စီမံကိန်းနှင့်ပတ်သက်ပြီး EIA ဆောင်ရွက်ခြင်းမပြုလုပ်မီ မြိတ်မြို့ရှိ ပြည်သူလူထုများနှင့် တွေ့ဆုံခြင်းကို ဧပြီ ၄ ရက်က ပြုလုပ်စဉ်
မြိတ်ဆိပ်ကမ်းမှ အနောက်မြောက်ဘက် ပင်လယ်ပြင်အတွင်း PETRONAS မှ ရေနံတိုးတက်ဖွံ့ဖြိုးထုတ်လုပ်ရေး အတွက်ဟုဆိုကာ ရေနံတွင်းသုံးတွင်း ထပ်မံတူးဖော်သွားမည်ဖြစ်ကြောင်း သိရသည်။
မြန်မာ့ကမ်းလွန်လုပ်ကွက်အမှတ် M 12, M 13, M 14 တို့တွင် ရေနံတွင်းသုံးတွင်းအား ၂၀၁၈ ခုနှစ် အောက်တိုဘာ၊ နိုဝင်ဘာနှင့် ဒီဇင်ဘာလတို့တွင် တူးဖော်သွားရန် ရည်ရွယ်ထားပြီး အဆိုပါစီမံကိန်းနှင့်ပတ်သက်ပြီး EIA ဆောင်ရွက်ခြင်းမပြုလုပ်မီ မြိတ်မြို့ရှိ ပြည်သူလူထုများနှင့် တွေ့ဆုံခြင်းကို ဧပြီ ၄ ရက်က ပြုလုပ်ခဲ့ကြောင်း သိရသည်။ အများပြည်သူတွေ့ဆုံပွဲ ပြုလုပ်သော်လည်း ဌာနဆိုင်ရာတချို့နှင့် NGO တချို့သာတက်ရောက်ခဲ့ပြီး အဓိကသက်ဆိုင်မည့် ငါးလုပ်ငန်းအဖွဲ့အစည်းမှ တာဝန်ရှိသူများ၊ ဒေသခံများနှင့် စောင့်ကြည့်လေ့လာမည့် အရပ်ဘက်အဖွဲ့အစည်းများ တက်ရောက်လာခြင်းမရှိကြောင်း သိရသည်။
“ဒီနေ့ဆောင်ရွက်တဲ့ အခမ်းအနားကတော့ PETRONAS ကုမ္ပဏီကဆောင်ရွက်တဲ့ ရဲတံခွန်စီမံကိန်းမှာ နဂိုရှိပြီးသား ရေနံတွင်းကနေပြီးတော့ ထုတ်လုပ်မှုကိုပိုမိုပြီး မြင့်မားတဲ့တွင်းတွေကို ပြန်လည်ပြီးတူးဖော်ဖို့အတွက် ၂၀၁၅ ခုနှစ် ဒီဇင်ဘာ ၂၉ ရက်က ထွက်ရှိခဲ့တဲ့ ပတ်ဝန်းကျင်ဆန်းစစ်ခြင်းဆိုင်ရာ လုပ်ထုံးလုပ်နည်းအရ EIA လို့ခေါ်တဲ့ ပတ်ဝန်းကျင်ဆန်းစစ်ခြင်းဆိုင်ရာကို လုပ်ဆောင်မှာဖြစ်ပါတယ်။ အခုတင်ပြရတဲ့ အကြောင်းရင်းက EIA ပရိုစီဂျာထဲမှာပါဝင်တဲ့ ပထမဆုံး EIA ဆောင်ရွက်ခြင်းမပြုနိုင်ခင်မှာ ပြည်သူလူထုနဲ့ လာရောက်တွေ့ဆုံခြင်း ဖြစ်ပါတယ်” ဟု ပတ်ဝန်းကျင်ထိခိုက်မှု ဆန်းစစ်ခြင်းလုပ်ဆောင်နေသည့် ERM Myanmar မှ ဒေါ်မြတ်မွန်ဆွေက ပြောကြားသည်။
