမည်ကို စိုးရိမ်စရာဖြစ်နေကြောင်း ထောက်ပြဝေဖန်ခဲ့ကြသည်။ ကချင်ပြည်နယ် အစိုးရအဖွဲ့ရုံးဝင်းအတွင်း ဖွင့်လှစ်ထားသည့် ရင်းနှီးမြှုပ်နှံမှုကော်မရှင်ရုံး (ခွဲ)တွင် မတ် ၈ ရက်စာရင်းအရ ကုမ္ပဏီပေါင်း ၉၄ ခုအထိ မှတ်ပုံတင်ထားသော်လည်း ကုန်သွယ်ရေး၊ ကျောက်မျက်ကုမ္ပဏီများသာဖြစ်ပြီး စိုက်ပျိုးရေး ကုမ္ပဏီများ မပါဝင်ကြောင်း သိရသည်။

ကချင်ပြည်နယ်အစိုးရအဖွဲ့က ငှက်ပျော စိုက်ပျိုးမှုများ တိုးချဲ့မစိုက်ပျိုးရန် ညွှန်ကြား ထားသော်လည်း မြစ်ကြီးနားမြို့နယ်၊ တာလောကြီးဒေသတွင် ဆက်လက်တိုးချဲ့စိုက်ပျိုးမှုများ ရှိနေဆဲဖြစ်ကြောင်း သိရသည်။

တာလောကြီးကျေးရွာအုပ်ချုပ်ရေးမှူး ဦးဆန်းထူးက “ခရိုင်ကတော့ ငှက်ပျောကုမ္ပဏီ တွေကို ထပ်မံမတိုးချဲ့ဖို့ လက်မှတ်ထိုးခိုင်းတယ်။ တချို့ကုမ္ပဏီတွေက လက်မှတ်မထိုးကြဘူး။ တာလောကြီးရွာဝန်းကျင်တော့ ကုမ္ပဏီ လေးခုဝင်နေတယ်။ အားလုံးက လုပ်ငန်းအကောင်အထည်ဖော်နေကြတယ်။ တောင်သူတွေလည်း တောကြမ်းဆိုရင် တစ်သိန်း၊ မြေယဉ်ဆိုရင် နှစ်သိန်း ငှားနေကြတာပါ။ ကျွန်တော်တို့လည်း ဒီအတိုင်းကြည့်နေရတယ်။ဘာမှပြောလို့ မရဘူး။ ကုမ္ပဏီနဲ့ တောင်သူ နှစ်ဦးသဘောတူဖြစ်နေတာ။ ဘယ်သူမှလည်း ကွင်းဆင်းတာ မရှိဘူး။ ကျွန်တော်လည်း ဒီဟာတွေ မရှင်းတတ်ဘူး”ဟု ပြောကြားသည်။

မြစ်ကြီးနားနှင့် ဝိုင်းမော်မြို့နယ်မှ ဒေသခံများ တရုတ်တစ်ရှူးငှက်ပျောခင်း အလိုမရှိကြောင်း မြစ်ကြီးနားမြို့တွင် ဖေဖော်ဝါရီ ၃ ရက် ဆန္ဒထုတ်ဖော်ခဲ့ကြသည်။

တရုတ် တစ်ရှူးငှက်ပျောစိုက်ပျိုးမှုသည် မြန်မာနိုင်ငံဘက်မှ တောင်သူများ ကြီးမားသော နစ်နာမှုများရှိနေကြောင်း ကချင်ပြည်နယ် လွှတ်တော်ကိုယ်စားလှယ်များက ပြစ်တင်ဝေဖန်ခဲ့သည်။

ကချင်ပြည်နယ်အစိုးရအဖွဲ့က ၂၀၁၇ ခုနှစ် မေလကကောက်ယူထားသော စာရင်းများအရ ကချင်ပြည်နယ်တွင် တရုတ်တစ်ရှူး ငှက်ပျောစိုက်ဧက လေးသောင်းကျော်ရှိပြီး ကချင်ပြည်နယ် စိုက်ပျိုး၊မွေးမြူရေးနှင့် ဆည်မြောင်းဝန်ကြီးဌာန၏ စာရင်းများအရ ခွင့်ပြုချက်ရပြီးသော မြေလွတ်မြေရိုင်းတွင် ဧက ၄၉၆၀၊ ခွင့်ပြုချက်မရသေးသော မြေလွတ်မြေ ရိုင်းတွင် ၆၁၆၇ ဧက၊ ပုံစံ (၇) ရပြီး မြေတွင် ၃၁၆၇ ဧက၊ ပုံစံ (၇) မရရှိသေးသည့် မြေတွင် ၉၃၄၈ ဧက၊ သစ်တောမြေတွင် ၄၂၀၅ ဧက ရှိနေကြောင်း သိရသည်။

ကချင်ပြည်နယ် ဝိုင်းမော်မြို့နယ်၊ မြစ်ကြီးနားမြို့နယ်၊ မိုးမောက်မြို့နယ်၊ မန်စီမြို့ နယ်၊ ရွှေကူမြို့နယ်နှင့် မြစ်ကြီးနား-ဗန်းမော် ကားလမ်းနံဘေးရှိ စစ်ရှောင်ကျေးရွာဝန်းကျင်များတွင် ငှက်ပျောစိုက်ခင်းများ တိုးချဲ့နေမှုများ ရှိနေသော်လည်း နောက်ဆုံးစာရင်းများ ကိုကောက်ယူရန် ခက်ခဲနေကြောင်း ကချင် ပြည်နယ်အစိုးရအဖွဲ့က ဆိုသည်။

ကချင်ပြည်နယ် ဧရာဝတီမြစ်ရိုးကျေးရွာများတွင် ယင်းတစ်ရှူး ငှက်ပျောစိုက်ခင်းများအတွက် မြေဧကထောင်ချီ ဝယ်ယူမှုများဖြစ်နေပြီး ကျေးရွာစားကျက်မြေများ၊ သစ်တောမြေများ၊ မြေလွတ်မြေရိုင်းများ ရောင်းချမှုဖြစ်နေသဖြင့် စိုက်ပျိုးရေးလုပ်ငန်းဖြင့် အသက်မွေးသော ကျေးရွာများ၏ ရေရှည်အတွက် စိုးရိမ် မှုများဖြစ်နေကြောင်း သိရသည်။