ကချင်ပြည်နယ် မြေယာခွန် ဥပဒေကြမ်း ကချင်ပြည်နယ် လွှတ်တော်တွင် အတည်ပြုရေး တရုတ်တစ်ရှူး ငှက်ပျောစိုက်ခင်း အခွန်ကိစ္စ အငြင်းပွားမှုကြောင့် ရက်ရွှေ့ဆိုင်းခဲ့သည်။
ယင်းဥပဒေကြမ်းကို ကချင်ပြည်နယ် အစိုးရအဖွဲ့က တင်သွင်းခဲ့ပြီး ဧပြီ ၄ ရက်တွင် ကျင်းပသည့် ကချင်ပြည်နယ် လွှတ်တော် အစည်းအဝေးတွင် အတည်ပြုရန် ဆွေးနွေးခဲ့ကြခြင်း ဖြစ်သည်။
ကချင်ပြည်နယ် မြေယာခွန် ဥပဒေကြမ်းတွင် ယခင်က ရရှိခဲ့သည့် အခွန်နှုန်းထားများ ဖြစ်သည့် ကျပ်၊ ပြား အဆင့်များကို အဆ ၂၀၀ မှ အဆ ၃၀၀ အထိ တိုးမြင့် ကောက်ခံခဲ့ခြင်းဖြစ်ပြီး တစ်ရှူးငှက်ပျော စိုက်ခင်းများကို တစ်ဧက ကျပ် ၁၀၀၀၀ မှ ကျပ် ၂၀၀၀၀ အထိ တိုးမြှင့် ကောက်ခံရန်အချက်နှင့် ပတ်သက်ပြီး လွှတ်တော်တွင် အချင်းများခဲ့ခြင်း ဖြစ်သည်။ လွှတ်တော် ကိုယ်စားလှယ်များက တစ်ရှူးငှက်ပျော စိုက်ပျိုးမှုမှာ တရားဝင် မဟုတ်ကြောင်း သိရှိထားသော်လည်း ကန်ပိုင်တည် နယ်စပ်ဂိတ်မှ ထွက်သွားသည့် တရုတ်ငှက်ပျောသယ် ယာဉ်များကို တစ်စီးလျှင် ကျပ် ၆၀၀၀၀ နှုန်းဖြင့် စည်ပင်သာယာဌာနက အန္တရာယ်ခွန်အဖြစ် ကောက်ခံနေခြင်း ဖြစ်ကြောင်း၊ အစိုးရဘက်မှ ကွင်းဆင်း လေ့လာမှုနှင့် စည်းကြပ်နိုင်မှု အားနည်းခြင်းများ တွေ့နေရကြောင်း၊ လက်ရှိ အနေအထားအရ ဆက်လက် တိုးချဲ့နေခြင်းနှင့် လာမည့် အန္တရာယ်ကို ကြိုတင် မခန့်မှန်းနိုင်ခြင်းကြောင့် အခွန်နှုန်းထား လျှော့ပေါ့ ကောက်ခံသည်မှာ မဖြစ်သင့်ကြောင်း၊ မည်သည့်နည်းဖြင့် တားဆီးမရပါက အခွန်စည်းကြပ်ခြင်းမှာ အထိရောက်ဆုံး ဖြစ်ကြောင်း၊ ကချင်ပြည်နယ် အစိုးရအဖွဲ့ကလည်း မြေပြင် ကွင်းဆင်း စစ်ဆေးခြင်း၊ စိုက်ပျိုးမြေဧကများကို တိကျစွာ တိုင်းတာခြင်းများ လုပ်ကိုင်သင့်ကြောင်း၊ သတိလက်လွတ် ပစ်ထားပါက နိုင်ငံတော်၏ အချုပ်အခြာအာဏာနှင့် တရားဥပဒေ စိုးမိုးမှုကိုပါ ထိခိုက်နေပါကြောင်း၊ လုပ်ငန်းရှင်ကြီးများ ယခင်အစိုးရ လက်ထက်က အာဏာရှိသူများ၊ အုပ်ချုပ်သူများနှင့် နီးစပ်သူများက မြေလွတ်မြေလပ်များ ဧကပေါင်းများစွာ ရယူပြီး ဥပဒေ နည်းလမ်းမကျဘဲ တရုတ် တစ်ရှူးငှက်ပျော စိုက်ပျိုးနေမှုများမှာလည်း အစိုးရအတွက် ကြီးမားသော နစ်နာမှုများ ရှိနေကြောင်း ထောက်ပြခဲ့ကြသည်။
ကချင်ပြည်နယ် အစိုးရအဖွဲ့မှ စီးပွားရေး၊ စီမံကိန်းနှင့် ဘဏ္ဍာအခွန်ဝန်ကြီး ဦးဝေလင်းက “တစ်ရှူးငှက်ပျောကို ဥပဒေထဲကို အရင်ထည့်သွင်းပြီး အခြားသီးနှံတွေအတိုင်း သတ်မှတ်တဲ့အတိုင်း ကောက်စေချင်တာပဲ။ တစ်ရှူးငှက်ပျော စိုက်လိုတယ်ဆိုရင် ခွင့်ပြုချက် တောင်းပြီး စိုက်ပျိုးခွင့် ရှိပါတယ်။ ပြည်ထောင်စုက သတ်မှတ်ထားတာ ဥယျာဉ်မြေခြံမြေဆိုရင် ကျပ်ငွေ ၂၀၀၀ ကျပ်ကနေ ၃၀၀၀ ကျပ်အထိ ရှိပါတယ်။ ဒါက ပြည်ထောင်စုက သတ်မှတ်တာပါ။ ပြည်နယ်ဥပဒေတွေကိုလည်း ပြည်ထောင်စုက လွှမ်းမိုးနေပါတယ်။ ဒါကြောင့် ဥပဒေနဲ့အညီ လုပ်ပြီး ကျပ်ငွေ ၃၀၀၀ အထိသာ ကောက်ခံနိုင်တာ ဖြစ်ပါတယ်” ဟု ပြောကြားသည်။ ထွန်းလင်းအောင်