ရေနံတွင်းများ၏ အနက်မှာ ၃၄၁ ပေ ခန့်ရှိပြီး စတင်သည့်ကာလမှ ခုနစ်လကြာမြင့်မည်ဖြစ်ကြောင်း သိရသည်။ PETRONAS Carigail Myanmar Ltd (PCML) အနေဖြင့် ရေနံနှင့်သဘာဝဓာတ်ငွေ့တူးဖော်ခြင်းကို မြန်မာနိုင်ငံတွင် ဆောင်ရွက်လျက်ရှိရာ တနင်္သာရီတိုင်းဒေသကြီးအတွင်း ရဲတံခွန်သဘာဝဓာတ်ငွေ့စီမံကိန်းကို အကောင်ထည်ဖော် ဆောင်ရွက်နေခြင်းဖြစ်ကြောင်း သိရသည်။
ယခုစီမံကိန်းမှာလည်း ရဲတံခွန်သဘာဝဓာတ်ငွေ့စီမံကိန်း၏ ရေနံတိုးတက်ဖွံ့ဖြိုးထုတ်လုပ်ရေးအတွက် ဆောင်ရွက်မည်ဖြစ်ကာ စီမံကိန်းကို ဖော်ဆောင်မည့်ကုမ္ပဏီမှာ PC Myanmar (Hong Kong) ဖြစ်ကြောင်း သိရသည်။ ပတ်ဝန်းကျင်သုံးခုဖြစ်သည့် သဘာဝပတ်ဝန်းကျင်၊ လူမှုပတ်ဝန်းကျင်၊ ဇီဝပတ်ဝန်းကျင်ထိခိုက်နိုင်မှု၊ လျှော့ချနိုင်မှုများ လေ့လာကာ ပြည်သူများအား ချပြရမည်ဖြစ်ပြီး သက်ဆိုင်ရာဝန်ကြီးဌာနများကို တင်ပြရမည်ဖြစ်ကြောင်း ဒေါ်မြတ်မွန်ဆွေက ဆိုသည်။
“ဒီရီပို့တွေအပေါ်မှာ ကျွန်မတို့ သဘာဝပတ်ဝန်းကျင် စီမံခန့်ခွဲမှုအရ ဆောင်ရွက်ထားခြင်း ရှိ/မရှိကို သက်ဆိုင်ရာဝန်ကြီးဌာန နှစ်ခုကနေ စစ်ဆေးမှာ။ အဲဒီအတိုင်းလိုက်နာ ဆောင်ရွက်ထားခြင်းမရှိဘူးဆိုရင် လုပ်ငန်းရပ်ဆိုင်းတဲ့အထိ အရေးယူဆောင်ရွက်သွားမှာ ဖြစ်ပါတယ်။ ၂၀၁၂ ခုနှစ်ကထွက်ထားတဲ့ ပတ်ဝန်းကျင်ထိန်းသိမ်းရေးဥပဒေထဲမှာ အတိအကျဖော်ပြထားပြီးဖြစ်ပါတယ်။ ဒါကြောင့် ကျွန်မတို့ အခုလာရောက်တာကလည်း စီမံကိန်းနှင့်ပတ်သက်တဲ့ အကြောင်းအရာတွေချပြမယ်။ နောက်ပြီး EMR ကနေ ဆောင်ရွက်နေတဲ့ EIA နှင့်ပတ်သက်တဲ့လုပ်ငန်းစဉ်တွေကို လာရောက်ရှင်းပြတာဖြစ်ပါတယ်” ဟု ဒေါ်မြတ်မွန်ဆွေက ပြောကြားသည်။
အဆိုပါဆွေးနွေးပွဲတွင် စီမံကိန်းကို ဖော်ဆောင်မည်ဟုဆိုသော PC Myanmar (Hong Kong) လီမိတက်မှ တာဝန်ရှိသူများကမူ စီမံကိန်းနှင့်ပတ်သက်ပြီး မီဒီယာများ၏မေးမြန်းချက်ကို ဖြေကြားရန်ငြင်းဆန်ခဲ့သည်။ PETRONAS ကုမ္ပဏီအနေဖြင့် မြန်မာနိုင်ငံတွင် လုပ်ကွက်ရှစ်ခု ဆောင်ရွက်နေပြီး တနင်္သာရီတိုင်းဒေသကြီး၊ ဧရာဝတီတိုင်းဒေသကြီး၊ မကွေးတိုင်းဒေသကြီးနှင့် ရခိုင်ပြည်နယ်တို့တွင် ရေနံနှင့်သဘာဝဓာတ်ငွေ့များ တူးဖော်လုပ်ကိုင်နေကြောင်း သိရှိရသည်။
